Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Sewa ti mo alingbi ti duti na ngia

 MBAGE 3

Lege ti leke na akpale

Lege ti leke na akpale

“Ala ndoye tere ngangu na popo ti ala, ngbanga ti so ndoye akanga ndo ti asiokpari mingi.”1 Pierre 4:8

Tongana mo na wali wala koli ti mo akomanse gigi ti ala ti amarié, akpale nde nde ayeke londo. Sarango ye ti ala nga pensé ti ala so ayeke nde nde alingbi ti duti na gunda ti akpale ni. A lingbi nga ti londo na mbeni ndo nde nga ndali ti ambeni ye so asi so ala ku tere ti ala na ni ape.

A yeke ngangu ape ti kpe ti leke akpale, me Bible awa e ti kpe ni ape (Matthieu 5:23, 24). Tongana mo sara ye alingbi na awango ti Bible, mo yeke wara anzoni ye so mo yeke na bezoin ni ti leke na akpale ti mo.

 1 SARA TËNË NA NDO TI KPALE NI

YE SO BIBLE ATENE: “Ngoi . . . ti sara tënë” ayeke dä (Zo-ti-fa-tene 3:1, 7). Leke si ala mû ngoi ti sara tënë na ndo ti kpale ni. Fa polele na wali wala koli ti mo tënë ti bê ti mo na ndo ti tënë ni. Ala tene “tâ tënë” lakue na mba (aÉphésien 4:25). Même si ngonzo ayeke na bê ti mo ngangu, kpe ti dekongo. Tongana mo kiri tënë yeke, a yeke sara si lekengo tënë ni ague asi na papa ape.aProverbe 15:4; 26:20.

Atâa tongana mango tere ayeke dä ape, ngbâ ti sara ye na nzoni bê. Nga ngbâ ti ye wali wala koli ti mo nga ti ne lo (aColossien 4:6). Gi ti leke tënë ni hio, nga ke pëpe ti sara tënë na mba ti mo.aÉphésien 4:26.

YE SO MO LINGBI TI SARA:

  • Gi mbeni nzoni ngoi ti sara lisoro na ndo ti kpale ni so

  • Tongana a yeke tour ti mo ti mä mba ti mo, kpe ti fâ tënë na yanga ti lo. Tour ti ti mo ayeke si ande

 2 MÄ LO NGA COMPRENDRE LO

YE SO BIBLE ATENE: “Zia ala duti na tâ yengo tere na popo ti ala. Na ndo ti tënë ti nengo mba na popo ti ala, zia ala duti azo so amû li ni kozo ti sara ni.” (aRomain 12:10). Fason so mo yeke mä na mba ti mo ayeke kota ye mingi. ‘Zia tere ti mo na place ti mba ti mo nga duti na tâ be-ti-molenge,’ na ngoi so mo yeke gi ti hinga ngbanga ti nyen wali wala koli ti mo ayeke na apensé tongaso (1 Pierre 3:8; Jacques 1:19). Na mango mba ti mo, zia pensé ti mo ahon na mbeni ndo nde ape. Tongana lege ayeke dä, zia kua so mo yeke sara ti dengi mê kue na lo, wala hunda ti tene ala sara tënë ni na mbeni ngoi nde. Tongana mo bâ wali wala koli ti mo tongana mbeni wato ape, a yeke sara si “bê ti mo ason hio hio ape”.Zo-ti-fa-tene 7:9.

YE SO MO LINGBI TI SARA:

  • Ngbâ ti mä mba ti mo nzoni, même si tënë so mo yeke mä anzere na mo ape

  • Gi ti hinga ye so ayeke na peko ti tënë ti mba ti mo ni. Bâ sarango ye ti lo nga mä totongo ti go ti lo nzoni

3 SARA YE ALINGBI NA DESIZION SO ALA MÛ

YE SO BIBLE ATENE: “Na yâ kusala kue, futa ayeke dä, me tënë ti yanga senge asara si nzinga asara zo.” (aProverbe 14:23). Ti mä tere na ndo ti fason ti leke mbeni kpale ayeke nzoni, me alingbi kue ape. A yeke nzoni ala sara ye alingbi na desizion so ala mû ni. Ye so alingbi ti hunda ti tene ala sara kua ngangu nga ala sara effort. Me ye ti pekoni ayeke nzoni (aProverbe 10:4). Tongana ala sara kua maboko na maboko, ala yeke wara “futa” teti ngangu kua ti ala ni.Zo-ti-fa-tene 4:9.

YE SO MO LINGBI TI SARA:

  • Ala mû desizion na ndo ti aye so zo oko oko adoit ti sara ti leke na kpale ni

  • Ngoi na ngoi, zia ala kiri abâ ye so ala sara awe