Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Sewa ti mo alingbi ti duti na ngia

 MBAGE 6

Changement so abébé ayeke ga na ni na yâ ti mariage

Changement so abébé ayeke ga na ni na yâ ti mariage

“Amolenge ayeke ye ti héritier so L’Éternel amû na zo.”Psaume 127:3

Dungo mbeni bébé alingbi ti duti mbeni ye so aga na ngia nga na ambeni kpale. So ala ga fini babâ na mama, ala lingbi ti bâ so mingi ti ngoi ti ala nga na ngangu ti ala ayeke ti tene ala bâ na lege ti bébé ti ala. So ala yeke lango nzoni ape nga ala yeke wara ambeni changement na yâ ti tere ti ala alingbi ti sara si songo ti ala aga ngangu. Ala use kue adoit ande ti sara ambeni changement si ala bâ lege ti bébé ti ala nzoni nga si ala bata mariage ti ala. Tongana nyen la awango ti Bible alingbi ti mû maboko na mo ti hon ndo ti akpale so?

 1 BÉBÉ AYEKE CHANGÉ GIGI TI MO TONGANA NYEN?

YE SO BIBLE ATENE: “Ndoye ahinga ti kanga bê ti ku nga lo ye gi ti sara nzoni na zo.” Nga, ndoye ayeke “gi gi aye so anzere na lo pëpe, lo yeke sara ngonzo hio hio pëpe.” (1 aCorinthien 13:4, 5). So mo wali ni mo ga fini mama, a yeke na lege ni ti tene mo bi bê ti mo mingi na ndo ti bébé ti mo. Ye oko, koli ti mo alingbi ti komanse ti pensé so mo yeke pensé encore na lo ape. Ni la, girisa ape so lo kue lo yeke na bezoin ti tene mo bâ lege ti lo. Na kangango bê nga na nzoni bê, mo lingbi ti sara si lo bâ so mo yeke na bezoin ti lo nga so tënë ti bango lege ti molenge ni abâ lo nga.

“Akoli, ala ngbâ ti duti na awali ti ala na lege ti hingango ye.” (1 Pierre 3:7). Koli, hinga so wali ayeke mû ande ngangu ti lo mingi ti bâ lege ti bébé ti ala. So lo kiri lo wara afini kua ti sarango ni, lo lingbi ti bâ so aye ni ahon ndo ti lo, a mû ngangu ti lo kue wala a sara si lo yeke na nzara ti ambeni ye ape. Na ambeni ngoi, lo lingbi ti sara ngonzo na tere ti mo. Me zi yanga ape, ngbanga ti so “zo so ngonzo asara lo fade pëpe, lo yeke nzoni ahon walombe”. (aProverbe 16:32). Ni la, sara ye na ndara nga mû na lo maboko so lo yeke na bezoin ni.aProverbe 14:29.

YE SO MO LINGBI TI SARA:

  • Babâ: Mû maboko na wali ti mo ti bâ lege ti molenge ni nzoni, même na bï nga. Mû mbage ti ngoi so mo yeke sara na ambeni ye nde ti duti na tere ti wali ti mo nga na bébé ti mo

  • Mama: Tongana koli ti mo aye ti mû maboko na mo ti bâ lege ti molenge ni nzoni, yeda na mungo maboko ti lo ni. Tongana lo sara kua ni nzoni ape, diko tënë na tere ti lo ape, me na nzoni bê fa na lo tongana nyen ti sara ni

 2 KPENGBA SONGO TI ALA

YE SO BIBLE ATENE: “Fade ala ga mitele oko.” (Genèse 2:24). Atâa so ala wara fini zo na yâ ti sewa ti ala, girisa ape so mo na koli wala wali ti mo ala ngbâ lakue “mitele oko.” Sara kue si songo ti ala angbâ ngangu.

Wali, kiri singila na koli ti mo ndali ti maboko so lo yeke mû. Merci so mo yeke tene “asara si ye aga nzoni.” (aProverbe 12:18). Koli, tene na wali ti mo so mo ye lo mingi nga mo ne lo mingi. Gonda lo ndali ti fason so lo yeke bâ na lege ti sewa ni.aProverbe 31:10, 28.

“Zia zo oko oko angbâ ti gi ye so asara nzoni na mba ti lo, me pëpe ye so asara nzoni gi na lo wani.” (1 aCorinthien 10:24). Gi lakue ye so ayeke nzoni ndali ti koli wala wali ti mo. Zia ala use kue amû ngoi ti sara lisoro, ti gonda mba nga ti mä mba. Tongana a ndu tënë ti bungbingo koli na wali, pensé gi na mo wani ape. Hinga bezoin ti koli wala wali ti mo. Bible atene: “Ala gbanzi tere ti ala na popo ti ala pëpe, ala gbanzi tere ti ala gi tongana ala use kue amä tere ti sara tongaso.” (1 aCorinthien 7:3-5). Ni la, a yeke nzoni ala use kue asara lisoro polele na ndo ni. Tongana mo kanga bê nga mo zia tere ti mo na place ti mba ti mo, ye so ayeke kpengba songo ti ala.

YE SO MO LINGBI TI SARA:

  • Girisa ape ti mû ngoi gi ndali ti ala use

  • Sara akete kete ye so alingbi ti sara si koli wala wali ti mo abâ so mo ye lo. A yeke ye tongana mungo na lo mbeni kete cadeau

 3 FA YE NA BÉBÉ TI MO

YE SO BIBLE ATENE: “Ngbene ye so mo de foroto, mo hinga awe aMbeti so ayeke nzoni-kue, so alingbi ti sara si mo wara ndara ti wara na salut.” (2 Timothée 3:15). Leke kozoni ye so mo yeke fa ande na bébé ti mo. Bébé ti mo alingbi ti manda aye mingi, même na ngoi so lo ngbâ na yâ ti mama ti lo. Lo lingbi ti hinga go ti mo nga aye so agbu bê ti mo. Diko mbeti na lo na ngoi so lo ngbâ kete mingi. Atâa tongana lo mä yâ ti aye so mo diko na lo so ape, a yeke mû maboko na lo ti hinga nzerengo ti dikongo mbeti tongana lo ga kota.

Bébé ti ala ayeke kete mingi ape ti mä tënë na ndo ti Nzapa. Zia lo mä mo na sambelango Jéhovah (Deutéronome 11:19). Même na ngoi so mo na lo ayeke sara ngia, sara tënë na ndo ti aye so Nzapa aleke (Psaume 78:3, 4). Na ngoi so molenge ti mo ayeke kono, lo yeke bâ ande tongana nyen la mo ye Jéhovah nga lo yeke manda ti ye lo nga.

YE SO MO LINGBI TI SARA:

  • Sambela ti wara ndara ti tene mo fa ye na bébé ti mo

  • Fa fani mingi na bébé ti mo ye so mo ye lo hinga si amû lege na lo ti komanse ti manda ye hio