Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

“Zia ala ngbâ na yâ ti ndoye ti Nzapa”

 CHAPITRE 6

Tongana nyen ti soro nzoni ngia?

Tongana nyen ti soro nzoni ngia?

“Ala sara ye kue ndali ti gloire ti Nzapa.”​—1 ACORINTHIEN 10:31.

1, 2. Na ndö ti tënë ti angia, e yeke na adesizion wa ti mungo ni?

BÂ SO mo ye ti te mbeni nzerengo lê ti keke, me mo bâ so mbeni mbage ni afun awe. Mo yeke sara nyen? Kozoni, mo lingbi ti te ni kue, même mbage ni so afun so; use ni, mo lingbi ti bi lê ti keke ni kue; ota ni, mo lingbi ti fâ gï fungo mbage ni so ti bi na ti te gï nzoni mbage ni so angbâ. Mo yeke soro ti mo ti sara nyen?

2 E lingbi ti tene so angia so e ye ti sara ayeke tongana lê ti keke so. A lingbi ti si so mo ye ti sara mbeni ngia, me mo bâ so angia mingi laso ayeke buba nzoni sarango ye ti zo, na même afun awe. Tongaso, mo yeke sara nyen? Ambeni zo alingbi ti kanga lê ti ala na ndö ti aye so ayeke sioni na ala yeda na angia kue so dunia so azia na gbele ala. Ambeni alingbi ti ke angia kue, ti tene ala zia terê ti ala na yâ ti mbeni ye ti sioni oko pëpe. Nga, ambeni alingbi ti bâ yâ ti angia ni, ti ke angia so ayeke sioni na ti yeda ngoi na ngoi na ati so ayeke nzoni kamême. Ngia wa la a lingbi mo soro ti tene mo ngbâ na yâ ti ndoye ti Nzapa?

3. Nyen la e yeke bâ fadeso?

3 Ti mingi ti e, e yeke soro ota ye ni. E hinga so e yeke na bezoin ti sara ngia kete, me e ye ti sara gï angia so ayeke buba pëpe nzoni sarango ye ti e. Tongaso, a lingbi e gi ti bâ ye so e lingbi ti sara ti hinga popo ti anzoni ngia na asioni ni. Me, kozoni kue, zia e bâ ye so angia so e soro alingbi ti sara na ndö ti vorongo so e yeke voro na Jéhovah.

 “ALA SARA YE KUE NDALI TI GLOIRE TI NZAPA”

4. Na lege wa la tënë ti mungo terê ti e na Jéhovah andu angia so e ye ti sara?

4 A ninga kete awe, mbeni Témoin so ayeke mbakoro, so a wara batême na ngu 1946, atene: “Mbi yeke sara kue ti duti na ngoi ti diskur ti batême oko oko kue na ti dengi mê nzoni na ni, mo bâ mo tene a yeke diskur ti batême ti mbi wani.” Ngbanga ti nyen? Lo tene: “Ti sara si lango ti mungo terê ti mbi na Jéhovah angbâ na yâ ti li ti mbi, mo bâ mo tene ye ni asi gï biri, amû maboko na mbi mingi ti ngbâ be-ta-zo.” Mo kue mo yeke yeda biani na bango ndo ti lo so. Tongana bê ti mo ayeke lakue na ndö ti yanga so mo mû na Jéhovah awe ti sara na lo na lâ ti fini ti mo kue, a yeke pusu mo ti gbu ngangu. (Diko Zo-ti-fa-tene 5:4.) Biani, tongana mo gbu li ti mo na ndö ti mungo terê ti mo na Jéhovah, a yeke sara mbeni ye gï pëpe na ndö ti bango ndo ti mo na ndö ti kua ti mo ti Chrétien, me nga na ndö ti tanga ti aye kue so mo yeke sara na yâ ti gigi ti mo, so andu nga angia so mo ye ti sara. Bazengele Paul afa so tënë so ayeke tâ tënë na ngoi so lo tene na aChrétien ti ngoi ti lo, lo tene: “Wala ala yeke te ye, wala ala yeke nyon ye wala ala yeke sara mbeni ye nde, ala sara ye kue ndali ti gloire ti Nzapa.”​—1 aCorinthien 10:31.

5. Tongana nyen la Lévitique 22:18-20 amû maboko na e ti hinga kpengba tënë so ayeke na peko ti aRomain 12:1?

5 Ye kue so mo yeke sara na gigi  ti mo abâ nga vorongo so mo yeke voro na Jéhovah. Na yâ ti mbeti ti Paul na aRomain, lo tene mbeni tënë so ndani alï mingi ti yôro tâ tënë so na yâ ti bê ti amba ti lo aChrétien. Lo wa ala lo tene: “Ala mû terê ti ala tongana sandaga so ayeke na fini, so ayeke nzoni-kue, so anzere na Nzapa, so ti tene mbeni kua so ala sara na Nzapa, so ala sara ni na hingango ndo ti ala.” (aRomain 12:1). Terê ti mo ni ayeke aye tongana bibe ti mo, bê ti mo nga na ngangu ti terê ti mo. Mo yeke mû aye so kue ti sara na kua na Nzapa (Marc 12:30). Paul atene so tongana mo sara kua na Jéhovah na âme ti mo kue, a yeke tongana mbeni sandaga la mo mû na lo. Mbeni kpengba tënë ayeke na peko ti tënë “sandaga” so. Na gbe ti Ndia ti Moïse, Nzapa ake lani asandaga so a mû na lo na so mbeni ye ti terê ni abuba (Lévitique 22:18-20). Legeoko nga, tongana mbeni Chrétien amû na Nzapa mbeni sandaga na lege ti yingo me so mbeni ye ti sioni ayeke na terê ni, Nzapa ayeke ke ni. Me ye tongaso alingbi ti si tongana nyen?

6, 7. Mbeni Chrétien alingbi ti sara saleté na terê ti lo tongana nyen? Aye wa la alingbi ti ga na pekoni?

6 Paul awa aChrétien ti Rome lo tene: “Ala ngbâ ti mû amembre ti terê ti ala ti mû na siokpari pëpe.” Paul atene nga na ala ti “fâ asarango ye ti terê ti ala”. (aRomain 6:12-14; 8:13). Lo fa kozo awe na yâ ti mbeti ti lo ni ambeni tapande ti “asarango ye ti terê” ni so. Na ndö ti azo kue, so siokpari ayeke na terê ti ala, lo tene: “Yanga ti ala asi singo na tënë ti deba.” “Gere ti ala ayeke kpe hio ti tuku mênë.” “Mbeto ti Nzapa ayeke na ti ala pëpe.” (aRomain 3:13-18). Mbeni Chrétien ayeke sara saleté na terê ti lo tongana lo mû “amembre” ti terê ti lo ni, wala ambage ti terê ti lo, ti sara na aye ti sioni tongaso. Na tapande, Chrétien so asoro na bê ti lo wani ti bâ aye ti sioni tongana porno, wala aye so afa dandara sarango ye ti ngangu na zo tâ ti sioni ni, lo yeke “mû [alê ti lo] ti mû na siokpari” na lo yeke sara saleté na terê ti lo kue. Vorongo kue so lo yeke voro na Jéhovah ayeke ga tongana  mbeni sandaga so ayeke nzoni-kue mbeni pëpe na so ayeke nzere na lê ti Nzapa pëpe (Deutéronome 15:21; 1 Pierre 1:14-16; 2 Pierre 3:11). So tâ ye ti mawa so lo soro ti sara ngia so ayeke nzoni pëpe!

7 A yeke polele so ngia so mbeni Chrétien ayeke soro ti sara alingbi ti sara nzoni wala sioni mingi na lo. Biani, e ye ti soro mbeni ngia so ayeke sara si sandaga so e mû na Nzapa aduti pendere, me pëpe mbeni ngia so ayeke sara saleté na terê ti sandaga ti e. Fadeso, zia e bâ ye so e lingbi ti sara ti hinga popo ti anzoni ngia na asioni ni.

“KE NA BÊ OKO YE SO AYEKE SIONI”

8, 9. (a) Mingi ni, a lingbi ti kangbi yâ ti angia na mbage oke? (b) Mara ti angia wa la e yeke ke ni? E yeke ke ni ngbanga ti nyen?

8 Mingi ni, a lingbi ti kangbi yâ ti angia na mbage use. Oko ni andu angia so aChrétien ake ni na bê oko; na use ni ayeke angia so Chrétien alingbi ti yeda na ni wala pëpe. Zia e bâ kozoni kue angia so aChrétien ake ni na bê oko.

9 Tongana ti so e bâ ni na Chapitre 1 ti mbeti so, ambeni ngia ayeke dä so afa dandara asarango ye so Bible ake ni polele. Bâ na tapande aye so a yeke zia ni na ndö ti Internet nga na yâ ti alimon, akua-singa na télé nga na amozoko: aye so ayeke fa asarango ye ti ngangu na zo tâ ti sioni ni, wala aye ti asioni yingo wala porno wala ati so amaï tënë ti asarango ye so ayeke sioni mingi. Ndali ti so asioni ngia tongaso ayeke fa aye so ague nde na andia nga na amama-ndia ti Bible tongana aye so ayeke sioni pëpe, a yeke nzoni atâ Chrétien ake ni (Kusala 15:28, 29; 1 aCorinthien 6:9, 10; Apocalypse 21:8). Tongana mo ke mara ti asioni ngia tongaso, mo yeke fa na Jéhovah so biani mo “ke na bê oko ye so ayeke sioni” na so lakue mo yeke “tourné peko na ye so ayeke sioni”. Na sarango tongaso mo yeke fa so mo yeke na “mabe so ayeke ti handango lê ti zo pëpe.”​—aRomain 12:9; Psaume 34:14; 1 Timothée 1:5.

10. Na ndö ti tënë ti angia, mara ti atënë wa la alingbi ti ga na kpale na zo? Ngbanga ti nyen?

 10 Ye oko, ambeni zo alingbi ti tene so ti bâ angia so afa dandara asarango ye so ayeke na lege ni pëpe asara ti lo ye oko na ndö ti ala ape. Ala yeke tene: ‘Mbi yeke bâ gï ni na limon wala na télé, me mbi wani mbi lingbi ti sara aye ni so lâ oko ape.’ Na tenengo mara ti atënë tongaso, ala yeke handa gï terê ti ala wani nga a yeke ga na ala kpale. (Diko Jérémie 17:9.) Tongana a nzere na e ti bâ mbeni ngia so afa aye so Jéhovah ake, e fa biani so e “ke na bê oko ye so ayeke sioni” la? Tongana lakue e yeke bâ aye ti sioni tongaso, a yeke sara si conscience ti e akui (Psaume 119:70; 1 Timothée 4:1, 2). Mara ti sarango ye tongaso alingbi ti buba ye so e yeke sara wala ti changé lege so e yeke bâ na asioni ye so ambeni zo ayeke sara.

11. A-Galate 6:7 aga tâ tënë tongana nyen na ndö ti tënë ti sarango angia?

11 Aye so asi biani na ambeni ita awe. Ala tï na yâ ti siokpari ngbanga ti so ngia so ala yeke bâ lakue asara ye ti sioni na ndö ti ala. Ye ti vundu so asi na ala afa na ala biani so “ye so mbeni zo ayeke lu, gï ni la lo yeke ko ni ande.” (aGalate 6:7). Me lege ti kpe ye ti vundu tongaso ayeke dä. Tongana mo sara kue ti lu na yâ ti li ti mo gï ye so ayeke nzoni, fade mo yeke duti na ngia ti ko ye so ayeke nzoni na yâ ti gigi ti mo.​—Bâ encadré “ A yeke nzoni mbi soro mara ti ngia wa?

MÛ ADESIZION SO ALUTI NA NDÖ TI AMAMA-NDIA TI BIBLE

12. A-Galate 6:5 andu tënë ti ngia tongana nyen? E yeke na aye wa so ayeke mû maboko na e ti mû adesizion e wani?

12 Fadeso, zia e bâ tënë ti angia so a yeke ngangu ti hinga wala Bible ake ni wala ake ni pëpe. Tongana Chrétien oko oko ayeke soro mara ti angia tongaso, a lingbi lo mû desizion ti lo na ndö ti ye so lo bâ tongana nzoni ngia. (Diko aGalate 6:5.) Me, tongana a yeke ti e ti soro mbeni ngia, a zia e gï tongaso pëpe. Na yâ ti Bible, e yeke wara amama-ndia,  so ti tene atâ tënë, so amû lege na e ti hinga bango ndo ti Jéhovah na ndö ti ngia ni so. Tongana e pensé na amama-ndia so, e yeke wara lege ti hinga na yâ ti aye kue “wala ye so bê ti Jéhovah aye ayeke nyen”, na ye so andu nga angia so e yeke soro.​—aÉphésien 5:17.

13. Nyen la ayeke mû maboko na e ti kpe angia so alingbi pëpe ti nzere na bê ti Jéhovah?

13 E hinga so, na ndö ti tënë ti sorongo angia, lege so aChrétien kue ayeke bâ yâ ti aye ayeke legeoko pëpe (aPhilippien  1:9). Nga, aChrétien ahinga so na ndö ti tënë ti angia, zo oko oko ayeke na bango ndo ti lo. Tongaso, e lingbi ti ku pëpe ti tene aChrétien kue amû gï desizion oko. Même na ndö ti tënë so, tongana e gi ti gbu li mingi na ndö ti amama-ndia ti Nzapa, e yeke duti nduru mingi ti kpe angia kue so alingbi ti nzere na bê ti Jéhovah pëpe.​—Psaume 119:11, 129; 1 Pierre 2:16.

14. (a) Na ngoi so e yeke soro angia so e ye ti sara, a lingbi e bâ nyen? (b) A lingbi e sara nyen si aye so andu Royaume angbâ na kozo ndo na yâ ti gigi ti e?

14 Na ngoi so mo yeke soro ti sara mbeni ngia, mbeni kota ye nde ayeke dä so a lingbi mo bâ ni: ngoi ti mo. Ngia so mo soro ti sara ni ayeke fa ye wa la ayeke nzoni na lê ti mo, me ngoi so mo yeke mû ti sara na ngia ni so ayeke fa ti lo ye so mo bâ tongana kozo ye na yâ ti gigi ti mo. Biani, ye so ayeke tâ kota ye na yâ ti gigi ti aChrétien ayeke aye ti yingo. (Diko Matthieu 6:33.) Tongaso, nyen la mo lingbi ti sara ti bâ nzoni si aye so andu Royaume angbâ lakue na kozo ndo na yâ ti gigi ti mo? Bazengele Paul atene: “Zia ala sara hange mingi na tambela ti ala si aduti tongana ti azo ti buba pëpe, me tongana ti azo ti ndara.” (aÉphésien 5:15, 16). Biani, ti zia mbeni mbilimbili ngoi ti sara na ngia ayeke mû maboko na mo ti wara ngoi ti sara “aye so ayeke akota ye mingi ahon atanga ni”, so ti tene akua so ayeke mû lege na mo ti ngbâ ti duti na nzoni songo na Nzapa.​—aPhilippien 1:10.

15. Na ngoi so e yeke soro angia, ngbanga ti nyen la a yeke na lege ti ndara ti sara hange mingi ahon ti so a hunda na e?

15 Tongana e yeke soro angia, a yeke nga lege ti ndara ti sara hange mingi ahon ti so a hunda na e. So aye ti tene nyen? Zia e kiri e bâ tapande ti lê ti keke so. Ti te fungo mbage ni so pëpe, mo yeke sara ye na hange mingi na lege so mo yeke ngbâ gï na fungo place ni pëpe ti fâ ni, me mo yeke pusu na peko ayo kete si mo fâ ni. Legeoko nga, a yeke duti na lege ti ndara ti tene na yâ ti angia so mo yeke soro, mo sara hange mingi ahon ti so a hunda na mo. Chrétien so  ayeke na ndara ayeke kpe gï pëpe angia so Bible ake ni polele, me nga angia so a yeke ngangu kete na zo ti hinga wala a yeke sioni wala pëpe nga na angia so mbeni mbage ni alingbi ti buba songo ti e na Jéhovah (aProverbe 4:25-27). Mungo peko ti wango ti Bible nduru nduru ayeke mû maboko na mo ti kpe angia tongaso.

“YE KUE SO AYEKE NZONI-KUE”

Sarango ye alingbi na amama-ndia ti Bible na ngoi so e yeke soro angia abata e si songo ti e na Jéhovah abuba pëpe

16. (a) Tongana nyen la e lingbi ti fa so bango ndo ti e ague oko na ti Jéhovah na ndö ti nzoni sarango ye? (b) Mo lingbi ti sara ye tongana nyen ti tene batango andia ti Bible aga mbeni ye so ayeke na yâ ti mênë ti mo?

16 Tongana atâ Chrétien ayeke soro angia ti ala, ala yeke gi kozoni kue ti hinga bango ndo ti Jéhovah na ndö ni. Bible afa na e atënë ti bê ti Jéhovah nga na andia ti lo. Na tapande, Gbia Salomon afa molongo ti ambeni ye so Jéhovah ake, aye tongana “yanga so ayeke tene mvene, maboko so ayeke tuku mênë ti azo so tënë ayeke na li ti ala pëpe, bê so ayeke leke ti sara sioni na zo, gere so akpe hio ti gue ti sara sioni”. (aProverbe 6:16-19). Tongana nyen la bango ndo ti Jéhovah ayeke mû maboko na mo ti bâ ye nzoni? Mbeni wasungo psaume atene: “Ala azo so aye Jéhovah, ala ke ye ti sioni.” (Psaume 97:10). A yeke nzoni angia so mo soro afa so mo ke biani ye so Jéhovah ake (aGalate 5:19-21). Nga, girisa ape so a yeke aye so mo sara na ngoi so mo yeke gï mo oko la ayeke fa tâ sarango ye ti mo, me a yeke pëpe aye so mo sara ni na lê ti azo (Psaume 11:4; 16:8). Ni la, tongana na yâ ti aye  kue, mo yeke na nzara ti sara ye so ague oko na atënë ti bê ti Jéhovah na ndö ti nzoni sarango ye, mo yeke soro lakue aye so ague oko na amama-ndia ti Bible. Sarango tongaso ayeke ga mbeni ye so ayeke na yâ ti mênë ti mo.​—2 aCorinthien 3:18.

17. Kozoni si e soro mbeni ngia, a lingbi e hunda terê ti e na atënë wa?

17 Tongana a ndu tënë ti sorongo mbeni ngia, nyen la mo lingbi nga ti sara ti hinga biani so mo yeke sara ye ague oko na bango ndo ti Jéhovah? Gbu li ti mo na ndö ti hundango ndo so: ‘Ngia ni so alingbi ti sara nyen na ndö ti mbi nga na ndö ti songo ti mbi na Nzapa?’ Na tapande, kozoni si mo soro ti bâ mbeni limon, hunda terê ti mo: ‘Ye so mbi yeke bâ ande na yâ ti limon so ayeke sara nyen na ndö ti conscience ti mbi?’ Zia e bâ amama-ndia so andu tënë so.

18, 19. (a) Tongana nyen la mama-ndia so e wara na aPhilippien 4:8 alingbi ti mû maboko na e ti bâ wala mbeni ngia ayeke nzoni? (b) Ambeni mama-ndia wa la alingbi ti mû maboko na mo ti soro mbeni nzoni ngia? (Bâ kete tënë na gbe ti lembeti 72.)

18 Mbeni mama-ndia ni ayeke na aPhilippien 4:8, so atene: “Ye kue so ayeke tâ tënë, ye kue so zo ayeke ne ni, ye kue so ayeke mbilimbili, ye kue so ayeke nzoni-kue, ye kue so zo alingbi ti ye ni, ye kue so a sara nzoni tënë ni, atâa a yeke ye so ayeke nzoni mingi, wala ye so a lingbi ti gonda ni, ala ngbâ ti bi bê ti ala na ndö ti aye so.” Tâ tënë, Paul ayeke sara tënë ti angia pëpe, me ti aye so a lingbi zo agbu li ti lo na ndö ni, so ti tene aye so anzere na bê ti Nzapa (Psaume 19:14). Ye oko, mama-ndia so ayeke na peko ti atënë ti Paul so alingbi ti ndu angia so e soro ti sara ni. A ndu ni tongana nyen?

19 Hunda terê ti mo: ‘Alimon, angia ti vidéo, amozoko nga na ambeni ngia so mbi soro ni ayeke sara si mbi yeke bi bê ti mbi na “ye kue so ayeke nzoni-kue”?’ Na tapande, na peko ti mbeni limon so mo bâ, mara ti a-image wa la ayeke tambela na yâ ti li ti mo? Tongana a-image so aga na li ti mo ayeke nzoni, ayeke na sioni oko pëpe nga adë bê ti mo, hinga so limon so mo bâ fade asara nzoni na mo. Me, tongana  limon so mo bâ ni so asara si mo bi bê ti mo na ndö ti aye so ayeke nzoni-kue pëpe, hinga so limon ni asara nzoni na mo pëpe na même asara sioni na mo (Matthieu 12:33; Marc 7:20-23). Ngbanga ti nyen? Ngbanga ti so bingo bê na aye so afa anzoni sarango ye pëpe ayeke sara si mo yeke na siriri ti bê pëpe, conscience ti mo so Bible amû lege na mo ti leke ni nzoni ayeke buba, na a lingbi ti buba songo ti mo na Nzapa (aÉphésien 5:5; 1 Timothée 1:5, 19). Ndali ti so mara ti angia tongaso ayeke sara sioni na mo, leke na bê ti mo ti ke ni * (aRomain 12:2). Sara ye tongana ti wasungo psaume so asambela Jéhovah atene: “Zi lê ti mbi na terê ti ye so ayeke senge senge.”​—Psaume 119:37.

GI YE SO ASARA NZONI NA AMBA TI MO

20, 21. Tongana nyen la 1 aCorinthien 10:23, 24 andu tënë ti sorongo anzoni ngia?

20 Paul afa mbeni mama-ndia so a lingbi e bi bê ti e dä tongana e yeke mû adesizion na ndö ti aye so abâ zo oko oko. Lo tene: “A mû lege na zo ti sara ye kue, me a yeke ye kue la si akpengba zo pëpe. Zia zo oko oko angbâ ti gi ye so asara nzoni na mba ti lo.” (1 aCorinthien 10:23, 24). Tongana nyen la mama-ndia so andu tënë ti sorongo anzoni ngia? A yeke nzoni mo hunda terê ti mo na tënë so: ‘Tongana mbi soro ngia so, a yeke sara azo tongana nyen?’

21 A lingbi ti si so conscience ti mo amû lege na mo ti sara mbeni ngia so mo bâ ni tongana mbeni ye so “a mû lege na zo ti sara” ni. Me, tongana mo bâ so ambeni ita so conscience ti ala agbanzi na ala ti sara ambeni ngia abâ ni na nzoni lê pëpe, mo lingbi ti mû desizion ti zia lege ni. Ngbanga ti nyen? Ngbanga ti so mo ye pëpe ti “sara siokpari tongaso na terê ti aita” ti mo (wala même, tongana ti so Paul atene, ti “sara siokpari na terê ti Christ”) na lege so mo yeke sara si a kiri a ga ngangu na aita ti mo so ti ngbâ ti duti be-ta-zo  na Nzapa. Na sarango tongaso, mo sara ye alingbi na wango so: “Ala sara hange si [ambeni zo] apika gere ngbanga ti ala pëpe.” (1 aCorinthien 8:12; 10:32). Laso, ti sara ye alingbi na wango ti Paul so afa so lo bi bê ti lo lani na ambeni zo nga lo sara ye na ndara, atâ Chrétien ayeke kpe ti sara ambeni ngia so “a mû lege na zo ti sara” ni me so “akpengba zo pëpe.”​—aRomain 14:1; 15:1.

22. Na ndö ti ambeni tënë so abâ gï zo oko oko, ngbanga ti nyen la aChrétien azia lege na amba ti ala ti duti na abango ndo so ayeke nde na ti ala?

22 Me, na ndö ti tene ti gingo ye so asara nzoni na amba ti mo, mbeni tënë ni angbâ. A lingbi Chrétien, so conscience ti lo agbanzi na lo ti sara ambeni ye, atene pëpe so a lingbi aita kue ti congrégation aduti gï na oko bango ndo ti lo na ndö ti ngia so ayeke na lege ni. Tongana lo sara tongaso, lo kpa mbeni zo so ahunda na azo kue so ayeke tambela na ndö ti oko lege na lo ti tambela gï tongana ti lo. Mara ti sarango ye tongaso ayeke na lege ni oko ape. Ndali ti ndoye so lo yeke na ni, a yeke nzoni Chrétien so ayeke na conscience so ayeke gbanzi na lo ti sara ambeni ngia ane amba ti lo so bango ndo ti ala ayeke nde na ti lo me so ague nde na amama-ndia ti Bible pëpe. Na sarango tongaso, lo zia si “azo kue ahinga so [lo] yeke sara ye ahon ndö ni pëpe.”​—aPhilippien 4:5; Zo-ti-fa-tene 7:16.

23. Nyen la mo lingbi ti sara ti bâ nzoni si mo soro gï anzoni ngia?

23 Na nduru tënë, nyen la mo lingbi ti sara ti bâ nzoni si mo soro gï anzoni ngia? Ke angia kue so afa dandara tongaso asioni sarango ye so Bible ake ni polele. Mû peko ti amama-ndia ti Bible so alingbi ti mû maboko na mo ti mû desizion na ndö ti ambeni ngia so Bible asara tënë ni polele pëpe. Kpe angia so ayeke sara sioni na conscience ti mo; duti nduru ti zia lege ti ambeni ngia so ason bê ti ambeni zo, mbilimbili so ason bê ti amba ti mo aChrétien. Zia si desizion so mo mû amû gonda na Nzapa nga abata mo na sewa ti mo na yâ ti ndoye ti Nzapa.

^ par. 19 Ambeni mama-ndia so amû maboko na zo ti soro nzoni ngia ayeke na aProverbe 3:31; 13:20; aÉphésien 5:3, 4; na aColossien 3:5, 8, 20.