Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

“Zia ala ngbâ na yâ ti ndoye ti Nzapa”

 CHAPITRE 10

Mariage: matabisi so alondo na Nzapa so aye e mingi

Mariage: matabisi so alondo na Nzapa so aye e mingi

“Kamba so a pe ni na kamba ota alingbi ti fâ hio pëpe.”​—ZO-TI-FA-TENE 4:12.

1, 2. (a) Tongana koli na wali amû terê fini fini, ngoi na ngoi atënë wa la e lingbi ti hunda na terê ti e? Ngbanga ti nyen? (b) Na yâ ti chapitre so, e yeke kiri tënë na ahundango ndo wa?

MO YE mingi ti gue na matanga ti mariage? Azo mingi aye ti gue, ndali ti so angoi tongaso alingbi ti sara si ala duti na ngia mingi. Na ngoi ni, mo yeke bâ so koli na wali ni ayü bongo pendere. Me ye so anzere na azo mingi ayeke so lê ti ala ayeke gï na ngia. Na lango ni so, pembe ti ala kue ayeke gï na gigi, na ala bâ so gigi ti ala ayeke duti ande gï nzoni.

2 Ye oko, na yâ ti aye mingi, yâ ti mariage ti azo aga laso kirikiri. Atâa so e ye ti tene ye ni kue atambela nzoni ndali ti ala so amû terê fini fini, ngoi na ngoi e lingbi ti hunda terê ti e: ‘Ala yeke duti ande na ngia na yâ ti mariage ni so la? Mungo terê ti ala ni ayeke ti lango oke?’ Tongana koli na wali ni azia bê ti ala kue na awango so Nzapa amû na ndö ti mariage nga ala sara ye alingbi na ni, a yeke mû lege na e ti kiri tënë na ahundango ndo so. (Diko aProverbe 3:5, 6.) A lingbi ala sara tongaso ti tene ala ngbâ na yâ ti ndoye ti Nzapa. Zia e bâ kiringo tënë ti Bible na ahundango ndo osio so: Ngbanga ti nyen ti sara mariage? Tongana mo ye ti sara mariage, a lingbi mo soro zo wa? Mo lingbi ti leke terê ti mo tongana nyen? Nga, nyen la alingbi ti mû maboko na koli na wali ti duti na ngia lakue na yâ ti mariage ti ala?

NGBANGA TI NYEN TI SARA MARIAGE?

3. Ngbanga ti nyen la a yeke na lege ti ndara pëpe ti sara mariage gï ndali ti asenge senge raison?

3 Ambeni zo atene ti ala so ti duti na ngia, a lingbi mo sara mariage  si, na tongana zo amû koli wala wali ape lo lingbi ti wara tâ ngia na yâ ti fini ti lo ape. Tënë so ayeke tâ tënë oko ape! Jésus, so angbâ lani kumbamba, atene so dutingo kumbamba ayeke mbeni matabisi, na lo wa ala so alingbi ti ngbâ kumbamba ti yeda na ni (Matthieu 19:11, 12). Bazengele Paul nga kue afa ambeni ye ti nzoni so zo alingbi ti wara tongana lo ngbâ kumbamba (1 aCorinthien 7:32-38). Me Jésus na Paul alu pëpe mbeni ndia na ndö ti tënë so, ti tene so a lingbi zo angbâ gï kumbamba na yâ ti gigi ti lo kue. Ti tâ tënë ni, ti ke na azo ti sara mariage ayeke na popo ti “afango ye ti asioni yingo.” (1 Timothée 4:1-3). Ye oko, ti zo so aye ti sara na Jéhovah na ti zia pëpe si mbeni ye agboto lê ti lo, dutingo kumbamba alingbi ti ga na lo aye ti nzoni mingi. Tongaso, a yeke na lege ti ndara pëpe ti tene mbeni zo ayeda ti sara mariage gï ndali ti asenge senge raison, na tapande ndali ti so amba ti lo la apusu lo ti sara ni.

4. Ngbanga ti nyen la nzoni mariage ayeke pendere mingi ndali ti batango amolenge?

4 Nga, anzoni raison ayeke dä ti tene zo asara mariage? En! Mariage nga kue ayeke mbeni matabisi so alondo na Nzapa ti e so aye e mingi. (Diko Genèse 2:18.) Tongaso, sarango mariage ayeke ga na zo ambeni nzoni ye na a lingbi ti zi lege na zo ti duti na ngia. Na tapande, nzoni mariage la ayeke sara si sewa aduti na ngia. Amolenge ayeke na bezoin ti kono na yâ ti mbeni sewa so aduti nzoni, so ababâ na amama ni ayeke bata ala, ayeke ndoye ala nga ayeke fa lege na ala nzoni (Psaume 127:3; aÉphésien 6:1-4). Ye oko, batango amolenge ayeke pëpe gï oko raison ti sara mariage.

5, 6. (a) Na Zo-ti-fa-tene 4:9-12, ambeni nzoni ye so kota songo so ayeke na popo ti azo use ayeke ga na ni ayeke so wa? (b) Na lege wa la mariage ayeke tongana mbeni kamba so a pe ni na kamba ota?

5 Zia e bâ versê so a zia na tongo nda ti chapitre so nga na atënë so angoro ni: “Azo use ayeke nzoni ahon zo oko, ndali ti so ala yeke wara nzoni futa ti peko ti ngangu kua ti ala. Tongana mbeni oko atï, mba ti lo alingbi ti yô lo na nduzu. Me nyen la ayeke si na zo so atï, si mbeni zo ti yô lo na nduzu ayeke dä ape? Nga, tongana azo use alango ndo oko, terê ti ala ayeke mû wâ, me zo so ayeke gï lo oko, terê ti lo ayeke mû wâ tongana nyen? Mbeni  zo alingbi ti hon zo oko na ngangu, me azo use alingbi ti luti na lo. Nga kamba so a pe ni na kamba ota alingbi ti fâ hio pëpe.”​—Zo-ti-fa-tene 4:9-12.

6 Aversê so andu kozoni kue songo so ayeke na popo ti akamarade. Biani, mariage ayeke nga mbeni kota songo na popo ti azo use. Tongana ti so aversê so afa, songo so atingbi mbeni koli na wali ti lo ayeke mû lege na zo oko oko ti mû maboko na mba, ti dë bê ti mba nga ti bata mba. Me mariage ayeke kpengba nzoni mingi tongana angbâ gï pëpe na songo so ayeke na popo ti azo use. Versê 12 aye nga ti fa so kamba so zo asara na kamba use alingbi ti fâ. Me ti kamba so a pe ni na kamba ota, a yeke duti ngangu mingi ti fâ yâ ni. Tongana mbeni koli na wali ti lo agi kozoni kue ti nzere na bê ti Jéhovah, mariage ti ala ayeke duti tongana kamba so a pe ni na kamba ota. Ndali ti so Jéhovah ayeke na yâ ti mariage ni, mariage ni ayeke kpengba mingi.

7, 8. (a) Wango wa la Paul amû na aChrétien so angbâ kumbamba si ayeke tiri na anzara ti terê ti ala? (b) Bango ndo wa so ayeke na lege ni Bible awa e ti duti na ni na ndö ti mariage?

7 A yeke na lege ni ti tene koli na wali abungbi terê gï tongana ala sara mariage awe. So ala sara mariage awe ayeke na lege ni ti bâ bungbingo koli na wali tongana mbeni ye so ayeke ga na ngia na ala (aProverbe 5:18). Atâa tongana mbeni kumbamba “[a]kpengba koli wala wali awe,” so ti tene lo hon ngoi so nzara ti terê ti lo ayeke mingi, a lingbi ti si so lo ngbâ ti tiri na anzara ti terê ti lo ti bungbingo koli na wali. Tongana lo hon ndö ti nzara ti terê ti lo ni pëpe, a lingbi ti gue na lo ti sara mbeni sioni ye wala mbeni ye so ayeke na lege ni pëpe. Yingo vulu apusu lani Paul ti mû wango so na akumbamba: “Tongana ala lingbi ti hon ndö ti nzara ti bê ti ala pëpe, zia ala sara mariage, ndali ti so a yeke nzoni mingi ti sara mariage ahon ti tene nzara ti terê ti ala ahon ndö ti ala.”​—1 aCorinthien 7:9, 36; Jacques 1:15.

8 Atâa raison wa la apusu mbeni zo ti sara mariage, a yeke nzoni lo bâ ye na lege ni. Tongana ti so Paul atene, ala so ayeke sara mariage “ayeke wara aye ti vundu na yâ ti mitele ti ala.” (1 aCorinthien 7:28). Ala so asara mariage awe ayeke tingbi na akpale so ala so angbâ kumbamba ayeke wara ni pëpe. Atâa so kue, tongana mo soro ti sara mariage, mo lingbi ti sara nyen ti wara kpale  mingi pëpe me ti wara gbâ ti aye ti nzoni? Mbeni ye ni oko ayeke ti soro wali wala koli ti mo na lege ti ndara.

ZO WA LA MO LINGBI TI SORO TI MÛ LO?

9, 10. (a) Paul amû tapande wa ti fa kpale so ayeke ga tongana zo abungbi oko na mbeni zo so amä na bê ape? (b) Mingi ni, nyen la ayeke si tongana mbeni ita ake ti mä wango ti Nzapa so ahunda ti sara mariage gï na yâ ti Seigneur?

9 Yingo vulu apusu Paul ti sû na mbeti mbeni mama-ndia so a lingbi zo abata ni tongana lo ye ti soro mbeni zo ti sara mariage na lo, lo tene: “Ala bungbi oko pëpe na azo so amä na bê pëpe na gbe ti joug oko.” (2 aCorinthien 6:14). Tapande so lo fa ni aluti na ndö ti mbeni ye so azo ti fango yaka ahinga ni nzoni. Tongana zo amû anyama so konongo ti ala nga ngangu ti ala ayeke legeoko pëpe si lo bungbi ala na gbe ti joug oko, ala use kue ayeke bâ pasi. Legeoko nga, tongana mbeni ita abungbi oko na gbe ti joug ti mariage na mbeni zo so amä na bê pëpe, ala use kue ayeke bâ pasi. Tongana oko aye ti lo ti ngbâ na yâ ti ndoye ti Jéhovah me mba ti lo ni asara gï sanka, aye so ala leke ti sara na yâ ti gigi ti ala ayeke gue nde nde na mingi ni vundu ayeke ga na pekoni. Ni la Paul awa aChrétien ti sara mariage “gï na yâ ti Seigneur.”​—1 aCorinthien 7:39.

10 A lingbi ti si so ambeni Chrétien so ayeke kumbamba atene so a yeke nzoni ala duti na gbe ti joug oko na mbeni zo so amä na bê pëpe ahon ti ngbâ ti duti gï ala oko. Ni la, ambeni ayeke mû desizion ti dö wango ti Bible so ti zia na ti sara mariage na mbeni zo so avoro Jéhovah pëpe. Ye ti peko ni ayeke gï vundu na vundu. Aita tongaso aga ti bâ so ala sara mariage na mbeni zo so ala na lo alingbi pëpe ti sara lisoro na ndö ti aye so ayeke kota mingi na yâ ti gigi ti zo. Ye so asara si ala yeke duti gï ala oko, me dutingo oko ti so ni so alingbi ti son mingi ahon ti so lani ala yeke kumbamba. Me ye ti nzoni ni ayeke so mo yeke wara aita mingi so ade kumbamba na so azia bê ti ala na ndia ti Nzapa, nga so angbâ ti bata wango ti lo so lakue. (Diko Psaume 32:8.) Atâa so ala yeke na beku ti sara mariage mbeni lâ, ala yeda ti ngbâ kumbamba juska na lango so ala yeke wara mbeni wali wala koli na popo ti awakua ti Jéhovah Nzapa.

11. Nyen la alingbi ti mû maboko na mo ti soro mbeni koli wala wali na lege ti ndara? (Bâ nga encadré “ Nyen la mbi yeke gi ti bâ na mbage ti zo so mbi ye ti mû lo?”)

 11 Biani, a yeke gï pëpe ngbanga ti so mbeni zo ayeke wakua ti Jéhovah si lo yeke nzoni wali wala nzoni koli ti sara mariage na lo. Tongana mo ye ti sara mariage, gï ti wara mbeni ita so sarango ye ti mo na ti lo amä terê, so aye so ala zia na gbele ala ti sara na yâ ti kua ti Jéhovah ayeke oko nga so lo ndoye Nzapa tongana ti mo. Ngbâa be-ta-zo asigi na ambeti mingi na ndö ti tënë so; a yeke nzoni mo gbu li ti mo na ndö ti awango ti Bible so ayeke na yâ ni na mo sambela na ndö ni, nga mo zia si a fa lege na mo na ngoi so mo ye ti mû kota desizion so. *​—Diko Psaume 119:105.

12. Na ndö ti tënë ti mariage, ngobo ti ambeni kodro mingi ahunda ti sara nyen? Tapande wa ti Bible alingbi ti mû maboko na zo na ndö ti tënë so?

12 Na yâ ti akodro mingi, ngobo ti ndo ni ahunda na ababâ na amama ti soro mbeni wali wala koli ndali ti molenge ti ala. Na yâ ti akodro ni so, mingi ni a bâ so ababâ na amama la ayeke na kota ndara nga na hingango ndo so a hunda ni ti mû mara ti kota desizion tongaso na place ti amolenge ti ala. Mingi ti amariage tongaso ague nzoni, tongana ti ngoi ti awakua ti Jéhovah ti ândö. Tapande ti Abraham so atokua wakua ti lo ti mû mbeni wali ndali ti Isaac alingbi ti mû maboko mingi na ababâ na amama ti laso, so aye ti soro mbeni wali wala koli ndali ti amolenge ti ala. Ye so agbu lani bê ti Abraham ayeke pëpe mosoro wala kota ndo so wali ni ayeke na ni. Me Abraham asara kue ti tene wali so lo ye ti mû lo na Isaac aduti na popo ti azo so avoro Jéhovah. *​—Genèse 24:3, 67.

 MO LINGBI TI LEKE TERÊ TI MO TONGANA NYEN?

13-15. (a) Wango so ayeke na aProverbe 24:27 alingbi ti mû maboko na mbeni maseka-koli so aye ti sara mariage tongana nyen? (b) Mbeni maseka-wali alingbi ti sara nyen ti leke terê ti lo ti sara mariage?

13 Tongana mo ye biani ti sara mariage, a yeke nzoni mo hunda terê ti mo na tënë so: ‘Mbi lingbi awe?’ Kiringo tënë ni abâ gï pëpe atënë ti bê ti mo na ndö ti tënë ti ndoye, ti bungbingo koli na wali, ti warango mbeni zo ti duti na terê ti mo wala ti batango amolenge. Me a lingbi koli wala wali so aye ti sara mariage agbu li ti lo na ndö ti akua so a hunda ande na lo ti sara na peko ti mariage ni.

14 Ti mbeni maseka-koli so aye ti mû wali, a lingbi lo gbu li ti lo na ndö ti mama-ndia so: “Leke akua ti mo so ayeke na gigi nga leke aye kue nzoni na yâ ti yaka ti mo. Na pekoni, leke da ti mo.” (aProverbe 24:27). Tënë so aye ti tene nyen? Giriri, tongana mbeni koli aye ti “sara da ti [lo]”, so ti tene ti mû wali na ti dü amolenge, a lingbi lo hunda terê ti lo: ‘Mbi lingbi awe ti bata wali nga amolenge so e yeke dü ande?’ Kozoni kue, a lingbi koli ni asara kua ngangu, lo fâ yaka. Mama-ndia so abâ e nga laso. Tongana mbeni koli aye ti mû wali, a lingbi lo leke terê ti lo kozoni kue ndali ti kua so ayeke ku lo. Tongana lo ngbâ na ngangu, a lingbi lo sara kua. Bible afa so tongana mbeni koli amû pëpe na azo ti sewa ti lo aye ti mitele, lo fa pëpe so lo ye ala nga lo mû maboko na ala pëpe ti kpengba songo ti ala na Jéhovah, sioni ti lo ahon ti zo so amä na bê pëpe.​—Diko 1 Timothée 5:8.

15 Nga, wali so aye ti sara mariage ayeke yeda ti sara nga ambeni nene kua. Bible asara tënë ti ambeni nzoni kode nga asarango ye so a lingbi mbeni wali aduti na ni na ngoi so lo yeke mû maboko na koli ti lo nga lo yeke bata azo ti sewa ti lo (aProverbe 31:10-31). Akoli na awali so adö terê ti sara mariage sân ti tene ala leke terê ti ala ti sara kua so a hunda na ala, ala fa so ala bi bê ti ala gï na ala wani, me ala bi bê ti ala pëpe na ye so ala lingbi ti sara ndali ti zo so ala yeke mû lo ande. Ye oko, kota ye so ahon atanga ni kue ayeke so ala so aye ti sara mariage ayeke na bezoin ti kpengba songo ti ala na Jéhovah.

16, 17. A lingbi azo so aye ti sara mariage agbu li ti ala na ndö ti amama-ndia wa ti Bible?

 16 Ti leke terê ti sara mariage ahunda nga ti gbu li na ndö ti kua so Nzapa amû na koli nga na wali na yâ ti mariage. Ti koli so ayeke Chrétien, a lingbi lo hinga ye so a ku na mbage ti lo ti duti mokonzi ti sewa. So lo yeke mokonzi aye ti tene pëpe so lo doit ti komande na ngangu. Me, a lingbi lo mû tapande ti fason so Jésus akomande na ni (aÉphésien 5:23). Legeoko nga, a lingbi wali Chrétien ahinga tënë na ndö ti pendere kua so Nzapa amû na wali na yâ ti mariage. Lo yeke duti ande nduru ti woko terê na gbe ti “ndia ti koli ti lo”? (aRomain 7:2). Lo yeke na gbe ti ndia ti Jéhovah na ti Christ awe (aGalate 6:2). Komandema ti koli ti lo na yâ ti sewa ayeke nga mbeni ndia so lo yeke wara na ndö ni. Lo lingbi ti kanga bê nga ti woko terê na gbe ti ndia ti mbeni koli so ayeke mbilimbili-kue ape? Tongana lo bâ so a yeke ngangu na lo, a yeke nzoni lo sara mariage ape.

17 Nga, a yeke nzoni koli na wali ni kue aduti nduru ti bi bê na ambilimbili bezoin ti mba. (Diko aPhilippien 2:4.) Paul atene: “A lingbi koli oko oko na popo ti ala andoye wali ti lo legeoko tongana ti so lo ndoye terê ti lo wani. Na mbage, a lingbi wali ane koli ti lo mingi.” Na gbe ti yingo ti Nzapa, Paul abâ so koli ayeke na bezoin ti hinga so wali ti lo ane lo mingi. Nga, wali ni ayeke na bezoin ti hinga so bê ti koli ti lo aye lo mingi.​—aÉphésien 5:21-33.

Na ndara, aita mingi azia mbeni zo na terê ti ala na ngoi so ala yeke gue na peko ti wali wala koli ayeke ga na peko ti ala

18. Ngbanga ti nyen la a yeke nzoni mo kanga nzara ti bê ti mo na ngoi so mo yeke gue na peko ti wali wala koli ayeke ga na peko ti mo?

18 Tongaso, ngoi so koli ayeke gue na peko ti wali ayeke gï pëpe mbeni ngoi ti sarango ngia. Me a yeke ngoi so koli na wali ni ayeke manda ti hinga terê nzoni, ti bâ wala a yeke na lege ti ndara ti tene ala sara mariage. A yeke nga mbeni ngoi ti tene ala kanga nzara ti bê ti ala mingi. So ala ye terê mingi so, ala yeke na nzara ti gbu mba tongana ti so azo so asara mariage ayeke sara ka, na a yeke na lege ni. Ye oko, ala so andoye terê biani ayeke kpe aye kue so alingbi ti sara sioni na songo so mba ti ala ni ayeke na ni na Nzapa (1 aThessalonicien 4:6). Tongana mo yeke gue na peko ti mbeni wali wala mbeni koli ayeke ga na peko ti mo, kanga nzara ti bê ti mo ngangu; so mo hinga ti kanga nzara ti bê ti mo awe alingbi ti  mû maboko na mo na yâ ti gigi ti mo kue, atâa mo sara mariage wala pëpe.

MO LINGBI TI SARA NYEN TI TENE MARIAGE TI MO ANINGA?

19, 20. A lingbi bango ndo ti Chrétien na ndö ti mariage aduti nde na ti mingi ti azo ti dunia so tongana nyen? Mû mbeni tapande ti fa ni.

19 Tongana mbeni koli na wali aye ti tene mariage ti ala aninga, a hunda na ala ti duti na nzoni bango ndö na ndö ti zendo so ala mû ti ngbâ be-ta-zo na mba. Ti bâ ni nzoni, lango so koli na wali asara mariage ayeke kongo nda ti songo so atingbi ala la pëpe, me a yeke gï tongo nda ti songo ni, so ti tene tongo nda ti mbeni songo so Jéhovah aye si angbâ lakue (Genèse 2:24). Mawa ni ayeke so laso azo mingi abâ ye ni tongaso pëpe. Na yâ ti ambeni kodro, azo ahaka sarango mariage na “kangango mbeni kamba.” Peut-être ala hinga ape so tapande so afa gï bango ndo so mingi ti azo ayeke na ni na ndö ti mariage. Ngbanga ti nyen la e tene tongaso? Kamba so a kanga ni nzoni ayeke kamba so agbu terê na ngoi kue so mo ye nga a yeke ngangu pëpe ti kanga ni wala ti zi ni hio.

20 Laso, azo mingi abâ mariage tongana mbeni ye so ayeke gï teti kete ngoi. Ala yôro go ti ala dä gï hio tongaso ngbanga ti so ala pensé atene a yeke mû lege na ala ti wara ye so ala ye; me ala ku ti tene tongana kpale alondo, hio ala fâ yâ ti mariage ni. Me, dabe ti mo na tapande so Bible amû ti fa songo so atingbi azo so asara mariage awe: ti mbeni kamba so a pe na kamba ota. Na tapande, kamba so ayeke kanga na abagara ayeke mbeni kamba so a pe ni na akamba ota ti tene aninga na afâ hio pëpe même tongana bagara ni asara ngangu mingi. Legeoko nga, a leke mariage ti tene aninga. Dabe ti mo na tënë ti Jésus so: “Ye so Nzapa abungbi na gbe ti joug oko, zia zo oko akangbi yâ ni pëpe.” (Matthieu 19:6). Tongana mo ye ti sara mariage, a yeke nzoni mo duti na oko bango ndo so. Mara ti zendo tongaso asara si mariage aga mbeni nengo kungba na li ti zo? Ên-ën.

21. A lingbi mbeni koli na wali ti lo aduti na bango ndo wa na ndö ti mba? Nyen la alingbi ti mû maboko na ala ti sara tongaso?

21 A lingbi mbeni koli na wali ti lo aduti lakue na bango ndo so ayeke na lege ni na ndö ti mba. Tongana zo oko oko asara kue ti bâ  gï anzoni sarango ye ti mba ti lo nga na ngangu so mba ti lo ni ayeke sara, mariage ni ayeke mû lege na ala ande ti wara ngia nga na dengo bê. A yeke sioni ti duti na mara ti nzoni bango ndo tongaso na ndö ti koli wala wali ti mo so ayeke mbilimbili-kue ape? Jéhovah ayeke bâ ye lakue gï na lege ni, na e yeke ku na mbage ti lo ti bâ e na nzoni lê. Mbeni wasungo psaume ahunda tënë so: “Tongana afaute la, Jah, mo yeke bâ ni, ka Jéhovah, zo wa la alingbi ti luti?” (Psaume 130:3). A ku na mbage ti koli na wali ti duti na nzoni bango ndo na ndö ti mba nga ti pardonné mba.​—Diko aColossien 3:13.

22, 23. Abraham na Sara azia nzoni tapande wa na azo so laso asara mariage awe?

 22 Tongana mbeni mariage aninga angu mingi, a lingbi ti ga na ngia na nzerengo terê mingi na azo ni. Bible asara tënë ti dutingo ti Abraham na wali ti lo Sara na ngoi so ala ga mbakoro awe. Ala tingbi lani na akpale na yâ ti gigi ti ala. Tara ti bâ tënë ti bê ti Sara, mbeni wali so ayeke lani na ngu 60 tongaso, so a lingbi lo zia pendere da ti lo so ayeke na yâ ti gbata ti Ur so mosoro ayeke dä mingi, ti gue ti lango na gbe ti atente na yâ ti tanga ti fini ti lo. Ye oko, lo woko terê na gbe ti komandema ti koli ti lo. Ndali ti so lo yeke tâ zo so alingbi biani na Abraham nga zo ti mungo maboko na lo, lo fa so lo ne Abraham biani na mungo maboko na lo si adesizion so lo mû atambela nzoni. So lo woko terê na gbe ti Abraham, a yeke gï ndali ti lê ti zo ape. Même na bê ti lo, lo iri Abraham seigneur ti lo (Genèse 18:12; 1 Pierre 3:6). Nengo so Sara ane na Abraham alondo tâ na gbe ti bê ti lo.

23 Biani, so aye ti tene pëpe so lakue tënë ti bê ti Abraham na Sara ague gï oko. Mbeni lâ, lo ye ti tene Abraham asara mbeni ye, me ye ni so ‘ason bê ti Abraham mingi.’ Ye oko, Jéhovah asara tënë na Abraham, lo sara terê ti lo kete lo mä yanga ti wali ti lo, na ye so aga na ye ti nzoni mingi na sewa ni (Genèse 21:9-13). Laso, akoli na awali, même ala so asara mariage aninga mingi awe, alingbi ti manda ye na lege ti tapande ti Abraham na Sara so aye Nzapa mingi.

24. Mara ti amariage wa la amû gonda na Jéhovah Nzapa?

24 Na yâ ti bungbi, a yeke wara akoli na awali saki na saki so ayeke na ngia mingi na yâ ti mariage ti ala: mariage so na yâ ni wali ni ane koli ti lo mingi, koli ni andoye wali ti lo mingi na ane lo, na ala use kue ayeke sara kua maboko na maboko ti tene ala zia ye so bê ti Jéhovah aye na kozo ndo na yâ ti fini ti ala. Tongana mo mû desizion ti sara mariage, soro koli wala wali ni na lege ti ndara, leke terê ti mo nzoni ndali ti mariage nga sara kue ti tene a duti mbeni mariage so siriri na ndoye ayeke dä na so amû gonda na Jéhovah Nzapa. Tongana mariage ti mo ayeke tongaso, a yeke mû maboko na mo biani ti ngbâ na yâ ti ndoye ti Nzapa.

^ par. 11chapitre 2 ti mbeti Lingu ti Tâ Ngia ti Sewa, so aTémoin ti Jéhovah asigi na ni.

^ par. 12 Giriri, ambeni wakua ti Jéhovah so ayeke be-ta-zo ayeke lani na awali mingi. Na ngoi so Jéhovah angbâ lani na songo na awakua ti lo so, même na ngoi ti azo ti Israël, lo ke na ala pëpe ti mû awali mingi. Lo la lo sigi na tënë ti mungo awali mingi so ape, me lo lu andia na ndö ni. Ye oko, aChrétien ahinga so Jéhovah azia lege mbeni pëpe na awakua ti lo ti mû awali mingi.​—Matthieu 19:9; 1 Timothée 3:2.

TI HINGA AMBENI TËNË

TOUR TI BA NDO (TI MANDANGO NI)

Sara si mariage ti mo akpengba nga ayeke na ngia

Sara aye oku, so ayeke sara si mariage ti mo akpengba nga ayeke na ngia.