Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

“Zia ala ngbâ na yâ ti ndoye ti Nzapa”

 CHAPITRE 10

Mariage: matabisi so alondo na Nzapa so aye e mingi

Mariage: matabisi so alondo na Nzapa so aye e mingi

“Kamba so zo asara na kamba ota alingbi fâ fade pëpe.”—ZO-TI-FA-TENE 4:12.

1, 2. (a) Tongana koli na wali amû tere fini fini, ngoi na ngoi atënë wa e lingbi ti hunda na tere ti e? Ngbanga ti nyen? (b) Ahundango ndo wa e yeke bâ kiringo tënë na ni na yâ ti chapitre so?

MO YE mingi ti gue na matanga ti mariage? Azo mingi aye ti gue, teti angoi tongaso alingbi ti sara si ala duti na ngia mingi. Na ngoi ni, mo yeke bâ so koli na wali ni ayü bongo pendere. Me mingi ahon so, e lingbi ti bâ so lê ti ala ayeke gi na ngia. Na lango ni so, pembe ti ala kue ayeke gi na gigi, na ala bâ so gigi ti ala ayeke duti ande gi nzoni.

2 Ye oko, na yâ ti aye mingi, yâ ti mariage ti azo aga laso butuma. Atâa so e ye ti tene ye ni kue atambela nzoni ndali ti ala so amû tere fini fini, ngoi na ngoi e lingbi ti hunda tere ti e: ‘Ala yeke duti ande na ngia na yâ ti mariage ni so la? Mungo tere ti ala ni ayeke ti lango oke?’ A yeke lege so koli na wali ni ayeke zia bê ti ala kue na awango ti Nzapa na ndo ti mariage nga lege so ala yeke bata na awango ni si ayeke mû lege ti kiri tënë na ahundango ndo so. (Diko aProverbe 3:5, 6.) A lingbi ala sara tongaso ti tene ala ngbâ na yâ ti ndoye ti Nzapa. Ni la, zia e bâ kiringo tënë so Bible amû na ahundango ndo osio so: Ngbanga ti nyen ti sara mariage? Tongana mo ye ti sara mariage, a lingbi mo soro zo wa? Mo lingbi ti leke tere ti mo tongana nyen? Nga, nyen la alingbi ti mû maboko na koli na wali ti duti na ngia lakue na yâ ti mariage ti ala?

NGBANGA TI NYEN TI SARA MARIAGE?

3. Ngbanga ti nyen a yeke na lege ti ndara pëpe ti sara mariage gi ndali ti asenge senge raison?

3 Ambeni zo atene ti ala so ti duti na ngia, a lingbi mo sara  mariage si, na tongana zo amû koli wala wali pëpe lo lingbi ti wara tâ ngia na yâ ti fini ti lo pëpe. Tënë so ayeke tâ tënë oko pëpe! Jésus, so angbâ lani kumbamba, atene so dutingo kumbamba ayeke mbeni matabisi, na lo wa ala so alingbi ti ngbâ kumbamba ti yeda na ni (Matthieu 19:11, 12). Bazengele Paul nga kue afa ambeni ye ti nzoni so zo alingbi ti wara tongana lo ngbâ kumbamba (1 aCorinthien 7:32-38). Me Jésus na Paul alu pëpe mbeni ndia na ndo ti tënë so, ti tene so a lingbi zo angbâ gi kumbamba na yâ ti gigi ti lo kue. Ti tâ tënë ni, ti “ke na azo ti sara mariage” ayeke na popo ti “afango ye ti asioni yingo.” (1 Timothée 4:1-3). Ye oko, ti zo so aye ti sara na Jéhovah na ziango si mbeni ye agboto lê ti lo pëpe, dutingo kumbamba alingbi ti ga na lo ye ti nzoni mingi. Tongaso, a yeke na lege ti ndara pëpe ti tene mbeni zo ayeda ti sara mariage gi ndali ti asenge senge raison, na tapande ndali ti so amba ti lo si apusu lo ti sara ni.

4. Nzoni mariage ayeke zia gere ti gigi ti kekereke wa ndali ti amolenge so ayeke kono?

4 Nga, anzoni raison ayeke dä ti tene zo asara mariage? En! Mariage nga kue ayeke mbeni matabisi so alondo na Nzapa ti e so aye e mingi. (Diko Genèse 2:18.) Tongaso, sarango mariage ayeke ga na zo ambeni ye ti nzoni na a lingbi ti zi lege na zo ti duti na ngia. Na tapande, nzoni mariage ayeke tâ nzoni gere ti sewa so ngia ayeke duti dä. Amolenge ayeke na bezoin ti kono na yâ ti mbeni sewa so aduti nzoni, so ababâ na amama ni ayeke bata ala, ayeke ndoye ala, ayeke se ala nga ayeke fa lege na ala nzoni (Psaume 127:3; aÉphésien 6:1-4). Ye oko, batango amolenge ayeke pëpe gi oko raison ti sara mariage.

5, 6. (a) Na Zo-ti-fa-tene 4:9-12, ambeni nzoni ye so kota songo so ayeke na popo ti azo use ayeke ga na ni ayeke so wa? (b) Na lege wa mariage ayeke tongana mbeni kamba so a sara ni na kamba ota?

5 Zia e bâ versê so a zia na tongo nda ti chapitre so nga na atënë so angoro ni: “Azo use ayeke nzoni ahon zo oko, teti ala yeke na futa nzoni teti kusala ti ala. Teti tongana oko atï, fade mbeni ayä ita ti lo na nduzu; me vundu ayeke na lo so atï, na mbeni zo ayeke na tere ti lo pëpe ti yä lo na nduzu. Wala, tongana azo use alango na ndo oko, ka tere ti ala amû wâ; me  tere ti zo oko alingbi mû wâ tongana nyen? Tongana mbeni zo ahon ndo ti zo so ayeke gi oko, fade azo use ahon lo na ngangu. Kamba so zo asara na kamba ota alingbi fâ fade pëpe.”—Zo-ti-fa-tene 4:9-12.

6 Aversê so andu kozoni kue songo so ayeke na popo ti akamarade. Biani, mariage ayeke nga mbeni kota songo na popo ti azo use. Tongana ti so aversê so afa, songo so atingbi mbeni koli na wali ti lo ayeke mû lege na zo oko oko ti mû maboko na mba, ti dë bê ti mba nga ti bata mba. Me mariage ayeke kpengba nzoni mingi tongana a ngbâ gi pëpe na songo so ayeke na popo ti azo use. Versê 12 aye nga ti fa so kamba so zo asara na kamba use alingbi ti fâ. Me ti kamba so a sara na kamba ota, a yeke duti ngangu mingi ti fâ yâ ni. Tongana mbeni koli na wali ti lo agi kozoni kue ti nzere na bê ti Jéhovah, mariage ti ala ayeke duti tongana kamba so a sara ni na kamba ota. Teti so Jéhovah ayeke na kozo ndo na yâ ti mariage ni, mariage ni ayeke kpengba mingi.

7, 8. (a) Wango wa Paul amû na aChrétien so angbâ kumbamba si ayeke tiri na anzara ti tere ti ala? (b) Bango ndo wa so ayeke na lege ni Bible awa e ti duti na ni na ndo ti mariage?

7 A yeke gi na yâ ti mariage si a mû lege na koli na wali ti wara ngia na lege ti bungbingo tere. Na yâ ti mariage, a bâ tâ na lege ni bungbingo koli na wali tongana mbeni ye so amû ngia na zo (aProverbe 5:18). Atâa tongana mbeni kumbamba “[a]kpengba koli wala wali awe,” so ti tene lo hon ngoi so nzara ti tere ti lo ayeke mingi, a lingbi ti si so lo ngbâ ti tiri na anzara ti tere ti lo ti bungbingo koli na wali. Tongana lo hon ndo ti nzara ti tere ti lo ni pëpe, a lingbi ti gue na lo ti sara mbeni sioni ye wala mbeni ye so ayeke na lege ni pëpe. Yingo vulu apusu lani Paul ti mû wango so na akumbamba: “Tongana ala lingbi ti hon ndo ti nzara ti bê ti ala pëpe, zia ala sara mariage, teti a yeke nzoni mingi ti sara mariage ahon ti tene nzara ti tere ti ala ahon ndo ti ala.”—1 aCorinthien 7:9, 36; Jacques 1:15.

8 Atâa raison wa si apusu mbeni zo ti sara mariage, a yeke nzoni lo bâ ye na lege ni. Tongana ti so Paul atene, ala so ayeke sara mariage “ayeke wara aye ti vundu na yâ ti mitele ti ala.”  (1 aCorinthien 7:28). Ala so asara mariage awe ayeke tingbi na akpale so ala so angbâ kumbamba ayeke wara ni pëpe. Atâa so kue, tongana mo soro ti sara mariage, mo lingbi ti sara nyen ti wara kpale mingi pëpe me ti wara gbâ ti aye ti nzoni? Mbeni ye ni oko ayeke ti soro wali wala koli ti mo na lege ti ndara.

ZO WA LA MO LINGBI TI SORO TI MÛ LO?

9, 10. (a) Paul amû tapande wa ti fa kpale so ayeke ga tongana zo abungbi oko na mbeni zo so amä na bê pëpe? (b) Mingi ni, ye wa ayeke si tongana mbeni ita ake ti mä wango ti Nzapa so ahunda ti sara mariage gi na yâ ti Seigneur?

9 Yingo vulu apusu Paul ti sû na mbeti mbeni kpengba-ndia so alingbi zo abata ni tongana lo ye ti soro mbeni zo ti mû na mariage; lo tene: “Ala bungbi oko pëpe na azo so amä na bê pëpe na gbe ti joug oko.” (2 aCorinthien 6:14). Tapande so lo fa ni aluti na ndo ti mbeni ye so azo ti fango yaka ahinga ni nzoni. Tongana zo amû anyama so konongo nga ngangu ti ala ayeke legeoko pëpe si lo bungbi ala na gbe ti joug oko, ala use kue ayeke bâ pasi. Legeoko nga, tongana mbeni ita abungbi oko na gbe ti joug ti mariage na mbeni zo so amä na bê pëpe, ala use kue ayeke bâ pasi. Tongana oko aye ti lo ti ngbâ na yâ ti ndoye ti Jéhovah me mba ti lo ni asara gi sanka, aye so ala leke ti sara na yâ ti gigi ti ala ayeke gue nde nde na mingi ni vundu ayeke ga na pekoni. Ni la si Paul awa aChrétien ti sara mariage “gi na yâ ti Seigneur.”—1 aCorinthien 7:39.

10 A lingbi ti si so ambeni Chrétien so ayeke kumbamba atene so a yeke nzoni ani duti na gbe ti joug oko na mbeni zo so amä na bê pëpe ahon ti ngbâ ti duti gi ani oko. Ni la, ambeni ayeke mû desizion ti dö wango ti Bible so ti zia na ti sara mariage na mbeni zo so avoro Jéhovah pëpe. Ye ti pekoni ayeke gi vundu na vundu. Aita tongaso aga ti bâ so ala sara mariage na mbeni zo so ala na lo alingbi pëpe ti sara lisoro na ndo ti aye so ayeke kota mingi na yâ ti gigi ti zo. Dutingo oko ti so ni so alingbi ti son mingi ahon ti so lani lo yeke na ni kozo na mariage ni. Me ye ti nzoni ni ayeke so mo yeke wara aita mingi so ade kumbamba na so azia bê ti ala na ndia ti Nzapa, nga so angbâ ti bata wango ti lo so lakue. (Diko Psaume 32:8.) Atâa so ala yeke na  beku ti sara mariage mbeni lâ, ala yeda ti ngbâ kumbamba juska na lango so ala yeke wara mbeni wali wala koli na popo ti awakua ti Jéhovah Nzapa.

11. Nyen la alingbi ti mû maboko na mo ti soro mbeni koli wala wali na lege ti ndara? (Bâ nga encadré “ Nyen la mbi yeke gi ti bâ na mbage ti zo so mbi ye ti mû lo?”)

11 Biani, a yeke gi pëpe ngbanga ti so mbeni zo ayeke wakua ti Jéhovah si lo yeke nzoni wali wala koli ti mû lo na mariage. Tongana mo ye ti sara mariage, gi ti wara mbeni ita so sarango ye ti mo na ti lo amä tere, so aye so ala zia na gbele ala na lege ti yingo ayeke oko nga so lo ndoye Nzapa tongana ti mo. Ngbâa be-ta-zo asigigi na ambeti mingi na ndo ti tënë so; a yeke nzoni mo gbu li ti mo na ndo ti awango ti Bible so ayeke na yâ ni na mo sambela na ndo ni, nga mo zia si a fa lege na mo na ngoi so mo ye ti mû kota desizion so. *Diko Psaume 119:105.

12. Na ndo ti tënë ti mariage, ngobo ti ambeni kodoro mingi ahunda ti sara nyen? Tapande wa ti Bible alingbi ti mû maboko na zo na ndo ti tënë so?

12 Na yâ ti akodoro mingi, ngobo ti ndo ni ahunda na ababâ na amama ti soro mbeni wali wala koli ndali ti molenge ti ala. Na yâ ti akodoro ni so, mingi ni a bâ so ababâ na amama si ayeke na kota ndara nga na hingango ndo so a hunda ni ti mû mara ti desizion tongaso na place ti amolenge ti ala. Mingi ti amariage tongaso ague nzoni, tongana ti ngoi ti awakua ti Jéhovah ti ândö. Tapande ti Abraham so atokua wakua ti lo ti mû mbeni wali ndali ti Isaac alingbi ti mû maboko mingi na ababâ na amama ti laso, so aye ti soro mbeni wali wala koli ndali ti amolenge ti ala. Ye so agbu lani bê ti Abraham ayeke pëpe mosoro wala kota ndo so wali ni ayeke na ni. Me Abraham asara kue ti tene wali so lo ye ti mû lo ndali ti Isaac aduti na popo ti azo so avoro Jéhovah. *Genèse 24:3, 67.

 MO LINGBI TI LEKE TERE TI MO TONGANA NYEN?

13-15. (a) Wango so ayeke na aProverbe 24:27 alingbi ti mû maboko na mbeni maseka-koli so aye ti sara mariage tongana nyen? (b) Mbeni maseka-wali alingbi ti sara nyen ti leke tere ti lo ti sara mariage?

13 Tongana mo ye biani ti sara mariage, a yeke nzoni mo hunda tere ti mo na tënë so: ‘Mbi lingbi awe?’ Kiringo tënë ni abâ gi pëpe atënë ti bê ti mo na ndo ti tënë ti ndoye, ti bungbingo koli na wali, ti warango mbeni zo ti duti na tere ti mo wala ti batango amolenge. Me a lingbi koli wala wali so aye ti sara mariage agbu li ti lo na ndo ti akusala so a hunda ande na lo ti sara na peko ti mariage ni.

14 Ti mbeni maseka-koli so aye ti mû wali, a lingbi lo gbu li ti lo na ndo ti kpengba-ndia so: “Mo leke kusala ti mo so ayeke na gigi, mo sara yaka ti mo alingbi na mo, na nda ni, mo sara da ti mo.” (aProverbe 24:27). Ye so aye ti tene nyen? Giriri, tongana mbeni koli aye ti “sara da ti [lo]”, so ti tene ti mû wali na ti dü amolenge, a lingbi lo hunda tere ti lo: ‘Mbi lingbi awe ti bata wali nga amolenge so e yeke dü ni ande?’ Kozoni kue, a lingbi koli ni asara kua ngangu, lo fâ yaka. Kpengba-ndia so abâ e nga laso. Tongana mbeni koli aye ti mû wali, a lingbi lo leke tere ti lo kozoni kue ndali ti kusala so a yeke ku lo. Tongana lo ngbâ na ngangu, a lingbi lo sara kua. Bible afa so koli so abâ lege ti azo ti sewa ti lo pëpe na mungo na ala aye ti mitele, na fango na ala so lo ye ala, nga na mungo na ala aye ti yingo, sioni ti lo ahon ti zo so amä na bê pëpe.—Diko 1 Timothée 5:8.

15 Nga, wali so aye ti sara mariage ayeke yeda ti sara nga ambeni nene kusala. Bible agonda ambeni kode na ambeni sarango ye so a lingbi mbeni wali aduti na ni na ngoi so lo yeke mû maboko na koli ti lo nga lo yeke bata azo ti sewa ti lo (aProverbe 31:10-31). Akoli na awali so adö tere ti sara mariage sân ti tene ala leke tere ti ala ti sara kusala so a hunda na ala, ala fa so ala bi bê ti ala gi na ala wani, me ala bi bê ti ala pëpe na ye so ala lingbi ti sara ndali ti zo so ala yeke mû lo ande. Ye oko, kota ye so ahon atanga ni kue ayeke so ala so aye ti sara mariage ayeke na bezoin ti leke tere ti ala na lege ti yingo.

16, 17. A lingbi azo so aye ti sara mariage agbu li ti ala na ndo ti akpengba-ndia wa ti Bible?

 16 Ti leke tere ti sara mariage a hunda nga ti gbu li na ndo ti kusala so Nzapa amû na koli nga na wali na yâ ti mariage. Ti koli so ayeke Chrétien, a lingbi lo hinga ye so a ku na mbage ti lo ti duti mokonzi ti sewa. Dutingo ti lo tongana mokonzi azi lege na lo pëpe ti komande na ngangu. Me, a lingbi lo haka lege so Jésus akomande na ni (aÉphésien 5:23). Legeoko nga, a lingbi wali Chrétien ahinga tënë na ndo ti pendere kusala so Nzapa amû na wali na yâ ti mariage. Lo yeke duti ande nduru ti woko tere na gbe ti “ndia ti koli ti lo”? (aRomain 7:2). Lo yeke na gbe ti ndia ti Jéhovah na ti Christ awe (aGalate 6:2). Komandema ti koli ti lo na yâ ti sewa ayeke nga mbeni ndia so lo yeke wara na ndo ni. Lo lingbi ti kanga bê nga ti woko tere na gbe ti ndia ti mbeni koli so ayeke wasiokpari? Tongana lo bâ so a yeke ngangu na lo, a yeke nzoni lo sara mariage pëpe.

17 Nga, a yeke nzoni koli na wali ni kue aduti nduru ti bi bê na aye so andu mba ti ala. (Diko aPhilippien 2:4.) Paul atene: “Zia koli oko oko na popo ti ala andoye wali ti lo legeoko tongana ti so lo ndoye tere ti lo wani. Na mbage, a lingbi wali ane koli ti lo mingi.” Na gbe ti yingo ti Nzapa, Paul abâ so koli ayeke na bezoin ti hinga so wali ti lo ane lo mingi. Nga, wali ni ayeke na bezoin ti hinga so bê ti koli ti lo aye lo mingi.—aÉphésien 5:21-33.

Aita mingi azia mbeni zo na tere ti ala na ngoi so ala ayeke gue na peko ti wali wala koli ayeke ga na peko ti ala

18. Ngbanga ti nyen a yeke nzoni mo kanga nzara ti bê na ngoi so mo yeke gue na peko ti wali wala koli ayeke ga na peko ti mo?

18 Tongaso, ngoi so koli ayeke gue na peko ti wali ayeke gi pëpe mbeni ngoi ti sarango ngia senge. Me a yeke ngoi so koli na wali ni ayeke manda ti hinga tere nzoni, ti bâ wala a yeke na lege ti ndara ti tene ala sara mariage. A yeke nga mbeni ngoi ti tene ala kanga nzara ti bê ti ala mingi. So ala ye tere mingi so, ala yeke na nzara ti gbu mba tongana ti so azo so asara mariage ayeke sara ka, na a yeke na lege ni. Ye oko, ala so andoye tere biani ayeke kpe aye kue so alingbi ti sara sioni na songo so mba ti ala ni ayeke na ni na Nzapa (1 aThessalonicien 4:6). Tongana mo yeke gue na peko ti mbeni wali wala mbeni koli ayeke ga na peko ti mo, kanga nzara ti bê ti mo ngangu; so mo hinga ti  kanga nzara ti bê ti mo awe alingbi ti mû maboko na mo na yâ ti gigi ti mo kue, atâa mo sara mariage wala pëpe.

MO LINGBI TI SARA NYEN SI MARIAGE TI MO ANINGA?

19, 20. A lingbi bango ndo ti Chrétien na ndo ti mariage aduti nde na ti mingi ti azo ti dunia so tongana nyen? Mû mbeni tapande ti fa ni.

19 Tongana mbeni koli na wali aye si mariage ti ala aninga, a hunda na ala ti duti na nzoni bango ndo na ndo ti zendo so ala mû ti ngbâ be-ta-zo na mba. Ti bâ ni nzoni, lango so koli na wali asara mariage ayeke kongo nda ti songo so atingbi ala la pëpe, me a yeke gi tongo nda ti songo ni, so ti tene tongo nda ti mbeni songo so Jéhovah aye si a ngbâ lakue (Genèse 2:24). Mawa ni ayeke so laso azo mingi abâ ye ni tongaso pëpe. Na yâ ti ambeni kodoro, azo ahaka sarango mariage na “kangango mbeni kamba.” Peut-être ala hinga pëpe so tapande so afa gi bango ndo so mingi ti azo ayeke na ni na ndo ti mariage. Ngbanga ti nyen e tene tongaso? Kamba so a kanga ni nzoni ayeke kamba so agbu tere na ngoi kue so mo ye nga a yeke ngangu pëpe ti kanga ni wala ti zi ni hio.

20 Laso, azo mingi abâ mariage tongana mbeni ye so ayeke gi teti kete ngoi. Ala yôro go ti ala dä gi hio tongaso ngbanga ti so ala bi bê ti ala atene a yeke mû lege na ala ti wara ye so ala ye; me ala ku ti tene tongana kpale alondo, hio ala fâ yâ ti mariage ni. Me, dabe ti mo na tapande so Bible amû ti fa songo so atingbi azo so asara mariage awe: ti mbeni kamba so a sara na kamba ota. Na tapande, kamba so ayeke kanga na abagara ayeke mbeni kamba so a pe ni na akamba ota ti tene a ninga na a fâ hio pëpe même tongana bagara ni asara ngangu mingi. Legeoko nga, a leke mariage ti tene a ninga. Dabe ti mo na tënë ti Jésus so: “Ye so Nzapa abungbi ni na gbe ti joug oko, zia mbeni zo akangbi yâ ni pëpe.” (Matthieu 19:6). Tongana mo ye ti sara mariage, a yeke nzoni mo duti na oko bango ndo so. Mara ti zendo tongaso asara si mariage aga mbeni nengo kungba na li ti zo? Ên-ën.

21. A lingbi mbeni koli na wali ti lo aduti na bango ndo wa na ndo ti mba? Nyen la alingbi ti mû maboko na ala ti sara tongaso?

21 A lingbi mbeni koli na wali ti lo aduti lakue na bango ndo so  ayeke na lege ni na ndo ti mba. Tongana zo oko oko asara kue ti bâ gi anzoni sarango ye ti mba ti lo nga na ngangu so mba ti lo ni ayeke sara, fade mariage ni ayeke mû lege na ala ti wara ngia nga na dengo bê. A yeke sioni ti duti na mara ti bango ndo tongaso na ndo ti koli wala wali ti mo so ayeke wasiokpari? Jéhovah ayeke bâ ye lakue gi na lege ni, na e yeke ku na mbage ti lo ti bâ e na nzoni lê. Mbeni wasungo psaume ahunda tënë so: “O L’Eternel, tongana Mo bata tënë ti sioye, O Seigneur, ka zo nyen alingbi ti ngbâ?” (Psaume 130:3). A ku na mbage ti koli na wali ti duti na nzoni bango ndo na ndo ti mba nga ti pardone mba.—Diko aColossien 3:13.

22, 23. Abraham na Sara azia nzoni tapande wa teti azo so laso asara mariage awe?

 22 Tongana mbeni mariage ayeke ninga angu mingi, a lingbi ti ga na ngia na nzerengo tere mingi na azo ni. Bible asara tënë ti dutingo ti Abraham na wali ti lo Sara na ngoi so ala ga mbakoro awe. Akpale amanke lani na yâ ti gigi ti ala pëpe. Tara ti bâ tënë ti bê ti Sara, mbeni wali so ayeke lani na ngu 60 tongaso, so a lingbi lo zia pendere da ti lo so ayeke na yâ ti gbata ti Ur so mosoro ayeke dä mingi, ti gue ti lango na gbe ti atente na tanga ti fini ti lo. Ye oko, lo woko tere na gbe ti komandema ti koli ti lo. Teti so lo yeke tâ zo so alingbi biani na Abraham nga zo ti mungo maboko na lo, lo fa so lo ne Abraham biani na mungo maboko na lo si adesizion so lo mû atambela nzoni. So lo woko tere na gbe ti Abraham, a yeke gi teti lê ti zo pëpe. Même “na yâ lo mveni” lo iri Abraham seigneur ti lo (Genèse 18:12; 1 Pierre 3:6). Nengo so Sara ane na Abraham alondo tâ na gbe ti bê ti lo.

23 Biani, so aye ti tene pëpe so lakue tënë ti bê ti Abraham na Sara ayeke gue gi oko. Mbeni lâ, lo ye ti tene Abraham asara mbeni ye, me ye ni so ‘ason bê ti Abraham mingi’. Ye oko, Jéhovah asara tënë na Abraham, si na tâ be-ti-molenge Abraham amä yanga ti wali ti lo, na ye so aga na ye ti nzoni mingi na sewa ni (Genèse 21:9-13, Tene ti Nzapa, Kozo Mbouki). Laso, akoli na awali, même ala so asara mariage a ninga mingi awe, alingbi ti manda ye na lege ti tapande ti Abraham na Sara so aye Nzapa mingi.

24. Mara ti amariage wa si amû gonda na Jéhovah Nzapa?

24 Na yâ ti bungbi, a yeke wara akoli na awali saki na saki so ayeke na ngia mingi na yâ ti mariage ti ala: mariage so na yâ ni wali ni ane koli ti lo mingi, koli ni andoye wali ti lo mingi na ane lo, na ala use kue ayeke sara kua maboko na maboko ti tene ala zia ye so bê ti Jéhovah aye na kozo ndo na yâ ti fini ti ala. Tongana mo mû desizion ti sara mariage, soro koli wala wali ni na lege ti ndara, leke tere ti mo nzoni ndali ti mariage nga sara kue ti tene a duti mbeni mariage so siriri na ndoye ayeke dä na so amû gonda na Jéhovah Nzapa. Tongana mariage ti mo ayeke tongaso, fade a yeke mû maboko na mo biani ti ngbâ na yâ ti ndoye ti Nzapa.

^ par. 11Chapitre 2 ti buku Lingu ti Tâ Ngia ti Sewa, so aTémoin ti Jéhovah asigigi na ni.

^ par. 12 Giriri ambeni wakua ti Jéhovah so ayeke be-ta-zo ayeke lani na awali mingi. Na ngoi so Jéhovah angbâ lani na songo na awakua ti lo so, même na ngoi ti azo ti Israël, lo ke na ala pëpe ti mû awali mingi. Lo la lo sigigi na tënë ti mungo awali mingi so pëpe, me lo lu andia na ndo ni. Ye oko, aChrétien ahinga so Jéhovah azia lege mbeni pëpe na awakua ti lo ti mû awali mingi.—Matthieu 19:9; 1 Timothée 3:2.

TI HINGA AMBENI TËNË

Sara si mariage ti mo akpengba nga ayeke na ngia

Sara aye oku, so ayeke sara si mariage ti mo akpengba nga ayeke na ngia.