Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

“Zia ala ngbâ na yâ ti ndoye ti Nzapa”

 AMBENI TËNË

Lekengo tënë so alondo ndali ti dengo buze

Lekengo tënë so alondo ndali ti dengo buze

Na 1 aCorinthien 6:1-8, bazengele Paul asara tënë ti aita so ayeke gue na mba na gbele ngbanga. Lo fa vundu ti bê ti lo ndali ti so ambeni Chrétien ti Corinthe “[a]yeke gue tâ na [tënë ti ala] na gbe ti azo so ayeke mbilimbili pëpe”. (Versê 1) Paul afa akota raison so ndali ni a lingbi Chrétien ague na mba ti lo Chrétien na gbele ngbanga ti azo ti dunia so pëpe, me lo gi ti leke tënë ni na yâ ti congrégation. Zia e bâ ambeni raison so apusu Paul ti mû wango so nga na pekoni e yeke bâ ande ambeni ye so peut-être wango ti lo andu ni pëpe.

Tongana tënë alondo na popo ti e na mbeni ita ndali ti dengo buze, kozoni kue e yeke gi ti leke tënë ni tongana ti so Jéhovah aye, me pëpe tongana ti so bê ti e aye (aProverbe 14:12). Tongana ti so Jésus afa, a yeke nzoni ti leke ni hio kozoni si a ga kota tënë (Matthieu 5:23-26). Mawa ni ayeke so ambeni ita apapa ngangu, même ala gue na tënë ni na gbele ada-ngbanga ti dunia so. Paul atene: “So ala yeke gue na mba na gbele ngbanga afa so ala tï biani awe.” Ngbanga ti nyen? Mbeni kota raison ni ayeke so sarango tongaso alingbi ti pusu azo ti sara sioni tënë ti congrégation nga na ti Nzapa so e yeke voro lo. Ni la, e yeke gbu li ti e na ndö ti tënë so Paul ahunda so: “Ngbanga ti nyen ala zia pëpe si a sara sioni na ala?”—Versê 7.

Paul afa nga so Nzapa azia na yâ ti congrégation mbeni pendere lege ti leke na akpale mingi na popo ti aita. A-ancien ayeke aita-koli so hingango ye ti ala na ndö ti atâ tënë ti Bible asara si ala yeke na ndara mingi, na Paul atene so tongana a ndu “atënë ti gigi so” ala yeke azo “so alingbi . . . ti fâ ngbanga ti mbeni tënë na popo ti aita”. (Versê 3-5) Jésus afa so tongana tënë alondo na ndö ti akota faute tongana pango zo nga na sarango ye ti likisi, a lingbi a leke ni na lege ti aye ota so: kozoni, sara kue ti leke tënë ni gï na popo ti mo na azo so tënë ni abâ ala; use ni, tongana kozo ye ni so atï na ngu, mû na terê ti mo zo oko wala use so ayeke témoin ti tënë ni; na ota ni, tongana aye so kue atï na ngu, gue na tënë ni na gbele congrégation, so ti tene a-ancien.—Matthieu 18:15-17.

 Mingi ni, a-ancien ayeke awagbungo koko wala akota wadengo buze pëpe, na kua ti ala ti ancien ayeke pëpe ti mû awango na ndö ti andia ti kodro wala na ndö ti dengo buze. Ala yeke fa pëpe na aita ni anzene nzene ye so a lingbi ala sara ti leke tënë ti dengo buze so alondo na popo ti ala. Me ala yeke gi ti mû maboko na aita so tënë ayeke na popo ti ala ti sara ye alingbi na ye so Bible afa, nga ti mä terê na yâ ti siriri. Tongana kpale ni ayeke ngangu, na a-ancien ahinga ye ti sara pëpe, ala lingbi ti bâ surveillant ti circonscription wala filiale ti aTémoin ti Jéhovah ti kodro ni. Me ambeni ye ayeke dä so peut-être wango ti Paul andu ni pëpe. Ambeni ayeke so wa?

A lingbi ti si so ambeni ita ague na mba na gbele ngbanga, me na sioni bê pëpe, ndali ti so a yeke gï lege so ndia ti kodro afa ti leke na mbeni tënë na yâ ti siriri. Na tapande, a lingbi ti hunda gï ti gue na gbele ngbanga tongana zo aye ti wara mbeti ti divorce, ti wara droit ti batango molenge, ti fa wungo ti nginza so a lingbi wali wala koli amû na mba ti lo ti bata na molenge, ti wara assurance ti kanga na lê ti mbeni kpale so asi na lo, ti duti na popo ti azo so ayeke na droit ti wara mbeni nginza na peko ti tingo ti mbeni buze, na ti fa so mbeni testament ayeke na lege ni. Ambeni ye ni nga ayeke dä so mbeni ita alingbi ti bâ so a lingbi lo nga lo gue na mbeni ita na gbele ngbanga ti tene lo bata adroit ti lo. *

Tongana aita ni ague na mba ti ala na gbele ngbanga na sioni bê pëpe, peut-être ala gue nde pëpe na tënë so ayeke na peko ti wango ti Paul so. * Ye oko, a lingbi ye so agbu bê ti Chrétien ayeke ti sara si iri ti Jéhovah aga nzoni-kue nga ti sara si siriri nga na beoko aduti na yâ ti congrégation. Kozo ye so a hinga na adisciple ti Christ ayeke ndoye, na ndoye “[a]gi gï aye so anzere na lo pëpe”.—1 aCorinthien 13:4, 5; Jean 13:34, 35.

^ par. 2 Ti ambeni ye ni so ayeke si hio hio ape ayeke so mbeni Chrétien alingbi ti sara mbeni ye ti sioni na mba ti lo, ye so ndia ti kodro ni afâ ngbanga na ndö ni ngangu: na tapande, gbungo wali na ngangu ti lango na lo, sarango ye ti ngangu na terê ti zo, fango zo wala kota nzi. Ti aye tongaso, a yeke duti sioni pëpe tongana mbeni ita ague na tënë ni na gbele azo ti komande, atâa so sarango tongaso alingbi ti sara si tënë ni ague na gbele ngbanga.

^ par. 3 Ti hinga ambeni tënë mingi na ndö ti atënë so, bâ Tour ti Ba Ndo ti lango 1 ti avril 1997, lembeti 14-19, nga ti lango 15 ti octobre 1991, lembeti 25-28, na Français.