Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

“Zia ala ngbâ na yâ ti ndoye ti Nzapa”

 CHAPITRE 17

“Ala kpengba na ndo ti mabe ti ala so ayeke nzoni ahon tanga ti aye kue”

“Ala kpengba na ndo ti mabe ti ala so ayeke nzoni ahon tanga ti aye kue”

“Tongana ala yeke kpengba na ndo ti mabe ti ala so ayeke nzoni ahon tanga ti aye kue, . . . zia ala ngbâ na yâ ti ndoye ti Nzapa.”—JUDE 20, 21.

1, 2. Kua ti lekengo da wa mo yeke sara ni? Ngbanga ti nyen lege so mo yeke sara na kua ni ayeke kota ye mingi?

BÂ SO mo yeke sara kua ngangu ti leke mbeni da. Kua ni ato nda ni a sara ngoi kete awe, me a ngbâ angu mingi ti tene da ni ahunzi. Juska fadeso kua ni ayeke ngangu me a nzere na bê ti mo. Atâa nyen la asi, mo leke na bê ti mo kue ti dö kua ni ti zia pëpe, ngbanga ti so tënë ti fini ti mo, même gigi ti mo ti kekereke, abâ lege so mo yeke sara na kua ni. Ngbanga ti nyen? Ngbanga ti so da ni so mo yeke leke ni so ayeke gi mo wani!

2 Disciple Jude afa so a yeke ti e ti kpengba e wani. Tongana lo wa aChrétien ti “ngbâ na yâ ti ndoye ti Nzapa”, lo fa nga tongana nyen ti sara ni, lo tene: “Tongana ala yeke kpengba na ndo ti mabe ti ala so ayeke nzoni ahon tanga ti aye kue.” (Jude 20, 21). Ambeni lege so mo lingbi ti sara si mo kpengba mo wani, wala ti sara si mabe ti mo aluti ngangu si mo ngbâ na yâ ti ndoye ti Nzapa, ayeke so wa? Zia e bâ aye ota so andu kua ti lekengo da ti yingo so ayeke na gbele mo.

NGBÂ TI KPENGBA MABE TI MO NA YÂ TI ANDIA TI JÉHOVAH

3-5. (a) Satan aye ti handa e si e bâ andia ti Jéhovah tongana nyen? (b) Ti e, a lingbi e bâ andia ti Nzapa tongana nyen? Bango ndo so alingbi ti sara si e duti tongana nyen? Mû mbeni tapande.

3 Kozoni kue, a lingbi e kpengba mabe ti e na yâ ti andia ti  Nzapa. Na mandango buku so, mo manda ye na ndo ti andia ti Jéhovah mingi so andu sarango ye ti mo. Mo bâ ti mo andia so tongana nyen? Satan aye ti handa mo ti bâ so andia ti Jéhovah na akpengba-ndia ti lo ayeke kanga lege na mo mingi nga ayeke ngangu mingi. Ngbene ye so kode so atambela nzoni na yaka ti Éden, Satan angbâ ti sara kua na ni juska fadeso (Genèse 3:1-6). Lo yeke wara mo nga na oko kode ti lo so? Mingi ni, a yeke bango ndo ti mo si ayeke fa wala lo yeke wara mo na ni wala pëpe.

4 Bâ tapande so: Na ngoi so mo yeke fono na mbeni pendere ndo, lê ti mo atï na ndo ti mbeni gbagba so akpengba na so ayô na nduzu si a kanga lege na zo ti lï na mbeni mbage ti pendere ndo ni so. Na bango ni, mbage ni so kâ ayeke pendere mingi. Kozoni, mo lingbi ti bâ gbagba ni tongana mbeni ye so akanga lege na mo senge senge. Me na ngoi so mo bâ ndo mbilimbili na peko ti gbagba ni, lê ti mo atï na ndo ti bamara so ayeke hara mbeni nyama ti te lo! Ge la si mo bâ ngbanga ti nyen gbagba ni ayeke dä: a yeke ti bata mo. Mbeni sioni nyama ti tengo zo ayeke hara nga mo fadeso? Bible akiri tënë atene: “Ala zia li ti ala kpô, zia lê ti ala akpengba. Wato ti ala Zabolo ayeke tambela tongana mbeni bamara so ayeke toto, na lo yeke gi mbeni zo ti te lo.”—1 Pierre 5:8.

5 Satan ayeke tongana mbeni bamara so ayeke gi zo ti te. Teti so Jéhovah aye pëpe si Satan ate e, lo lu andia ti bata e si “amayele” nde nde ti zo ti sioni so awara e pëpe (aÉphésien 6:11). Ni la, na ngoi kue so e yeke gbu li na ndo ti andia ti Nzapa, a lingbi e bâ ni tongana fä ti ndoye so Babâ ti e ti yayu ayeke na ni na mbage ti e. Tongana e bâ andia ti Nzapa tongaso, ala yeke duti ye ti batango e nga ye ti mungo ngia na e. Disciple Jacques atene: “Zo so ayôro lê ti lo na yâ ti ndia so alingbi kue, ndia ti liberté, na lo ngbâ dä, . . . fade lo yeke duti na ngia tongana lo sara ye alingbi na ni.”—Jacques 1:25.

6. Tâ nzoni lege ti kpengba mabe ti e na yâ ti andia ti Nzapa ayeke ti sara nyen? Fa mbeni tapande.

6 Ti bata acommandement ti Nzapa ayeke tâ nzoni lege ti kpengba mabe ti e na yâ ti Zo ti lungo ndia nga na yâ ti ndara so ayeke na yâ ti andia ti lo. Na tapande, “ndia ti Christ” andu nga  commandement ti Jésus ti fa na azo “aye kue so [lo] mû yanga” ti tene a sara ni (aGalate 6:2; Matthieu 28:19, 20). A-Chrétien ayeke mû nga na nene ni mingi commandement ti gue lakue na abungbi ti voro Jéhovah na ti kpengba tere na popo ti mba (aHébreu 10:24, 25). Na popo ti acommandement ti Nzapa, a yeke wara nga wango so ahunda na e ti sambela lakue, fani mingi nga na bê ti e kue (Matthieu 6:5-8; 1 aThessalonicien 5:17). Na ngoi so e yeke bata acommandement so, e kiri e bâ polele so a yeke biani ndoye si apusu Nzapa ti mû acommandement so ti fa lege na e. Ti bata ni ayeke sara si e yeke wara ngia na nzerengo tere so e lingbi lâ oko pëpe ti wara mara ni na yâ ti dunia ti wusuwusu so. Na ngoi so mo yeke gbu li ti mo ti bâ tongana nyen mo wani mo bâ nzoni ndali ti andia so, mabe ti mo na yâ ti andia so akiri akpengba ahon ti kozo pëpe?

7, 8. Bible amû dengo bê wa na ala so ayeke gi bê ti ala wala ala yeke ngbâ lakue be-ta-zo tongana angu ayeke hon?

7 Ngoi na ngoi, ambeni ita alingbi ti gi bê so tongana angu ayeke hon, fade a yeke duti tâ ngangu mingi ti ngbâ ti bata andia ti Jéhovah. Ala sara mbeto ti tene mbeni lâ ala tï. Tongana a si na mo awe ti gi bê tongaso, dabe ti mo na tënë so: “L’Eternel, Zo Ti Ton mo, Lo Ti Nzoni-kue ti Israël, Lo tene tongaso: Mbi yeke L’Eternel Nzapa ti mo, Lo so awa mo si mo ga nzoni, Lo so afa na mo lege so a lingbi mo tambela dä. O, tongana mo mä commandement ti Mbi giriri! ka siriri ti mo aga tongana  ngu so asua, na mbilimbili ti mo aga tongana mapo ti kota ngu ti ingo.” (Ésaïe 48:17, 18). Mo gbu li ti mo mbeni lâ awe ti bâ tongana nyen atënë so ayeke dë bê ti zo mingi?

8 Na yâ ti aversê so, Jéhovah adabe ti e so e yeke wara aye ti nzoni gi tongana e mä yanga ti lo. Lo fa aye ti nzoni use so e yeke wara tongana e sara tongaso. Kozoni, fade siriri ti e ayeke ga tongana mbeni bale: so ti tene a yeke kpô, a yeke mingi nga a yeke kaï pëpe. Use ni, fade mbilimbili ti e ayeke duti tongana amapo ti kota ngu ti ingo. Tongana mo luti na yanga ti ngu na mo bâ tongana nyen amapo ni ayeke ga gi na peko ti tere, na lê ti mo a kpa mbeni ye so ayeke hunzi pëpe. Mo hinga so amapo ni ayeke ga, a pika yanga ti ngu ni a kiri, gi tongaso lakue. Jéhovah atene so mbilimbili ti mo alingbi nga ti duti tongaso. Na ngoi kue so mo yeke sara ngangu ti ngbâ be-ta-zo na lo, lo yeke zia mo ti tï lâ oko pëpe! (Diko Psaume 55:23.) Mara ti apendere zendo tongaso akpengba mabe ti mo na Jéhovah nga na yâ ti acommandement ti lo pëpe?

“E SARA KUE TI GA ABIAZO”

9, 10. (a) Ngbanga ti nyen gango biazo ayeke mbeni nzoni ye so a lingbi Chrétien azia na gbele lo ti si dä? (b) Tongana nyen si ti duti na bango ndo so ayeke ti yingo ayeke mû lege na zo ti duti na ngia mingi?

9 Mbeni use mbage ti lekengo da ti mo na lege ti yingo ni asigigi polele na yâ ti atënë so: “E sara kue ti ga abiazo.” (aHébreu 6:1). Gango biazo ayeke mbeni nzoni ye so a lingbi Chrétien azia na gbele lo ti si dä. Laso, azo ti mitele alingbi pëpe ti ga azo so alingbi kue, me ala lingbi ti ga abiazo. Nga, na ngoi so aChrétien ayeke ga abiazo, ala yeke wara ngia mingi ti sara na Jéhovah. Ngbanga ti nyen e tene tongaso?

10 Mbeni Chrétien so ayeke biazo ayeke bâ ye tongana ti so Jéhovah ayeke bâ na ni (Jean 4:23). Paul atene: “Ala so ayeke sara ye alingbi na mitele abi bê ti ala na ndo ti aye ti mitele, me ala so ayeke sara ye alingbi na yingo abi bê ti ala na ndo ti aye ti yingo.” (aRomain 8:5). Ti duti na bango ndo so ayeke ti mitele ayeke ga na zo ngia mingi pëpe, teti mara ti bango ndo tongaso ayeke pusu zo ni ti bi bê gi na lo wani, ti bâ ndo ayo pëpe nga ti  bi bê gi na aye ti mitele. Me ti duti na bango ndo so ayeke ti yingo ayeke ga na zo ngia mingi, teti a luti gi na ndo ti Jéhovah, “Nzapa so ayeke na ngia”. (1 Timothée 1:11). Zo so ayeke biazo na lege ti yingo ayeke gi gingo ti nzere na lê ti Jéhovah nga lo yeke duti na ngia même na yâ ti tara. Ngbanga ti nyen? Ngbanga ti so atara amû na e lege ti fa so Satan ayeke wamvene na akpengba e ti duti be-ta-zo, ye so ayeke mû ngia mingi na Babâ ti e ti yayu.—aProverbe 27:11; diko Jacques 1:2, 3.

11, 12. (a) Paul atene nyen na ndo ti “ngangu ti gbungo li” ti Chrétien? Tënë so atene “asara si ngangu ti gbungo li . . . aga nzoni” aye ti tene nyen? (b) Ti tene tere ti zo akpengba na a sara kua nzoni, a hunda nyen?

11 Ti duti mbeni zo ti yingo wala ti ga biazo, a hunda na zo ti sara mbeni ye. Bâ versê so nzoni si: “Kpengbango kobe ayeke ti abiazo, azo so, na lege ti sarango kusala na ngangu ti gbungo li ti ala, asara si ngangu ti gbungo li ti ala ni aga nzoni awe ti hinga popo ti ye ti nzoni na ye ti sioni.” (aHébreu 5:14). Tongana Paul asara tënë ti ‘sarango’ si ngangu ti gbungo li ti e “aga nzoni”, lo mû mbeni mbupa ti yanga ti Grec so a yeke tene ni ândö mingi na yâ ti akota da ti sarango ngia ti awanguru ti Grèce, teti so a lingbi ti kiri peko ti mbupa so na ‘tarango tere tongana ti mbeni wanguru.’ Bâ fadeso tongana nyen wanguru ni ayeke tara tere ti lo.

Lekerengo tere asara si tere ti mbeni wanguru alingbi na ngia ti wanguru ni

12 So a dü e, ade akasa ti tere ti e asara mbeni ngangu kua pëpe. Bâ tapande ti mbeni bébé: A yeke ngangu na lo ti bougé agere ti lo tongana ti so bê ti lo aye. Ni la, na ambeni ngoi, lo yeke sara yâ ti amaboko ti lo kirikiri, même lo yeke pika lê ti lo wani; ye so ayeke sara si lo dö nga lo ye ti toto. Na pekoni, yeke yeke tongana lo yeke bougé amembre ti tere ti lo, lo hinga ti sara ni nzoni. Lo to nda ti hara, na pekoni lo tambela nga lo kpe loro. * Ti molenge la, me ti wanguru ayeke  tongana nyen? Tongana mo bâ mbeni wanguru ayeke huru, lo yeke turnê tere ti lo na lê ti nduzu, lo kiri lo tï zê na sese, mo yeke na kite pëpe so lo mû ngoi mingi ti leke tere ti lo nzoni kozoni awe si lo sara mara ti ye so. Aye ti dongo bê so lo sara na lê ti nduzu so aga gi tongaso pëpe; a hunda na lo kozo ti tara tere ti lo teti angbonga mingi mingi. Bible atene so mara ti “tarango tere na lege ti ngia ti awanguru [tongaso] ayeke sara nzoni na zo gi kete”. Me sarango kusala na ngangu ti gbungo li ti e ayeke sara nzoni mingi na zo.—1 Timothée 4:8.

13. E lingbi ti sara nyen si ngangu ti gbungo li ti e aga nzoni?

13 Na yâ ti buku so, e bâ aye mingi so ayeke mû ande maboko na mo ti sara si ngangu ti gbungo li ti mo aga nzoni si mo lingbi ti ngbâ be-ta-zo na Jéhovah tongana zo ti yingo. Gbu li ngangu na ndo ti akpengba-ndia ti Nzapa na yâ ti sambela na ngoi so mo ye ti mû adesizion na yâ ti fini ti mo ti lâ na lâ. Na gbele adesizion kue so mo ye ti mû, hunda tere ti mo: ‘Andia wa ti Bible andu tënë so? Mbi lingbi ti sara ye alingbi na ni tongana nyen? Desizion so wa si ayeke nzere ande na bê ti Babâ ti mbi ti yayu?’ (Diko aProverbe 3:5, 6; Jacques 1:5) Desizion oko oko so mo yeke mû ni na sarango tongaso ayeke mû lege na mo ti sara si ngangu ti gbungo li ti mo aga nzoni. Ye so ayeke mû maboko na mo ti ga biani zo ti yingo na ti ngbâ tongaso lakue.

14. Mara ti nzara wa a lingbi e duti na ni si e maï na lege ti yingo? Me a yeke nzoni e sara hange na nyen?

14 Biani, zo alingbi ti ga biazo, me maïngo na lege ti yingo ayeke hunzi pëpe. Ti tene zo amaï na lege ti mitele, a lingbi lo te kobe. Ni la Paul atene: “Kpengbango kobe ayeke ti abiazo.” Mbeni nzoni lege ti kpengba mabe ti mo ayeke ti ngbâ ti te kpengbango kobe ti yingo. Tongana mo yeke sara ye biani alingbi  na ye so mo manda, so lege ti ndara la, na Bible atene: “Ndara ayeke kozo ye.” Tongaso, a lingbi e duti tâ na nzara ti apendere tâ tënë so Babâ ti e ayeke mû na e (aProverbe 4:5-7; 1 Pierre 2:2). Biani, tongana e manda ye mingi na e maï mingi na yâ ti ndara ti Nzapa, so amû lege na e pëpe ti bâ tere ti e kota na ndo ti amba ti e. E yeke na bezoin ti bâ tere ti e wani lakue si baba wala mbeni wokongo tongaso alï na yâ ti bê ti e na amaï dä pëpe. Paul atene: “Ala ngbâ ti bâ tere ti ala ti bâ wala ala yeke na yâ ti mabe, ala ngbâ ti bâ tere ti ala ti bâ wala ala wani ala yeke tongana nyen.”—2 aCorinthien 13:5.

15. Ngbanga ti nyen ndoye ayeke kota ye tongana e ye ti maï na lege ti yingo?

15 Kua ti lekengo mbeni fini da alingbi ti hunzi, me ambeni kete kua ti sara na tere ni ayeke ngbâ. A hunda lakue ti bâ lege ti aye ti tere ni si a ngbâ nzoni nga ti leke ambeni kete kete ye ti tere ni so aye ti buba; a lingbi ti si so a hunda ti kono yâ ti da ni. Nyen la e yeke na bezoin ni ti ga abiazo na ti ngbâ ti bata songo ti e na Jéhovah? Kozoni kue, e yeke na bezoin ti ndoye. A lingbi e ngbâ ti maï ndoye ti e teti Jéhovah nga teti aita ti e ti bungbi. Tongana e yeke na ndoye pëpe, aye kue so e hinga, aye kue so e sara ayeke gi senge senge, akpa totongo ti mbeni ye so ayeke son mê ti zo (1 aCorinthien 13:1-3). Tongana e yeke na ndoye, e lingbi ti ga biazo nga ti ngbâ ti maï na lege ti yingo.

ZIA LI TI MO ANGBÂ NA NDO TI BEKU SO JÉHOVAH AMÛ

16. Satan ayeke maï mara ti bibe wa? Jéhovah amû na e nyen ti bata na tere ti e?

16 Zia e bâ mbeni ye ni nde na ndo ti da so mo yeke sara so. Ti tene mo kpengba mo wani tongana mbeni tâ disciple ti Christ, a lingbi mo sara hange na aye so mo yeke bi bê ti mo na ndo ni. Satan, mokonzi ti dunia so, ayeke na kode mingi ti ga na azo ti wara asioni bibe, ti duti na beku teti kekereke pëpe, ti zia bê ti ala na amba ti ala pëpe nga ti bâ so ala lingbi ti sara mbeni ye na yâ ti gigi ti ala pëpe (aÉphésien 2:2). Mara ti abibe tongaso ayeke sara sioni mingi na mbeni Chrétien gi tongana ti so akange  ayeke sara sioni na akeke ti da. Nzoni ye ni ayeke so Jéhovah amû na e mbeni kpengba ye ti bata na tere ti e: ye ni so ayeke beku.

17. Bible amû tapande wa ti fa nene ti dutingo na beku?

17 Bible afa aye ti bira nde nde ti yingo so a lingbi e yü ni si e tiri na Satan nga na dunia so. Mbeni kpengba ye ti bira ni ayeke casque ni, so ayeke “beku ti salut”. (1 aThessalonicien 5:8). Giriri, mbeni turugu ahinga so tongana lo yü casque ti lo pëpe, lo yeke wara kuâ hio na yâ ti bira. Mingi ni, a yeke sara casque ni na wen so a fü bongo wala poro ti nyama na yâ ni; casque ni ayeke bata li ti zo so ayü ni si na ngoi so aye ti bira ti wato apika ni na ngangu, lo yeke wara sioni mingi pëpe. Legeoko tongana ti so casque ayeke bata li ti zo, beku alingbi ti bata bibe ti mo nga.

18, 19. Na ndo ti tënë ti dutingo na beku, mara ti tapande wa Jésus azia? Tongana nyen si e lingbi ti sara ye tongana lo?

18 Jésus azia na e kpengba tapande ti dutingo lakue na beku. Dabe ti mo na aye ti ngangu so asi na lo na ndangba bï ti fini ti lo na ndo ti sese. Mbeni kota kamarade ti lo akä lo ti wara nginza. Mbeni nde atene même so ni hinga lo pëpe. Atanga ni adö lo azia na ala kpe. Azo ti kodoro ti lo wani ake lo, ala dekongo ti hunda ti tene aturugu ti Rome afâ lo. Biani aye so awara Jésus ayeke kota mingi ahon atara so e lingbi ti wara ni mbeni lâ. Me nyen la amû maboko na lo, nyen? A-Hébreu 12:2 akiri tënë atene: “Ndali ti ngia so a zia na gbele lo, lo gbu ngangu juska lo kui na ndo ti keke ti pasi, lo bi kamene yongoro, na fadeso lo duti na tere ti trône ti Nzapa na mbage ti koli.” Lê ti Jésus angbâ lani gi na ndo ti “ngia so a zia na gbele lo”.

19 Ngia wa si a zia ni na gbele Jésus? Biani, lo hinga lani so tongana lo gbu ngangu, lo yeke sara nga si iri ti Jéhovah aga nzoni-kue. Na mbeni lege so ahon tanga ni kue, lo yeke fa tâ polele na gigi so Satan ayeke wamvene. Mbeni beku ti mû ngia na Jésus ahon ye so ayeke dä pëpe. Lo hinga nga so tongana lo ngbâ be-ta-zo juska na nda ni, Jéhovah ayeke futa lo mingi; biani lo hinga so na yâ ti kete ngoi, lo yeke kiri ti wara tere na Babâ ti lo, na so ayeke duti mbeni ngoi ti ngia mingi. Jésus azia lê ti lo gi  na ndo ti pendere beku so, atâa na ngoi so ye aga tâ ngangu mingi. E nga e yeke na bezoin ti sara oko ye so. A zia mbeni ngia na gbele e nga. Jéhovah afa so lo bâ e oko oko na nene ni na lege so lo mû na e pasa ti mû maboko nga na yâ ti kusala so ayeke sara si iri ti lo aga nzoni-kue. E lingbi ti fa so Satan ayeke wamvene tongana e soro Jéhovah ti duti Gbia ti e nga e ngbâ ti bata tere ti e nzoni na yâ ti ndoye ti Babâ ti e, atâa e yeke hon na yâ ti mara ti atara wa.

20. Nyen la alingbi ti mû maboko na mo ti ngbâ ti zia li ti mo gi na ndo ti anzoni ye nga ti duti na beku?

20 Jéhovah aye gi yengo pëpe ti futa awakua ti lo so ayeke be-ta-zo, me lo yeke tâ na nzara ti sara ni. (Ésaïe 30:18; diko Malachie 3:10.) A nzere na lo mingi ti mû na awakua ti lo anzoni ye so bê ti ala aye (Psaume 37:4). Tongaso, zia li ti mo angbâ gi na ndo ti beku so a zia na gbele mo. Zia lege lâ oko pëpe na asioni bibe ti dunia ti Satan ti hon ndo ti mo. Tongana mo bâ so yingo ti dunia so ayeke lï yeke yeke na yâ ti li ti mo wala na yâ ti bê ti mo, sambela Jéhovah ngangu ti mû na mo “siriri ti Nzapa so ahon ndo ti bibe kue”. Siriri so ayeke bata bê ti mo nga na hingango ndo ti mo.—aPhilippien 4:6, 7.

21, 22. (a) Pendere beku wa “azo mingi mingi” ayeke ku kungo? (b) Ti mo, beku wa agbu bê ti mo mingi? Mo leke na bê ti mo ti sara nyen?

21 So tâ pendere beku ti tene mo gbu li ti mo na ndo ni! Tongana  mo yeke na popo ti “azo mingi mingi” so fade ayeke “sigigi na yâ ti kota ye ti vundu” so ayeke ga, gbu li ti mo na ndo ti fini so mo yeke wara ande (Apocalypse 7:9, 14). So Satan na asioni yingo ti lo ayeke dä mbeni pëpe, fade mo yeke wara dengo bê so ahon gbungo li ti mo ti laso. Biani, zo wa na popo ti e aduti na fini sân ti tene Satan asara mbeni ye na ndo ti lo pëpe? So Satan ayeke dä mbeni pëpe ti sara ngangu na ndo ti azo, so tâ kota ngia si e azo e yeke duti ande na ni ti sara kua ti tene sese akiri aga paradis na gbe ti komandema ti Jésus na amba ti lo mokonzi 144 000! Tere ti e anzere mingi tënë ti beku so e yeke na ni ti bâ so akobela kue, nga na asongo tere kue ahon awe, ti yamba asewa ti e so ayeke londo na yâ ti dû ti kuâ na ti wara mara ti fini so Nzapa aye fade ti tene e duti na ni. Na ngoi so e yeke gue yeke yeke ti ga azo so alingbi kue, e yeke pusu tâ nduru mingi na mbeni futa so ayeke kota mingi, zendo so a fa tënë ni na aRomain 8:21 so ayeke “liberté ti gloire ti amolenge ti Nzapa.”

22 Jéhovah aye si e wara liberté mingi ahon même ti so e pensé ti wara ni ande. Me ti wara liberté ni so, a lingbi e mä yanga ti Jéhovah. Ye oko, a yeke nzoni mingi ti tene mo sara ngangu kue ti mä yanga ti Jéhovah lâ na lâ ti wara liberté ni so pëpe? Tongaso, ngbâ ti kpengba mo wani na ndo ti mabe ti mo so ayeke nzoni-kue si mo lingbi ti ngbâ na yâ ti ndoye ti Nzapa teti lakue lakue nga kpu na kpu!

^ par. 12 Awandara atene so tere ti e wani ayeke maï mbeni ye na yâ ti li ti e so asara si e hinga place ti amembre ti tere ti e nga lege ti bougé ala sân ti tene e bâ ni. Na tapande, a yeke ye ni so si amû lege na mo ti pika maboko même tongana mo kanga lê ti mo. Mbeni kangba so kobela azi ye ni so na yâ ti li ti lo lani, a bâ so lo wani lo lingbi ti luti pëpe, ti tambela pëpe wala même ti duti pëpe.

TI HINGA AMBENI TËNË

Sara ye na mabe tongana ti ala

Na sarango nyen si e yeke bâ nzoni na lege ti tapande ti abe-ta-zo ti yâ ti Bible?