Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

“Zia ala ngbâ na yâ ti ndoye ti Nzapa”

 CHAPITRE 9

“Ala kpe yongoro na lango-sioni”

“Ala kpe yongoro na lango-sioni”

“Tongaso ala sara si amembre ti tere ti ala so ayeke na sese so akui tongana a ndu lango-sioni, sioni ye, nzara ti tere, sioni nzara ti bê na sarango bê ti ye, so ayeke vorongo ayanda.”—ACOLOSSIEN 3:5.

1, 2. Balaam agi lege ti sara sioni na azo ti Jéhovah tongana nyen?

MBENI zo ti bingo yango ague ti bi yango na ndo so lo ye ni mingi. Lo ye ti gbu mara ti mbeni susu. Tongaso, lo soro mbeni kobe, lo zia na yanga ti yango ni na lo bi ni na ngu. Kete na pekoni, kamba ti yango ni ato nda ti yengi na keke ni ayeke ba bango; lo ngbâ lo dë yango ni. Tere ti lo anzere teti so lo hinga so lo soro fade tâ nzoni kobe si lo gbu na susu ni.

2 Tapande so adabe ti e na mbeni ye so asi na ngu 1473 kozo na ngoi ti aChrétien; mbeni koli so iri ti lo ayeke Balaam agbu li ti lo mingi ti wara mbeni ye ti gbu na ambeni zo, gi tongana ti so mbeni wagingo susu ayeke sara. Azo ni so lo ye ti gbu ala ayeke azo ti Israël so ase kando lani na benyama ti Moab na yanga ti Sese ti Zendo. Balaam atene so ni yeke prophète ti Jéhovah; me ti bâ ni nzoni, lo yeke mbeni zo so ayeke sara bê ti ye mingi, so ayeda ti tene a mû na lo nginza tongana lo deba azo ti Israël. Me, teti so Jéhovah akanga lege na lo, Balaam airi gi tënë nzoni na ndo ti Israël. Teti so lo ye gi ti wara nginza ni so, Balaam atene na bê ti lo so lo lingbi ti pusu Nzapa ti deba azo ti lo gi tongana a wara lege ti ga na ala ti sara kota siokpari. Na kode so na li, Balaam angbâ abi ye ti lo ni ti gbu na azo ti Israël: ye ni ayeke apendere maseka-wali ti Moab.—Nombre 22:1-7; 31:15, 16; Apocalypse 2:14.

3. Ye so Balaam aleke agbu kamême azo ti Israël?

3 Ye ni agbu lani azo ti Israël ni? A gbu ambeni kamême. Ye so lo leke agbu akoli saki na saki ti Israël: ala “sara pitan  na amolenge-wali ti sese ti Moab”. Ala gue même juska ti voro anzapa ti wataka ti Moab, so na popo ni saleté nzapa Baal ti Péor, so a tene lo yeke nzapa so asara si azo adü amolenge mingi, wala nzapa ti bungbingo ti koli na wali. Na nda ni, azo ti Israël 24 000 awara kuâ tâ gi na yanga ti Sese ti Zendo. So tâ kota ye ti vundu!—Nombre 25:1-9.

4. Ngbanga ti nyen akoli saki na saki ti Israël atï lani na yâ ti lango-sioni?

4 Nyen la ague na ala na kota ye ti vundu tongaso? Mingi ni azia si mbeni sioni bê amaï na yâ ti ala na lege so ala gue yongoro na Jéhovah, Nzapa so azi ala na Égypte, amû na ala kobe na yando nga ague na ala na nzoni tere na yanga ti Sese ti Zendo (aHébreu 3:12). Tongana lo gbu li na ndo ti ye so, bazengele Paul atene: “Zia e ngbâ na yâ ti lango-sioni pëpe tongana ti so lani ambeni na popo ti ala asara lango-sioni, na azo saki bale-use na ota na popo ti ala akui na lâ oko.” *1 aCorinthien 10:8.

5, 6. Ngbanga ti nyen laso e lingbi ti manda ye mingi na lege ti siokpari so azo ti Israël asara na benyama ti Moab?

5 Awakua ti Jéhovah ti laso ayeke na aye mingi ti manda na lege ti mbaï so ayeke na mbeti ti Nombre so, teti ala nga ayeke  nduru ti li na mbeni sese ti zendo so ayeke kota mingi (1 aCorinthien 10:11). Na tapande, yengo so azo ti dunia so aye na bungbingo ti koli na wali akpa tere na ti so azo ti Moab aye na lango-sioni; ye oko, ti laso ahon ti ândö. Nga, ngu oko oko, lango-sioni ayeke gbu aChrétien saki na saki gi tongana ti so a gbu lani azo ti Israël (2 aCorinthien 2:11). Na tapande ti Zimri, so lo ga na mbeni wali ti Madian dandara tongaso na yâ ti kando ti Israël juska na yâ ti tente ti lo wani, laso nga, ambeni zo na yâ ti bungbi ti Jéhovah aga azo so sarango ye ti ala alingbi ti buba congrégation.—Nombre 25:6, 14; Jude 4.

6 Mo bâ so duti ti mo laso akpa tere na ye so asi ândö na benyama ti Moab? Mo lingbi ti bâ kâ na dawa ti mo futa ti mo, so ti tene fini dunia so mo yeke ku ni a ninga awe so? Tongana mo bâ ye ni tongaso, sara ye kue so mo lingbi ti sara ti ngbâ na yâ ti ndoye ti Nzapa na batango commandement so: “Ala kpe yongoro na lango-sioni.”—1 aCorinthien 6:18.

Bâ yâ ti benyama ti Moab

LANGO-SIONI AYEKE NYEN?

7, 8. “Lango-sioni” ayeke nyen? Tongana nyen ala so angbâ na yâ ni ayeke ko gi ye so ala lu ni?

7 Na yâ ti Bible, “lango-sioni” (na Grec, pornéïa) aye ti sara tënë ti abungbingo ti koli na wali kue so ndia ti Nzapa ake. A ndu gingo wali wala koli nde, sarango ndumba, bungbingo ti koli na wali na popo ti azo so ade ti sara mariage pëpe, bungbingo koli na wali na yanga nga na ngbonda, gbungo mbeni zo na tere ti lo ti wali wala ti koli ti sara na ngia, na zo ni so ayeke wali wala koli ti mo pëpe. A ndu nga bungbingo ti koli na koli wala ti wali na wali na alege so e fa ni ge, nga bungbingo na nyama. *

8 Bible atene tâ polele atene ala so angbâ na yâ ti lango-sioni alingbi ti ngbâ na yâ ti congrégation pëpe nga ala yeke wara fini ti lakue lakue pëpe (1 aCorinthien 6:9; Apocalypse  22:15). Nga, même laso ala yeke sara ye ti sioni mingi na tere ti ala: zo alingbi ti zia bê na ndo ti ala mbeni pëpe, ala wani abi nengo ti ala na sese, nzoni mango tere ayeke na yâ ti mariage ti ala pëpe, yingo-ti-hinga ti ala afa lakue na ala so ala sara sioni, ala yeke wara ango so ala ye ni pëpe, akobela na même kuâ. (Diko aGalate 6:7, 8.) Ngbanga ti nyen ti mû mbeni lege so ayeke ga na mo aye ti sioni mingi tongaso? Mawa ni ayeke so ambeni zo mingi abâ ndo ayo pëpe na ngoi so ala bi gere ti ala ti kozoni na ndo ti lege ni so, so fani mingi ato nda ni na bango porno.

PORNO: KOZO YE SO AGUE NA ZO NA LANGO-SIONI

9. Ambeni zo atene so bango porno asara ye na zo pëpe. Mo tene ti mo nyen?

9 Na yâ ti akodoro mingi, a yeke wara porno na yâ ti ambeti-sango, amozoko, na télé nga a mû ndo ti Internet kue. * Ambeni atene so a sara ye na zo pëpe. Tâ tënë la? Oko pëpe! Ala so ayeke bâ porno alingbi ti ga azo so ayeke sara lakue ngia na tere ti ala ti koli wala ti wali nga ala yeke zingo “anzara ti tere ti ala so ayeke ye ti kamene”. Ye so alingbi ti sara si ala ga angbâa ti nzara ti bungbingo koli na wali; a lingbi nga ti sara si ala duti na anzara ti tere so ayeke na lege ni oko pëpe, nga a lingbi ti sara si mango tere ayeke oko pëpe na yâ ti mariage ti ala wala même ti ga na divorce * (aRomain 1:24-27; aÉphésien 4:19). Mbeni wagingo nda ti aye ahaka dutingo ngbâa ti nzara ti bungbingo koli na wali na kobela ti cancer. Lo tene: “Kä ni ayeke te gi tengo ti gue na ni. Na a yeke ngangu ti tene nzara ni akaï lo wani nga a yeke ngangu mingi ti wara mbeni yorö ndali ni.”

Ti sara kua na Internet gi na mbeni ndo so azo ayeke dä ayeke lege ti ndara

10. E lingbi ti bata kpengba-ndia so ayeke na Jacques 1:14, 15 so tongana nyen? (Bâ nga encadré “ Mbeni maseka-koli azia lege ti sioni sarango ye.”)

 10 Bâ atënë so ayeke na Jacques 1:14, 15, so atene: “Zo oko oko ayeke wara tara tongana nzara ti bê ti lo agboto lo na ahanda lo. Na pekoni, tongana nzara ti bê ni amû ngo awe, a yeke dü siokpari; na siokpari nga, tongana a hunzi ti sara ni awe, a dü kuâ.” Ni la, tongana mbeni sioni bibe alï na yâ ti li ti mo, zi ni hio! Na tapande, tongana lê ti mo atï na ndo ti image ti koli wala ti wali so a sara ni ti dü nzara na yâ ti bê ti mo, bi lê ti mo hio na ngonda, wala kanga ordinateur ni wala soro mbeni kua-singa ti télé nde. Sara ye kue so a lingbi mo sara ti kanga lege na asioni nzara ni ti maï na yâ ti bê ti mo na ti hon ndo ti mo.—Diko Matthieu 5:29, 30.

11. Na ngoi so e yeke tiri na asioni nzara ti tere, tongana nyen si e lingbi ti fa so e zia bê ti e na Jéhovah?

 11 A yeke senge pëpe si Jéhovah so ahinga e nzoni mingi ahon e wani amû na e wango so: “Tongaso ala sara si amembre ti tere ti ala so ayeke na sese so akui tongana a ndu lango-sioni, sioni ye, nzara ti tere, sioni nzara ti bê na sarango bê ti ye, so ayeke vorongo ayanda.” (aColossien 3:5). Ti tâ tënë ni, a lingbi ti duti kete ye pëpe. Me zia e dabe ti e so e yeke na mbeni Babâ so ayeke na ndoye nga so ayeke na kangango bê, lo so ayeke na yayu na so e lingbi ti toto na lo (Psaume 68:20). Tongaso, tongana asioni bibe alï na yâ ti li ti mo, sambela lo hio. Sambela ti wara “ngangu so ahon ti so zo ayeke na ni” na sara kue ti pensé na mbeni ye nde.—2 aCorinthien 4:7; 1 aCorinthien 9:27; bâ encadré “ Mbi yeke sara tongana nyen ti zia lege ti mbeni sioni sarango ye?

12. “Bê” ti e ayeke nyen? Ngbanga ti nyen a hunda ti bata ni nzoni?

12 Gbia Salomon atene: “Bata bê ti mo ahon mbeni ye ti mo kue so mo bata, teti lege ti fini kue alondo dä.” (aProverbe 4:23). “Bê” ti e ni ayeke zo ti e ti yâ ni, zo so e yeke ni biani na lê ti Nzapa. Na ndo ni, a yeke lege so Nzapa ayeke bâ na “bê” ti e si ayeke mû lege ti bâ wala e yeke wara fini ti lakue lakue wala pëpe, me a yeke pëpe lege so azo ayeke bâ na e. Gi tënë ni la awe. Me a yeke nga kota tënë mingi. Job ate mbele lani na lê ti lo si lo bâ mbeni wali pëpe ti sara nzara ti lo (Job 31:1). Pendere tapande la lo zia na e so! Mbeni wasungo psaume afa nga mara ti bibe ti Job so, lo tene: “Zi lê ti mbi na tere ti ye so ayeke senge senge.”—Psaume 119:37.

DINA ASORO YE NA NDARA PËPE

13. Dina ayeke zo wa? So lo soro lani ti sara kamarade na amolenge-wali ti Canaan, ngbanga ti nyen a yeke lege ti ndara pëpe?

13 Tongana ti so e bâ fade na Chapitre 3, akamarade ti e alingbi ti sara mbeni ye ti nzoni wala ti sioni na ndo ti e. (aProverbe 13:20; diko 1 aCorinthien 15:33.) Bâ tapande ti Dina, molenge ti Jacob (Genèse 34:1). Atâa so a fa lege na lo nzoni na ngoi so lo de kete, Dina asoro ti sara kamarade na amolenge-wali ti Canaan, na a yeke lege ti ndara pëpe. Azo ti Canaan ayeke tongana  azo ti Moab; a hinga ala na lango-sioni (Lévitique 18:6-25). Na lê ti akoli ti Canaan, nga ti Sichem so “a yä iri ti [lo] ahon azo kue na da ti babâ ti lo”, Dina akpa mbeni molenge-wali so ayeke nduru ti yeda ti sara lango-sioni tongana amolenge-wali ti Canaan.—Genèse 34:18, 19.

14. Sorongo akamarade so Dina asoro aga na kpale wa?

14 Peut-être na ngoi so Dina atingbi na Sichem, lo yeke na bibe ti sarango lango-sioni na lo pëpe. Ye oko, ti Sichem, lo sara gi ye so mingi ti akoli ti Canaan ayeke sara na ngoi so nzara ti tere ti ala alondo. Ngangu kue so peut-être Dina asara lani ti tene Sichem abungbi na lo pëpe ayeke ye oko pëpe, teti “lo kamata lo, lo bungbi na lo”. A tene so na pekoni Sichem “[a]ndoye” Dina, me lo lingbi ti changé ye so lo sara na Dina so pëpe. (Diko Genèse 34:1-4.) Gi Dina oko la si abâ pasi na peko ti ye so pëpe. Sorongo akamarade so lo soro aga na akpale mingi nga a bi kamene na ndo ti fami ti lo kue.—Genèse 34:7, 25-31; aGalate 6:7, 8.

15, 16. E lingbi ti wara tâ ndara tongana nyen? (Bâ nga encadré “ Aversê ti gbu li na ndo ni.”)

 15 Tongana Dina amanda lani mbeni kpengba ye, lo manda ni gi na peko ti ye ti ngangu so asi na lo. Ala so andoye Jéhovah nga amä yanga ti lo ayeke ku pëpe ti tene mbeni ye ti ngangu asi na ala awe si li ti ala aga dä. Teti so ala yeke mä yanga ti Nzapa, ala soro ti ‘tambela na awandara’. (aProverbe 13:20a).  Tongaso ala hinga “lege kue so ayeke nzoni” na ala kpe ti wara kpale nga ti bâ pasi senge senge.—aProverbe 2:6-9; Psaume 1:1-3.

16 Azo kue so aye ti wara ndara ti Nzapa, ala lingbi ti wara ni na lege ti sambelango Jéhovah lakue nga na mandango Bible na ambeti ti ngbâa be-ta-zo lakue (Matthieu 24:45; Jacques 1:5). Mbeni ye so ayeke nga kota ye mingi ayeke tâ be-ti-molenge so a lingbi ti bâ ni na mbage ti mbeni zo na lege so lo yeke nduru ti mä awango ti Bible (2 aGbia 22:18, 19). Na tapande, mbeni Chrétien alingbi ti tene na yanga so bê ti zo ayeke na handa na ayeke sioni mingi (Jérémie 17:9). Me tongana lo sara mbeni ye na lege ti ndara pëpe si a mû wango na lo nga a mû maboko na lo na ndoye, lo yeke duti ande biani na tâ be-ti-molenge ti yeda na ni?

7 Tara ti bâ ye so: Mbeni molenge ti wali atene na babâ ti lo so lo ye ti sigigi na mbeni ita-koli gi ala use awe, me babâ ti lo ake. Maseka-wali ni angbâ atene: “Me Papa, mo yeke na confiance na mbi ape? E yeke gue ti sara mbeni ye ti sioni ape!” Peut-être maseka-wali so andoye Jéhovah na lo yeke na bibe ti sara sioni pëpe; me lo yeke ‘tambela na lege ti ndara’ ti Nzapa la? Maseka-wali so ayeke “kpe yongoro na lango-sioni” la? wala lo yeke sara ye ti buba ti ‘zia bê ti lo na ndara ti lo mveni’? (aProverbe 28:26). Peut-être mo lingbi ti bi bê ti mo na ambeni kpengba-ndia ni so ayeke mû nga lege na babâ so na molenge ti lo ti bâ tënë ni nzoni.—Bâ aProverbe 22:3; Matthieu 6:13; 26:41.

JOSEPH AKPE YONGORO NA LANGO-SIONI

18, 19. Tara wa asi lani na yâ ti gigi ti Joseph? Lo sara tongana nyen na gbele tara so?

18 Mbeni maseka-koli ayeke dä so lo ndoye Jéhovah na lo kpe yongoro na lango-sioni: a yeke Joseph, ita ti Dina na mbage ti babâ (Genèse 30:20-24). Na ngoi so lo de kete, Joseph abâ na lê ti lo aye ti sioni so asi na peko ti ye ti buba so Dina asara. Kite  ayeke dä pëpe so aye so asi lani, na so Joseph agirisa ni pëpe, nga nzara ti bê ti lo ti ngbâ na yâ ti ndoye ti Nzapa amû maboko na lo angu mingi na pekoni na Égypte na ngoi so wali ti patron ti lo agi lege “lâ na lâ” ti bungbi na lo. Biani, so lo yeke ngbâa, Joseph alingbi pëpe ti ke gi kua ni na ti hon. So ye ni ayeke tongaso, a lingbi lo sara ye na ndara nga na kamene pëpe. Lo sara tongaso na tenengo lakue na wali ti Potiphar so ni ye ti sara ye tongaso pëpe, nga na nda ni lo kpe yongoro na tere ti wali ni.—Diko Genèse 39:7-12.

19 Gbu li ti mo kete: Tongana na yâ ti li ti Joseph kâ, lo yeke bâ so lo na wali ni ayeke na ndo ti gbogbo wala lakue lo yeke bi bê ti lo gi na ndo ti bungbingo koli na wali, ka fade lo yeke wara lege ti ngbâ be-ta-zo? Ên-ën, a yeke duti lani ngangu na lo. Ahon ti duti na asioni bibe tongaso, Joseph abâ na nene ni songo ti lo na Jéhovah, na a yeke ye so e lingbi ti bâ ni na yâ ti atënë so lo yeke tene na wali ti Potiphar: “Mveni ti mbi . . . [a]gbanzi ye oko na mbi pëpe, gi mo, teti mo yeke wali ti lo. Tongaso mbi lingbi sara kota sioye so na siokpari ti ke Nzapa tongana nyen?”—Genèse 39:8, 9.

20. Jéhovah asara nyen ndali ti Joseph?

20 Tara ti bâ ngia ti bê ti Jéhovah lani ti bâ maseka Joseph so lâ na lâ angbâ be-ta-zo, atâa so lo yeke yongoro na tere ti asewa ti lo (aProverbe 27:11). Angu mingi na pekoni, Jéhovah asara si a zi Joseph gi na da ti kanga pëpe me nga a zia lo kozo gbenyon-gbia ti Égypte nga zo so ayeke bâ lege ti kangbingo akobe (Genèse 41:39-49). Biani,  tënë ti Psaume 97:10 ayeke tâ tënë: “O, i so i ndoye L’Eternel, i ke sioye! Lo bata âme ti azo ti nzobe, lo zi ala na tïtî azo ti sioni.”

21. Na mbeni kodoro ti Afrika, tongana nyen mbeni ita-koli so ade maseka afa so lo yeke na kamene pëpe ti ke lango-sioni?

21 Laso nga, awakua ti Jéhovah mingi afa so ala “ke sioye, [ala] ndoye nzoye”. (Amos 5:15). Na mbeni kodoro ti Afrika, mbeni ita-koli so ade maseka adabe ti lo so mbeni maseka-wali ti klase ti lo atene na lo so tongana lo mû maboko na ni na devoir ti Math, fade ni yeke zia tere ti ni na lo. Ita-koli ni atene: “Mbi ngbâ mbi ke tâ na lê ti lo. So mbi ngbâ be-ta-zo, a sara si mbi bata nengo ti mbi so ayeke kota mingi ahon amosoro.” Tâ tënë, zo alingbi ti wara “ngia na yâ ti siokpari teti kete ngoi,” me mingi ni akete nzerengo tere tongaso ayeke ga na pasi mingi na pekoni (aHébreu 11:25). Nga, a yeke ye oko pëpe tongana a haka ni na ngia so zo ayeke wara ndali ti so lo mä yanga ti Jéhovah, ngia so ayeke hunzi lâ oko pëpe.—aProverbe 10:22.

YEDA NA MABOKO SO NZAPA TI SARANGO NZONI BÊ AYE TI MÛ NA MO

22, 23. (a) Tongana mbeni Chrétien atï na yâ ti kota siokpari, ngbanga ti nyen ti lo ahunzi awe la pëpe? (b) Azo wa alingbi ti mû maboko na wasiokpari ni?

22 Teti so e yeke awasiokpari, e kue e yeke tiri ti hon ndo ti anzara ti mitele na ti sara ye so ayeke mbilimbili na lê ti Nzapa (aRomain 7:21-25). Jéhovah ahinga ye so, na “Lo dabe Lo na lege so e yeke pupu-sese.” (Psaume 103:14). Me a lingbi ti si so mbeni Chrétien atï na yâ ti kota siokpari. Ti lo ahunzi awe la? Ên-ën! Biani, zo so asara sioni alingbi ti ko asioni lengo ti ye so lo sara, tongana ti so a si ândö na Gbia David. Ye oko, ti Nzapa, lakue lo “ye ti pardone” ala so siokpari ti ala amû vundu na ala nga so ala “fa siokpari ti ala na gigi”.—Psaume 86:5; Jacques 5:16; diko aProverbe 28:13.

23 Nga, Nzapa asara nzoni bê, lo zia na yâ ti congrégation “akoli tongana amatabisi”, so ti tene aberger so ayeke abiazo na lege ti yingo, ala so alingbi ti mû maboko na zo nga so ayeke nduru ti sara ni (aÉphésien 4:8, 12; Jacques 5:14, 15). Ye so ala ye ayeke ti mû maboko na zo so asara siokpari awe ti kiri ti wara  nzoni songo na Nzapa, nga ti “hinga ye” si lo kiri lo sara siokpari ni pëpe.—aProverbe 15:32.

“HINGA YE”

24, 25. (a) Tongana nyen maseka-koli so aProverbe 7:6-23 asara tënë ti lo afa so lo “hinga ye pëpe”? (b) E lingbi ti sara nyen ti tene e “hinga ye”?

24 Bible asara tënë ti azo so “ahinga ye pëpe” na azo so “ahinga ye”. (aProverbe 7:7). Teti so zo so “ahinga ye pëpe” agbu nda ti bango ndo ti Jéhovah na ndo ti aye kue pëpe nga teti so lo ninga na yâ ti kusala ti Nzapa pëpe, lo lingbi ti bâ ndo ayo pëpe wala ti bâ yâ ti aye nzoni pëpe. Legeoko tongana ti maseka-koli so afa tënë ti lo na aProverbe 7:6-23, lo lingbi ti tï hio na yâ ti kota siokpari. Me zo so “ahinga ye” ayeke bi bê ti lo mingi na zo ti yâ ni ti lo na lege so lakue lo yeke manda Bible nga lo yeke sambela na ngoi ni. Na atâa so lo yeke wasiokpari, lo yeke sara ye kue so lo yeke na ngangu ti sara ti tene bibe ti lo, anzara ti bê ti lo, atënë ti bê ti lo nga na aye so lo gi ti sara ague oko na ye so Nzapa ayeda na ni. Na sarango tongaso, “lo ndoye âme ti lo mveni” wala lo yeke iri tënë nzoni na ndo ti lo wani nga fade “lo wara ye ti nzoni.”—aProverbe 19:8.

25 Hunda tere ti mo: ‘Mbi hinga na bê ti mbi kue so andia ti Nzapa ayeke mbilimbili? Mbi yeda biani so ti kpe ni ayeke ga na mbi ngia so ayeke kota ahon atanga ni kue?’ (Psaume 19:8-11; Ésaïe 48:17, 18). Tongana mo yeke na kite même gi kete tongaso na bê ti mo, sara kue ti zi ni. Gbu li ti mo na ndo ti aye so ayeke si tongana zo adoro andia ti Nzapa. Nga “tara L’Eternel, na fade mo bâ Lo yeke nzoni”; mo lingbi ti sara tongaso na sarango ye so Jéhovah ahunda na mo nga na bingo bê ti mo na ndo ti aye so ayeke sara nzoni na mo, so ti tene ye kue so ayeke tâ tënë, ye kue so zo ayeke ne ni, ye kue so ayeke mbilimbili, ye kue so ayeke nzoni-kue, ye kue so zo alingbi ti ye ni (Psaume 34:9; aPhilippien 4:8, 9). Hinga so, tongana mo yeke sara tongaso lakue, mo yeke ngbâ lakue ti ndoye Nzapa, ti ndoye aye so lo ye nga ti ke aye so lo ke. Joseph ayeke lani senge zo tongana e. Ye oko, lo wara lani lege ti “kpe yongoro na lango-sioni”  ngbanga ti so lo zia lege na Jéhovah ti leke lo teti angu mingi, ti sara si lo hinga ye si lo nzere na bê ti Nzapa. Zia mo kue mo sara tongaso.—Ésaïe 64:8.

26. Kota tënë wa e yeke bâ ande na yâ ti achapitre ti peko?

26 Wasarango e aleke atere ti e ti koli na ti wali ti duti pëpe ye ti ngia ti wara na senge nzerengo tere, me ti mû lege na e ti dü na molenge nga ti wara ngia na yâ ti mariage (aProverbe 5:18). Na yâ ti achapitre use so ayeke ga, e yeke bâ ande bango ndo ti Nzapa na ndo ti tënë ti mariage.

^ par. 4 Na yâ ti wungo ti azo so a fâ ala si a fa ni na mbeti ti Nombre, a diko ‘amokonzi ti azo ni’ so wungo ti ala alingbi 1 000 tongaso, so awafango ngbanga si afâ ala; a diko nga ala so Jéhovah wani si afâ ala.—Nombre 25:4, 5.

^ par. 7 Ti hinga tënë nzoni na ndo ti sioni ye nga na sarango sioni ye na kamene pëpe, bâ “Atënë so azo ahunda” na yâ ti Tour ti Ba Ndo ti 15 juillet 2006, so aTémoin ti Jéhovah asigigi na ni.

^ par. 9 Tongana e sara tënë ti “porno” ge, e ye ti sara tënë ti afoto so a zia ni na yâ ti mbeti ti zia ngëdë na yâ ti zo, ambeti so asara tënë ti bungbingo ti koli na wali, wala tenengo atënë ti buba na yâ ti téléphone. Porno alingbi ti duti foto ti zo so a zia tere ti lo ti koli wala ti wali na gigi, nga ti so azo use wala mingi na yâ ni ayeke bungbi koli na wali na mbeni lege so ayeke tâ ti saleté ni.

^ par. 9 Na Ambeni tënë, na li ti tënë “Zia lege ti sarango ngia na tere ti mo ti koli wala ti wali”, a sara tënë na ndo ti sarango ngia na tere ti mo ti koli wala ti wali.

TI HINGA AMBENI TËNË

E lingbi ti ngbâ ti duti nzoni-kue

Bible afa aye ota so alingbi ti mû maboko na e ti hon ndo ti asioni nzara ti bê ti e.