Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

“Zia ala ngbâ na yâ ti ndoye ti Nzapa”

 AMBENI TËNË

Na ngoi wa a hunda na wali ti kanga ye na li ti lo? Ngbanga ti nyen?

Na ngoi wa a hunda na wali ti kanga ye na li ti lo? Ngbanga ti nyen?

Na ngoi wa la a hunda na ita-wali ti kanga ye na li ti lo tongana lo ye ti sara mbeni kua ti Nzapa? Ngbanga ti nyen? Zia e bâ tënë so yingo vulu apusu bazengele Paul ti tene na ndö ni. Lo fa aye so a lingbi e bâ ni kozo tongaso si e mû anzoni desizion so amû gonda na Nzapa (1 aCorinthien 11:3-16). Lo fa aye ota so a yeke nzoni ti bâ ni: (1) akua so a hunda na wali ti kanga ye na li ti lo si lo sara ni, (2) na ngoi wa la a lingbi wali akanga ye na li ti lo nga (3) ye so apusu lo ti sara tongaso.

Akua ni. Paul asara tënë ti aye use: sambela nga na tenengo prophétie (versê 4, 5). Biani, sambela ayeke sarango tënë na Jéhovah nga mbeni lege ti vorongo lo. Laso, tenengo prophétie andu fango ye kue so alondo na yâ ti Bible so Chrétien ayeke fa na mbeni zo. Tongaso, Paul aye ti tene so a lingbi wali akanga ye na li ti lo lakue tongana lo yeke sambela wala lo yeke fa tâ tënë ti Bible na zo? Ên-ën. Ambeni ngoi ayeke dä so a hunda ti tene tongana lo yeke sambela wala lo yeke fa ye, a lingbi lo kanga ye na li ti lo.

Angoi ni. Atënë ti Paul amû lege ti pensé na angoi use: ngoi so lo yeke na yâ ti sewa nga na yâ ti congrégation. Lo tene: “Mokonzi ti wali ayeke koli . . . wali kue so asambela wala atene prophétie na lo kanga ye na li ti lo pëpe, lo zia kamene na lê ti mokonzi ti lo.”  (Versê 3, 5). Na yâ ti sewa, Jéhovah azia koli tongana mokonzi ti wali ti lo. Me tongana wali ayeke sara akua so Jéhovah amû na koli ti sara, si na ngoi ni lo kanga ye na li ti lo pëpe ti fa so lo yeke na gbe ti koli ti lo, lo zia kamene na lê ti koli ni. Na tapande, tongana a si so a lingbi wali ni si amû li ni ti manda Bible na mbeni zo na ngoi so koli ti lo ayeke dä, tongana lo kanga ye na li ti lo, lo fa so lo yeda na komandema ti koli ti lo. Lo yeke kanga ye na li ti lo atâa koli ni ayeke ita wala pëpe, ndali ti so koli ni la ayeke mokonzi ti sewa ni. * Tongana a si so a lingbi lo sambela wala lo fa ye na mbeni zo na ngoi so mbeni kete molenge ti lo ti koli so awara batême awe ayeke dä, a lingbi ita-wali ni akanga ye na li ti lo; lo sara tongaso pëpe ndali ti so molenge ni ayeke mokonzi ti sewa ni me ndali ti komandema so Jéhovah amû na aita-koli na yâ ti congrégation.

Paul asara tënë ti ngoi so wali ayeke na yâ ti congrégation, lo tene: “Tongana mbeni zo aye ti dë gaba na ndö ti mbeni ngobo nde, e yeke na mbeni ngobo nde pëpe, na acongrégation ti Nzapa nga ayeke na ni pëpe.” (Versê 16). A yeke akoli so awara batême awe la alingbi ti mû li ni na yâ ti congrégation (1 Timothée 2:11-14; aHébreu 13:17). Gï akoli la a yeke zia ala a-ancien nga na awakua ti mungo maboko ti tene ala bâ lege ti groupe ti ataba ti Nzapa (Kusala 20:28). Ye oko, ngoi na ngoi ambeni ye alingbi ti si so a hunda na ita-wali ti sara mbeni kua so ita-koli so awara batême awe la adoit ti sara ni. Na tapande, lo lingbi ti mû li ni na bungbi ti fango tënë ndali ti so mbeni ita-koli so alingbi na kua ni ayeke dä ape. Wala lo lingbi ti gue ti sara étude na mbeni zo na ngoi so mbeni ita-koli ayeke na terê ti lo. * Teti so akua ni so ayeke nga mbeni mbage ti kua ti congrégation la, ita-wali ni ayeke kanga ye na li ti lo ti fa so lo yeke sara kua so ita-koli la adoit ti sara ni.

Me na yâ ti ambeni ye mingi so andu vorongo Jéhovah, a  hunda pëpe na aita-wali ti kanga ye na li ti ala. Na tapande, lo yeke na bezoin ti kanga ye na li ti lo pëpe tongana lo yeke kiri tënë na abungbi, lo yeke fa tënë da na da lo na koli ti lo wala na mbeni ita-koli, lo yeke manda Bible na amolenge ti lo so ade ti wara batême ape wala lo yeke sambela na ala. Biani, ambeni tënë alingbi ti londo na ndö ti tënë so, na tongana mbeni ita-wali ahinga mbilimbili pëpe ye so lo lingbi ti sara, a yeke nzoni lo gi nda ti ye na ndö ti tënë ni. * Atâa lo gi nda ti tënë ni, me kue gbä, a yeke sioni pëpe tongana conscience ti lo apusu lo ti kanga ye na li ti lo, tongana ti so a fa na yâ ti foto so.

Ye so apusu lo. Na versê 10, e wara araison use so afa ngbanga ti nyen ita-wali ayeke yeda ti kanga ye na li ti lo: “Ndali ti a-ange, a yeke ngbanga ti wali ti duti na mbeni ye na li ti lo so afa so lo yeke na gbe ti komandema.” Kozoni, bâ tënë so atene “mbeni ye . . . so afa so lo yeke na gbe ti komandema.” Tongana wali akanga ye na li ti lo, a fa so lo yeda na komandema so Jéhovah amû na aita-koli na yâ ti congrégation. Tongaso, lo fa na gigi so lo ndoye Jéhovah Nzapa nga lo yeke be-ta-zo na Lo. Use raison ni ayeke na yâ ti atënë so atene “ndali ti a-ange”. So wali akanga ye na li ti lo, a ndu a-ange so ayeke ngangu mingi so tongana nyen?

A nzere na a-ange mingi ti bâ so, atâa na yayu wala na sese, awakua ti Jéhovah ayeke yeda na komandema ti lo. Tapande so azo so ayeke mbilimbili-kue ape azia na ndö ti tënë so asara nga nzoni na a-ange, ndali ti so ala nga kue a lingbi ala woko terê na gbe ti komandema ti Jéhovah, ye so ambeni ange ake ti sara ni ândö (Jude 6). Laso, a-ange alingbi ti bâ tapande ti mbeni ita-wali  so ahinga ye mingi ahon mbeni ita-koli na yâ ti congrégation, me lo yeke nduru ti fa so lo woko terê ti lo na gbe ti komandema ti ita-koli ni. Na yâ ti ambeni congrégation, ita-wali ni ayeke mbeni Chrétien so a soro lo ti gue na yayu. Mara ti ita-wali tongaso ayeke duti ande na mbeni komandema so ahon ti a-ange nga lo yeke komande ande legeoko na Christ. So tâ pendere tapande si a-ange ayeke bâ ni laso! So tâ pasa si aita-wali kue ayeke na ni ti fa na lê ti a-ange kutu na kutu so ala sara terê ti ala kete ti mä yanga na lege so ala yeke be-ta-zo nga ala yeke woko terê na gbe ti komandema!

^ par. 3 Mbeni ita-wali ayeke sambela na kota go pëpe tongana koli ti lo so ayeke ita ayeke dä. Lo lingbi ti sara tongaso gï na yâ ti ambeni ye, na tapande tongana kobela akanga lege na koli ni ti sara tënë.

^ par. 1 Mbeni ita-wali abezoin pëpe ti kanga mbeni ye na li ti lo tongana lo yeke sara étude na mbeni zo na ngoi so mbeni wafango tënë so ade ti wara batême pëpe so ayeke koli ti lo ape ayeke dä.

^ par. 2 Ti hinga ambeni tënë mingi na ndö ti tënë so, bâ Tour ti Ba Ndo ti lango 15 ti février 2015, lembeti 30 ti lango 15 ti juillet 2002, lembeti 26 na 27. Bâ nga Tour ti Ba Ndo ti lango 1 ti juin 1977, lembeti 349-352, na Français.