Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

“Zia ala ngbâ na yâ ti ndoye ti Nzapa”

 AMBENI TËNË

Bango ndo ti Bible na ndo ti divorce nga na kangbingo tere

Bango ndo ti Bible na ndo ti divorce nga na kangbingo tere

Jéhovah aku na mbage ti koli na wali ti ngbâ be-ta-zo na zendo so ala mû na lango ti mariage ti ala. Na ngoi so lo bungbi kozo koli na kozo wali, Jéhovah atene: “Fade zo . . . [a]duti na wali ti lo; fade ala ga mitele oko.” Angu mingi na pekoni, Jésus Christ nga afa peko ti tënë so na lo tene: “Ni la, ye so Nzapa abungbi ni na gbe ti joug oko, zia mbeni zo akangbi yâ ni pëpe.” (Genèse 2:24; Matthieu 19:3-6). Tongaso, Jéhovah na Jésus abâ mariage tongana mbeni songo so ayeke ninga na popo ti koli na wali juska kuâ amû mbeni oko (1 aCorinthien 7:39). So mariage ayeke ye so Nzapa si azia ni, a lingbi a bâ divorce tongana senge ye pëpe. Ti tâ tënë ni, Jéhovah ake tënë ti divorce kue so raison ni alondo na yâ ti Bible pëpe.—Malachie 2:15, 16.

 Mbeti ti Nzapa afa raison wa ti tene zo asara divorce? Biani, Jéhovah ake gingo wali wala koli nde nga na lango-sioni (Genèse 39:9; 2 Samuel 11:26, 27; Psaume 51:6). Lo ke lango-sioni na bê oko, ni la si lo mû ni tongana oko raison so ndali ni zo alingbi ti sara divorce. (Ti hinga biani ye so a iri ni lango-sioni, bâ Chapitre 9 ti buku so, paragraphe 7.) Jéhovah amû lege na wali wala koli so asara ti lo lango-sioni pëpe ti mû desizion ti ngbâ na mba ti lo so asara sioni ni wala ti sara divorce (Matthieu 19:9). Tongaso, tongana lo so asara lango-sioni ni pëpe amû desizion ti sara divorce, Jéhovah ayeke ke divorce so pëpe. Ye oko, congrégation ti aChrétien ayeke wa mbeni zo pëpe ti sara divorce. Biani, ambeni ye alingbi ti pusu wali wala koli ni so asara sioni pëpe ti ngbâ na mba ti lo ni, mbilimbili tongana mba ti lo ni achangé biani bê ti lo. Me a yeke nzoni ala so Bible amû na ala raison ti sara divorce amû desizion ala wani na ala yeda na aye kue so alingbi ti si na pekoni.—aGalate 6:5.

Na yâ ti ambeni ye so ayeke si ka hio hio pëpe, ambeni Chrétien amû desizion ti kangbi wala ti sara divorce na mba ti ala ni, atâa so lo sara lango-sioni pëpe. Tongana ye tongaso asi, Bible atene so a lingbi zo so amû desizion ni so “[a]mû mbeni koli [wala wali] pëpe wala . . . lo kiri lo leke songo na koli [wala wali] ti lo.” (1 aCorinthien 7:11). Ti ita tongaso, lo yeke na liberté pëpe ti gi ti sara songo na mbeni zo ti tene mbeni lâ ala sara mariage (Matthieu 5:32). Zia e bâ ambeni ye so ayeke si ka hio hio pëpe so apusu ambeni ita ti bâ so a yeke nzoni ala kangbi.

Tongana koli ni ake na mbana ti bata sewa ti lo. Mbeni sewa alingbi ti tï na yâ ti yere, ti wara pëpe aye so sewa ayeke na bezoin ni ti bata na fini ti azo ni ngbanga ti so koli ni ake na mbana ti mû ye na azo ti da ti lo, atâa so lo lingbi ti sara ni. Bible atene so ‘tongana mbeni zo abata azo ti da ti lo pëpe, lo dö lege ti mabe lo zia awe, na sioni ti lo ahon ti zo so amä na bê pëpe.’ (1 Timothée 5:8). Tongana mara ti koli tongaso aye ti changé pëpe, a yeke na wali ni ti mû desizion wala lo ye ti bata nzoni duti ti lo nga na ti amolenge ti lo na hundango na da-ngbanga ti wara mbeti ti kangbingo tere. Biani, tongana a bi tënë na li ti mbeni ita-koli a tene lo ke na mbana ti bata sewa  ti lo, a lingbi a-ancien abâ tënë ni nzoni. A lingbi ti bi na gigi ti bungbi mbeni zo so ake na mbana ti bata sewa ti lo.

Sarango ye ti ngangu mingi na zo. Mbeni koli wala wali alingbi ti sara ye ti ngangu mingi na mba ti lo na mbeni lege so alingbi ti buba seni ti lo wala même ti fâ lo. Tongana zo ti sarango ye ni ayeke ita, a lingbi a-ancien agi ti bâ wala tënë ni ayeke tâ tënë wala pëpe. A lingbi ti bi mbeni zo na gigi ti bungbi tongana ngonzo ti lo ayeke lakue sioni mingi nga tongana lo yeke sara ye ti ngangu na zo.—aGalate 5:19-21.

Tongana lo sara si mba ti lo ni alingbi ti voro Jéhovah pëpe. Mbeni koli wala wali alingbi ti tara lakue ti kanga lege na mba ti lo ti ngbâ ti voro Jéhovah na même ti gbu lo na ngangu ti doro acommandement ti Nzapa. Na yâ ti mara ti aye tongaso, a yeke na lo so si a yeke sara ye ti ngangu ni na lo ti mû desizion ti wara mbeti ti kangbingo tere ti da-ngbanga tongana lo bâ so a yeke gi oko ye so lo lingbi ti sara la ti “mä yanga ti Nzapa, so ayeke mokonzi, ahon ti mä azo.”—Kusala 5:29.

Na yâ ti aye kue so andu mara ti asarango ye so e londo ti bâ so, a lingbi mbeni zo apusu pëpe wali wala koli so ye ni asi na lo ti kangbi na mba ti lo ni wala ti ngbâ na lo. Atâa so akamarade ti ala so ayeke abiazo na lege ti yingo wala a-ancien alingbi ti mû maboko nga ti mû wango na ala na lege ti Bible, ala lingbi pëpe ti hinga anzene nzene ye kue so asi na popo ti koli na wali ni. Gi Jéhovah la alingbi ti bâ ni. Biani, mbeni ita-wali (wala ita-koli) ayeke ne Nzapa pëpe wala lo yeke bâ mariage na nene ni pëpe tongana lo yeke gboto yâ ti akpale ti sewa ti lo gi ti tene lo wara lege ti kangbi na mba ti lo. Jéhovah ahinga amayele kue so alingbi ti duti na peko ti mbeni kangbingo tere na popo ti koli na wali, atâa zo ni asara tongana nyen ti honde ni. Ti tâ tënë ni, “aye kue ayeke na gigi senge nga aluti dandara na lê ti lo so e yeke na tënë ti kiri na ni na lo.” (aHébreu 4:13). Me tongana mbeni sioni ye so ayeke si ka hio hio pëpe angbâ gi ngbango si mbeni Chrétien abâ mbeni ye nde ti sara pëpe me gi ti kangbi na mba ti lo ni, a lingbi zo oko akasa desizion ti lo ni pëpe. Ti hunzi na ni, “fade zo oko oko na popo ti e ayeke kiri tënë na Nzapa ndali ti lo wani.”—aRomain 14:10-12.