Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

“Zia ala ngbâ na yâ ti ndoye ti Nzapa”

 CHAPITRE 7

Mo bâ fini na nene ni tongana ti so Nzapa abâ na ni?

Mo bâ fini na nene ni tongana ti so Nzapa abâ na ni?

“Lingu so amû fini ayeke na Mo.” —PSAUME 36:10.

1, 2. Matabisi wa so alondo na Nzapa ayeke ye ti ngere ngangu laso? Ngbanga ti nyen a yeke tongaso?

BABÂ ti e ti yayu amû na e mbeni matabisi so ngere ni ayeke ngangu mingi: fini so e azo e yeke na ni, e so e yeke na ngangu ti sara ye tongana ti lo (Genèse 1:27). Ndali ti pendere matabisi so, e lingbi ti bâ tongana nyen akpengba-ndia ti Bible ayeke sara nzoni na e. Na sarango ye alingbi na akpengba-ndia so, e lingbi ti maï ti ga abiazo na lege ti yingo, azo so andoye Jéhovah nga so “na lege ti sarango kusala na ngangu ti gbungo li ti ala, asara si ngangu ti gbungo li ti ala ni aga nzoni awe ti hinga popo ti ye ti nzoni na ye ti sioni.”—aHébreu 5:14.

2 Ngangu so e yeke na ni ti bâ tongana nyen akpengba-ndia ti Bible ayeke sara nzoni na e ayeke tâ kota ye mingi laso, teti dunia ti laso aga ye so zo ahinga li ti lo na ni mbeni pëpe, ye so asara si même tongana a lu gbâ ti andia, a lingbi pëpe ti ndu aye kue so alingbi ti si na yâ ti gigi ti zo. Senda-ye na ndo ti tënë ti kaïngo kobela afa so tënë so ayeke tâ tënë, mbilimbili tongana a ndu tënë ti ayorö nga na ti akode ti kaïngo na kobela so andu sarango kusala na mênë. So ayeke mbeni tënë so agbu bê ti azo kue so aye ti mä yanga ti Jéhovah. Ye oko, tongana e gbu nda ti akpengba-ndia ti Bible so andu tënë so, e lingbi biani ti mû adesizion na lege ti ndara so asara si yingo-ti-hinga ti e agi e pëpe nga so asara si e ngbâ na yâ ti ndoye ti Nzapa (aProverbe 2:6-11). Zia e bâ ambeni kpengba-ndia ni so.

 FINI NA MÊNË AYEKE NZONI-KUE NA LÊ TI NZAPA

3, 4. Lawa si ti kozoni Bible asara tënë ti mênë tongana mbeni ye so ayeke nzoni-kue na lê ti Nzapa? Nga tënë so aluti na ndo ti akpengba-ndia wa?

3 Kete na pekoni so Caïn afâ Abel, Jéhovah asara tënë ti kozoni na ndo ti ye so atingbi fini na mênë nga lo fa so lo bâ ni tongana aye so ayeke nzoni-kue. Nzapa atene na Caïn: “Yanga ti mênë ti ita ti mo atoto na Mbi na sese.” (Genèse 4:10). Na lê ti Jéhovah, mênë ti Abel aduti fä ti fini ti lo so a hunzi ni na ngangu nga hio mingi. Tongaso, a lingbi ti tene so mênë ti Abel atoto na Nzapa ti tene lo futa kula.—aHébreu 12:24.

4 Na peko ti kota ngu so apika na ngoi ti Noé, Nzapa amû yanga na azo ti te nyama me ti te mênë ti anyama pëpe. Lo tene: “Me nyama so mênë ni ade dä, i te pëpe, teti mênë ayeke fini ni. Na biani, fade Mbi hunda mênë ti i, mênë ti fini ti i.” (Genèse 9:4, 5). Yanga so Nzapa amû so abâ ahale ti Noé kue juska ti si na e laso. Tënë ni ague gi na peko ti tënë so Nzapa atene ândö na Caïn, so mênë aduti fä ti âme wala fini ti anyama nga na ti azo. Mbela so afa nga so Jéhovah, Lingu ti fini, ayeke hunda na azo kue so abâ fini nga na mênë na nene ni pëpe, ti kiri tënë na lo.—Psaume 36:10.

5, 6. Tongana nyen Ndia ti Moïse afa so mênë ayeke nzoni-kue na lê ti Nzapa nga na ngere ngangu? (Bâ nga encadré “ Bâ fini ti anyama na nene ni”.)

5 Ndia ti Moïse afa nga so mênë ayeke fä ti fini nga so mênë ayeke nzoni-kue na lê ti Nzapa. Lévitique 17:10, 11 atene: “Tongana mbeni zo . . . ate mênë, fade Mbi zia bê ti Mbi na zo so ate mênë ti ke lo, na fade Mbi lungula lo na popo ti azo ti lo. Teti fini ti mi ayeke na yâ mênë, na Mbi mû mênë na i na ndo gbalaka ti sara songo teti âme ti i, teti a yeke mênë so asara songo ngbanga ti fini so ayeke na yâ ni.” *—Bâ encadré “ Ngangu so mênë ayeke na ni ti kanga ndo ti siokpari”.

6 Ti mênë ti mbeni nyama so a fâ lo awe me a gue na ni na ndo ti gbalaka pëpe, a lingbi a tuku gi ni na sese awe. Sarango  tongaso ayeke mbeni lege ti fa so mênë ni akiri na Wa ti mênë ni (Deutéronome 12:16; Ézéchiel 18:4). Ye oko, bâ so a hunda pëpe na azo ti Israël ti pete akete kete mênë ti tene a sigigi kue na yâ ti tere ti nyama so ala ye ti te ni. Tongana a fâ go ni nzoni nga mênë ni atuku na sese, zo ti Israël alingbi ti te nyama ni so senge, ngbanga ti so lege so a fâ na nyama ni afa na gigi so zo ni ane Lo so amû fini na zo wala na nyama.

7. David afa tongana nyen so lo bâ mênë tongana ye so ayeke nzoni-kue na lê ti Nzapa?

 7 David, “mbeni koli so alingbi na bê ti [Nzapa]” agbu nda ti akpengba-ndia so ayeke na peko ti ndia ti Nzapa na ndo ti tënë ti mênë (Kusala 13:22). Mbeni lâ, tongana nzara ti ngu ahon ndo ti lo, azo ti lo ota asara ngangu juska ala lï na kando ti awato ti ala na ala to ngu ti mbeni dungu si ala ga na ni na lo. David atene nyen? Lo tene: “Azo so abâ fini ti ala tongana ye senge. Mbi lingbi nyon mênë ti ala tongana nyen?” Na lê ti David, ti nyon ngu ni so ayeke tongana nyongo mênë ti azo ti lo ni so azia fini ti ala na lê ti kuâ si ala to ngu ni so. Ni la, atâa so nzara ti ngu ahon ndo ti lo, “lo sa ngu ni na gbele L’Eternel.”—2 Samuel 23:15-17.

8, 9. Bango ndo ti Nzapa na ndo ti tënë ti fini nga ti mênë agbian lani na ngoi so congrégation ti aChrétien abâ gigi? Fa nda ni.

8 Ngu 2 400 tongaso na peko ti yanga so Nzapa amû ândö na Noé na ndo ti tënë ti mênë nga ngu 1 500 na peko ti so Nzapa ate mbele na Israël, Jéhovah apusu bebungbi ti akozo Chrétien ti sû mbeti so: “Yingo vulu nga na e wani abâ so a yeke nzoni a zia mbeni nengo kungba na ndo ti ala pëpe, gi aye so awe, so ayeke kota ye mingi: ala gbanzi tere ti ala na aye so a mû na sandaga na ayanda, na mênë, na anyama so a pete go ti ala si ala kui nga na lango-sioni.”—Kusala 15:28, 29.

9 A yeke polele so aita ti bebungbi ti ngoi ni kâ ahinga so mênë ayeke ye so ayeke nzoni-kue na lê ti Nzapa; nga ala hinga so ti sara ye na ni na lege ni pëpe ayeke sioni mingi legeoko tongana vorongo ayanda wala sarango lango-sioni. Atâ Chrétien laso ayeda na bango ndo so. Nga, ngbanga ti so ala yeke gbu li na ndo ti akpengba-ndia ti Bible na ala yeke sara ye alingbi na ni, ahon ti ku ti wara acommandement so asigigi polele, ala lingbi ti nzere na bê ti Jéhovah tongana ala yeke mû adesizion so andu mênë.

SARANGO KUA NA MÊNË NA DA-NGANGA

Mbi yeke fa na mbeni wanganga desizion ti mbi na ndo ti akete kete mbage ti mênë tongana nyen?

10, 11. (a) A-Témoin ti Jéhovah atene ti ala nyen na ndo ti mungo mênë wala mungo akota mbage osio ni ti zia na tere ti zo? (b) Na ndo ti atënë wa so andu mênë a yeke na Chrétien oko oko ti mû desizion dä?

10 A-Témoin ti Jéhovah ahinga so ti “gbanzi tere ti ala . . . na  mênë,” aye ti tene ti yeda pëpe ti mû mênë wala ti mû mênë ti ala si azia na tere ti mbeni zo wala ti bata mênë ti ala wani si a kiri a zia ni na tere ti ala. Ndali ti so ala yeke ne andia ti Nzapa, aTémoin ti Jéhovah ayeda nga pëpe ti tene a zia na tere ti ala akota mbage osio ti mênë: abengba globule, avuru globule, aplaquette na plasma.

11 Laso, na lege ti ambeni kode ti kua, mingi ni a kangbi yâ ti akota mbage osio ti mênë so kete kete ti sara na ambeni kua nde nde. Chrétien alingbi ti yeda si a zia mbeni kete kete mbage ti mênë so na tere ti lo? Lo yeke bâ ni kue gi tongana “mênë”? A yeke ti zo oko oko ti mû desizion na ndo ti tënë so. A yeke nga ti zo oko oko ti mû desizion na ndo ti tënë ti akode ti kaïngo na kobela, na tapande ati so ayeke mû mênë ti zo wani ti sara na hémodialyse, hémodilution na récupération du sang épanché so andu sarango kua na mênë ti zo ni wani, me gi tongana a bata ni batango pëpe ti sara na kua ni.—Bâ Ambeni tënë, na li ti tënë “Akete kete mbage ti mênë nga na akode ti sarango na opéré”.

12. Na ndo ti atënë so abâ gi yingo-ti-hinga ti zo oko oko, a lingbi e sara ye tongana nyen?

 12 So tënë ni abâ gi zo oko oko so, a ye ti tene so tënë ni ayeke kota ye na lê ti Jéhovah pëpe? Ên-ën, ngbanga ti so Jéhovah abi bê ti lo mingi na ndo ti atënë ti bê ti e nga ti aye so apusu e ti sara ye. (Diko aProverbe 17:3; 21:2; 24:12.) Na peko ti so e sambela ti hunda Jéhovah ti fa lege na e nga e gi nda ti tënë nzoni na ndo ti tënë ti yorö ni wala kode ti kaïngo kobela ni so awe, a lingbi e mû peko ti ye so yingo-ti-hinga ti e afa na e, yingo-ti-hinga ti e so Bible amû lege na e ti leke ni si a sara kua nzoni (aRomain 14:2, 22, 23). Biani, a lingbi ambeni zo apusu e pëpe ti sara gi ye so yingo-ti-hinga ti ala wani afa na ala, wala a lingbi e hunda na mbeni zo tënë tongana ti so pëpe: “Tongana mo yeke na place ti mbi, mo yeke sara fade tongana nyen?” Na ndo ti atënë tongaso, a lingbi Chrétien oko oko “ayô kungba ti lo wani.” *aGalate 6:5; aRomain 14:12; bâ encadré “ Mbi bâ mênë tongana ye so ayeke nzoni-kue na lê ti Nzapa?”.

ANDIA TI JÉHOVAH AFA LO TONGANA MBENI BABÂ SO AYE E MINGI

13. Andia nga akpengba-ndia ti Jéhovah afa nyen na ndo ti lo? Mû mbeni tapande ni.

13 Andia na akpengba-ndia so ayeke na yâ ti Bible afa Jéhovah tongana mbeni Walungo ndia so ayeke na ndara mingi nga mbeni Babâ so aye amolenge ti lo si lo bi bê ti lo mingi na nzoni duti ti ala (Psaume 19:8-12). Commandement so a mû na aChrétien ti “gbanzi tere . . . na mênë” ayeke mbeni ndia so amû ni ti bata na seni ti ala pëpe (Kusala 15:20). Atâa so kue, a yeke bata e na ambeni kpale so ayeke si ndali ti mungo mênë. Ti tâ tënë ni, mingi ti awanganga abâ kaïngo kobela ti zo sân ti mû mênë na lo tongana “kode so ayeke nzoni ahon tanga ti akode kue” ti kaïngo kobela laso. Ti atâ Chrétien, bango ndo ti awanganga so afa biani so ndara ti Jéhovah ayeke mbeni ndara so zo alingbi ti hinga nda ni kue pëpe nga a fa so lo yeke babâ so aye e mingi.—Diko Ésaïe 55:9; Jean 14:21, 23.

14, 15. (a) Andia wa amû lege na e ti hinga so Nzapa aye lani azo ti lo mingi? (b) Tongana nyen mo lingbi ti sara ye alingbi na akpengba-ndia so ayeke na peko ti andia so?

 14 Na yâ ti andia mingi so Nzapa amû na Israël ti giriri, e lingbi ti bâ so lo bi bê ti lo mingi na nzoni duti ti azo ti lo. Na tapande, teti so li ti da ti ala ayeke mbeni ndo so ala yeke sara akua mingi dä, Jéhovah ahunda na azo ti Israël ti sara mbeni kete ye tongana gbagba so angoro tere ti li ti da ni si kpale asi na mbeni zo pëpe (Deutéronome 22:8; 1 Samuel 9:25, 26; Néhémie 8:16; Kusala 10:9). Nzapa ahunda nga ti tene ala bâ ndo nzoni na ndo ti abagara ti ala so ayeke sioni mingi (Exode 21:28, 29). Tongana mbeni zo adoro andia so, lo yeke fa so lo bâ nzoni duti ti amba ti lo na nene ni pëpe na ngbanga ti mênë alingbi ti tï na li ti lo.

15 Mo lingbi ti sara ye alingbi na akpengba-ndia so ayeke na peko ti andia so tongana nyen? A yeke nzoni ti gbu li ti mo na ndo ti kutukutu wala kpûrûrû ti mo, lege so mo yeke kpe na ni, anyama so mo yeke bata, da ti mo, ndo so mo yeke sara kua dä nga na angia so mo yeke soro ti sara. Na yâ ti ambeni kodoro, mingi ti amaseka ayeke wara kuâ ndali ti andao, mingi ni teti so ala sara ye na hange pëpe. Me amaseka so aye ti ngbâ na yâ ti ndoye ti Nzapa abâ fini na nene ni na ala yeke gi pëpe ti wara ngia na yâ ti aye so ayeke zia fini ti ala na lê ti kuâ. Ala tene pëpe so teti so ala de maseka, ye ti sioni alingbi ti si na ala pëpe. Ahon ti tene tongaso, ala wara nzoni na ngoi ti maseka ti ala na kpengo ti sara ye so ayeke ga na ala kpale gi senge senge.—Zo-ti-fa-tene 12:1, 2.

16. Kpengba-ndia wa ti Bible andu tënë ti tukungo ngo? (Bâ nga kete tënë na gbe ni.)

16 Même fini ti molenge so ade na yâ ti mama ti lo ayeke na ngere ngangu na lê ti Nzapa. Na tango ti Israël, tongana mbeni zo asara ye ti sioni na tere ti mbeni mama ti ngo si mama ni wala molenge ni akui, Nzapa abâ zo so asara ye ni so tongana zo ti fango zo, na a lingbi zo ni amû “fini teti fini”. * (Diko Exode 21:22, 23.)  Tongaso, tara ti bâ vundu so ayeke na bê ti Jéhovah tongana lo bâ wungo so a lingbi ti diko ni pëpe ti amolenge so angbâ mênë, so na mbana a yeke buba ngo ti ala na yâ ti ngu oko oko, mingi ni a yeke ndali ti so amama ni aye ngo ni pëpe wala ndali ti so ala mû ngo ni na peko ti lango-sioni.

17. Mo yeke tene nyen ti de bê ti mbeni wali so atuku ngo kozo awe si lo hinga tâ tënë?

 17 Ka ti mbeni wali so lo tuku ngo kozoni si lo hinga tâ tënë ayeke tongana nyen? Nzapa alingbi ti sara nzoni bê na lo pëpe? Tënë ni ayeke tongaso pëpe. Ti tâ tënë ni, tongana mbeni zo agbian bê ti lo biani, lo lingbi ti duti na beku so Jéhovah ayeke pardone lo na lege ti mênë ti Jésus so atuku (Psaume 103:8-14; aÉphésien 1:7). Christ wani atene: “Mbi ga ti iri azo ti mbilimbili pëpe, me awasiokpari si ala changé bê ti ala.”—Luc 5:32.

KE TI DUTI NA BIBE TI KENGO ZO

18. Na lege wa Bible afa ye so ayeke pusu azo ti tuku mênë mingi?

18 Jéhovah aye si e sara sioni na azo pëpe, me lo ye nga si e zi na yâ ti bê ti e ye so ayeke pusu azo ti tuku mênë mingi: bibe ti kengo zo. Bazengele Jean atene: “Zo kue so ake ita ti lo ayeke wafango zo.” (1 Jean 3:15). Ti mara ti zo tongaso, a yeke gi senge kengo zo pëpe, me lo ye si ita ti lo ni awara kuâ. Kengo zo ni so ayeke sigigi na lege ti pango zo ni sioni sioni wala bingo atënë ti mvene na li ti lo, atënë so tongana fade a yeke tâ tënë kâ ngbanga ti Nzapa ayeke tï na ndo ti lo (Lévitique 19:16; Deutéronome 19:18-21; Matthieu 5:22). Tongaso, a yeke tâ kota ye ti tene e sara kue ti zi na yâ ti bê ti e sioni bê kue so alingbi ti duti dä.—Jacques 1:14, 15; 4:1-3.

19. Zo so azia akpengba-ndia ti Bible ti fa lege na lo ayeke bâ aversê tongana Psaume 11:5 na aPhilippien 4:8, 9 tongana nyen?

19 Azo so ayeke bâ fini na nene ni tongana ti so Jéhovah ayeke bâ na ni si aye ti ngbâ na yâ ti ndoye ti Nzapa ayeke kpe nga mara ti asarango ye ti ngangu nde nde kue na zo. Psaume 11:5 atene: “Lo [Jéhovah, lo] ke zo . . . so andoye sioye ti ngangu.” Versê so ayeke sara gi tënë ti sarango ye ti tere ti Nzapa pëpe, me a yeke mbeni kpengba-ndia so ayeke fa lege na zo na yâ ti gigi ti lo kue. Kpengba-ndia so ayeke pusu azo so andoye Nzapa ti kpe mara ti angia nde nde kue so ayeke maï na yâ ti bê ti zo nzara ti sarango ye ti ngangu na zo. Legeoko nga, tënë so atene Jéhovah ayeke “Nzapa ti siriri” apusu awakua ti lo ti bi bê ti ala gi na ye kue so zo alingbi ti ye ni, ye so  ayeke nzoni mingi nga ye so a lingbi ti gonda ni, so ayeke aye so asara si zo aduti na siriri.—Diko aPhilippien 4:8, 9.

NGBÂ YONGORO NA ABUNGBI SO NGBANGA TI MÊNË AYEKE NA LI TI ALA

20-22. Dutingo ti aChrétien na mbage ti dunia so ayeke tongana nyen? Ngbanga ti nyen a yeke tongaso?

20 Na lê ti Nzapa, dunia ti Satan kue ayeke na ngbanga ti mênë na li ti lo. Na yâ ti Bible, a haka angorogbia ti dunia so na asioni nyama ti ngonda; angorogbia so afâ azo gbani gbani, na ala fâ nga awakua ti Jéhovah mingi (Daniel 8:3, 4, 20-22; Apocalypse 13:1, 2, 7, 8). Abungbi ti dengo buze nga na senda-ye asara kua maboko na maboko na angorogbia so ti leke asioni ngombe ti bira; ye so asara si ala wara gbâ ti anginza na pekoni. A yeke tâ tënë so “dunia so kue ayeke na gbe ti Zo ti sioni.”—1 Jean 5:19.

21 Teti so adisciple ti Jésus ayeke “ti dunia so pëpe”, me so ala duti ti ala tâ nde na aye ti poroso nga na abira ti dunia ni so,  ngbanga ti mênë ayeke na li ti ala pëpe * (Jean 15:19; 17:16). Na tongana ambeni zo asara ye ti ngangu na ala, ala mû tapande ti Christ: ala yeke kiri sioni teti sioni pëpe. Ahon ti sara tongaso, ala yeke fa so ala ndoye awato ti ala na même ala yeke sambela ndali ti ala.—Matthieu 5:44; aRomain 12:17-21.

22 Na ndo ni kue, atâ Chrétien ayeke kpe ti yôro tere ti ala na yâ ti aye ti “Babylone, Ngangu gbata”, so ayeke bungbi ti alege ti vorongo nzapa kue ti wataka so ngbanga ti mênë ayeke na li ti lo mingi ahon ambeni bungbi kue. Bible atene so “a wara na yâ ti lo mênë ti aprophète, mênë ti azo so ayeke nzoni-kue nga na mênë ti azo kue so a fâ ala lani na ndo ti sese.” Ni la a gboto mê ti e a tene: “Azo ti mbi, ala sigigi na yâ ti gbata so.”—Apocalypse 17:6; 18:2, 4, 24.

23. Ti sigigi na yâ ti Babylone, Ngangu gbata, aye ti tene nyen?

23 Ti sigigi na yâ ti Babylone, Ngangu gbata, a hunda ti sara aye mingi ahon gi ti zi iri ti e na popo ti azo ti yâ ni. A hunda nga ti ke asarango ye so abungbi ti vorongo nzapa ti wataka akanga lê na ndo ni, wala so ala fa dandara so ala yeda na ni: aye tongana lango-sioni, yorongo tere na yâ ti poroso nga na gingo ti wara gbâ ti amosoro (Diko Psaume 97:10; Apocalypse 18:7, 9, 11-17). Mingi ni, sarango aye so ague na ala ti tuku mênë.

24, 25. Ye nyen amû lege na Nzapa ti sara nzoni bê na zo so ngbanga ti mênë ayeke na li ti lo si lo gbian bê ti lo? Ye so adabe ti e na nyen na tango ti Israël?

24 Kozoni si e mû tere ti e na Jéhovah si e wara batême, a lingbi ti tene so e oko oko kue e mû maboko na aye ti dunia ti Satan so, na tongaso e wara kamême mbeni ngbanga ti mênë na li ti e. Me, teti so e gbian asarango ye ti e, e mä na bê na sandaga ti Christ nga e mû tere ti e na Nzapa awe, lo sara nzoni bê na e nga lo bata e na lege ti yingo (Kusala 3:19). Lege so lo yeke bata na e na lege ti yingo adabe ti e na agbata ti batango zo na tango ti Israël.—Nombre 35:11-15; Deutéronome 21:1-9.

25 Agbata ni so ayeke bata lani zo tongana nyen? Tongana mbeni zo ti Israël afâ zo me lo sara ni na mbana pëpe, a hunda na lo ti kpe na yâ ti mbeni oko ti agbata ti batango zo so. Na peko ni so ambeni wafango ngbanga so ahinga kua ti ala abâ lege ti tënë ni  awe, a yeke hunda na zo ti fango zo ni so ti sara kodoro na yâ ti gbata ti batango zo juska kota prêtre akui si. Na pekoni, lo lingbi ti sigigi ti gue na mbeni ndo ti bê ti lo. Ye so afa pendere mingi so Nzapa ayeke nduru ti sara nzoni bê na zo nga lo bâ fini ti zo na ngere ngangu mingi. Laso, aye so ayeke tongana agbata ti batango zo ni ayeke ye so Nzapa aleke na lege ti sandaga ti Christ ti bata e si e wara kuâ pëpe ndali ti so e doro na mbana pëpe ndia ti lo na ndo ti tënë ti fini nga na mênë. Mo bâ ye so Nzapa aleke so na nene ni? Mo lingbi ti fa tongana nyen so mo bâ ni na nene ni? Mbeni lege ti fa ni ayeke ti tisa azo ti ga na yâ ti ye so laso ayeke tongana gbata ti batango zo; e ye mbilimbili ti sara tongaso ngbanga ti so “kota ye ti vundu” ayeke pusu nduru mingi.—Matthieu 24:21; 2 aCorinthien 6:1, 2.

BÂ FINI NA NENE NI NA FANGO TËNË TI ROYAUME

26-28. Na lege wa duti ti e laso ayeke tongana ti prophète Ézéchiel? E lingbi ti sara nyen ti ngbâ na yâ ti ndoye ti Nzapa?

26 Duti ti azo ti Nzapa ti laso adabe ti e na prophète Ézéchiel so ândö Jéhovah azia lo ti duti tongana sinziri ti da ti Israël. Nzapa atene na lo: “Mo mä tënë ti yanga ti Mbi, na mo mû na ala wango ti Mbi.” Tongana Ézéchiel asara lani kusala ti lo ni pëpe, ngbanga ti mênë ti azo so a yeke fâ ala ande na ngoi ti futingo Jérusalem ayeke na li ti lo (Ézéchiel 33:7-9). Me Ézéchiel asara ye so a hunda na lo, na ngbanga ti mênë ayeke lani na li ti lo pëpe.

27 Laso, e yeke nduru na lango so a yeke futi ande dunia ti Satan kue. Tongaso, na ngoi so aTémoin ti Jéhovah ayeke fa tënë ti Royaume, ala bâ nga so a yeke kua ti ala nga matabisi ti ala ti fa na azo tënë ti “lâ ti futango kula”. (Ésaïe 61:2; Matthieu 24:14). Mo yeke bi tere ti mo kue na yâ ti kota kusala so? Bazengele Paul abâ lani kusala ti lo ti fango tënë na nene ni mingi. Ndani la si lo tene: “Ngbanga ti mênë ti zo oko ayeke na li ti mbi pëpe, teti mbi gbanzi tere ti mbi pëpe ti fa na ala ye kue so bê ti Nzapa aye.” (Kusala 20:26, 27). So tâ pendere tapande si lo zia na e!

28 Biani, ti ngbâ na yâ ti ndoye ti Babâ ti e Jéhovah, a lingbi e bâ gi pëpe fini na mênë tongana ti so lo bâ na ni. A lingbi nga e duti lakue nzoni-kue na lê ti lo; a yeke ye so e yeke bâ ande na yâ ti chapitre so ayeke ga.

^ par. 5 Na ndo ti tënë ti Nzapa so atene “fini ti mi ayeke na yâ mênë”, mbeni mbeti-sango (Scientific American) atene: “Ti tene zo angbâ na fini, a lingbi lo yeke na mara ti acéllule nde nde kue ti mênë na yâ ti tere ti lo si.”

^ par. 12Réveillez-vous! ti août 2006, lembeti 3-12, so aTémoin ti Jéhovah asigigi na ni.

^ par. 16 Azo so ayeke gi nda ti ambupa so ayeke na yâ ti Bible atene so lege so a sû na tënë ti yanga ti Hébreu ni “asara si a yeke ngangu ti tene so atënë ni andu ye ti sioni so a sara gi na tere ti mama ni.” Nga, bâ so Bible afa pëpe mbeni mbilimbili lango wala nze so molenge ni so angbâ mênë ayeke na ni awe si ngbanga ti Jéhovah ayeke na li ti zo ni.

^ par. 70 Ti hinga ambeni tënë na ndo ni, bâ Ambeni tënë, na li ti tënë “Akete kete mbage ti mênë nga na akode ti sarango na opéré”.

TI HINGA AMBENI TËNË

Ngbanga ti nyen a lingbi e ga nzoni-kue?

Asi na mo awe ti mä yâ ti atënë so ayeke na yâ ti mbeti ti Lévitique ape nga nzara ti dikongo ni asigigi na yâ ti mo? Akota tënë so ayeke na yâ ti mbeti ti Lévitique a lingbi ti mû maboko na mo ti voro Nzapa na lege so ayeke nzoni-kue.