Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

“Zia ala ngbâ na yâ ti ndoye ti Nzapa”

 AMBENI TËNË

Lege ti sara ye na mbage ti azo so a bi ala na gigi ti bungbi

Lege ti sara ye na mbage ti azo so a bi ala na gigi ti bungbi

Mbeni ye so alingbi ti mû vundu mingi na e ayeke tënë ti bingo mbeni fami wala kamarade ti e na gigi ti bungbi ndali ti so lo sara siokpari si lo changé bê ti lo pëpe. Sarango ye ti e alingbi na aye so Bible afa na ndo ti tënë so ayeke fa wala e ye Nzapa mingi nga e ye ti ngbâ be-ta-zo na aye so lo zia na sese na yâ ti bungbi. * Bâ ambeni hundango ndo so alondo ndali ti tënë so.

A lingbi e sara ye tongana nyen na mbage ti azo so a bi ala na gigi ti bungbi? Bible atene: “Ala zia ti sara songo na mbeni zo so a iri lo ita na so lo yeke zo ti sarango lango-sioni, wala zo ti sarango bê ti ye, wala zo ti vorongo ayanda, wala zo ti zongango ndo, wala ngbâa ti sämba, wala zo ti mungo ye ti zo na likisi, na même ti tene ala te kobe na mara ti zo tongaso pëpe.” (1 aCorinthien 5:11). Na ndo ti “zo kue so [a]ngbâ na yâ ti fango ye ti Christ pëpe,” Bible atene: “Ala yamba lo na da ti ala oko pëpe na ala bara lo nga pëpe. Teti zo so abara lo amû mbage na asioni kusala ti lo.” (2 Jean 9-11). E yeke na songo ti ita ti bungbi wala ti kamarade mbeni pëpe na azo so a bi ala na gigi ti bungbi. Tour ti Ba Ndo ti 15 décembre 1981, na lembeti 23, na Français, atene: “Gi tenengo ‘Bara mo’ na mbeni zo alingbi ti mû lege na e ti to nda ti sara lisoro na lo na même ti gue na e ti sara kamarade na lo. Fade e yeke mû li ni ti sara tongaso na mbeni zo so bungbi abi lo na gigi awe?”

A hunda biani ti fâ yâ ti songo ni kue kue kue? En, a hunda ti sara tongaso biani. Kozoni kue, sarango tongaso afa so e yeke be-ta-zo na Nzapa nga na Bible. E yeke mä yanga ti Jéhovah gi pëpe na ngoi so ye ni anzere na e, me nga na ngoi so sarango tongaso ayeke ngangu. Ndoye teti Jéhovah apusu e ti bata acommandement ti lo kue, teti e hinga so lo yeke Nzapa ti mbilimbili na ti ndoye nga andia ti lo ayeke sara nzoni mingi na e (Ésaïe 48:17; 1 Jean 5:3). Use ni, ti fâ yâ ti songo na zo so a bi lo na gigi ti bungbi awe ayeke bata e nga na tanga ti aita ti congrégation ni si lo buba songo ti e na Jéhovah pëpe nga lo buba nzoni sarango ye ti e pëpe; a yeke  sara nga si nzoni iri ti congrégation abuba pëpe (1 aCorinthien 5:6, 7). Ota ni, so e ngbâ gi na ndo ti akpengba-ndia ti Bible alingbi même ti sara nzoni na lo so a bi lo na gigi so. Tongana e fa so e yeda na desizion so komite ni amû, e lingbi ti ndu bê ti wasiokpari ni so juska fadeso ade ti yeda pëpe na ye kue so a-ancien asara ti mû maboko na lo. So wasiokpari ni ayeke na songo ti kamarade mbeni pëpe na azo so lo ye ala mingi alingbi ti sara si “li ti lo aga dä” na lo bâ kota ti sioni so lo sara na lo gi lege ti kiri na mbage ti Jéhovah.—Luc 15:17.

WMe tongana a yeke fami ti mo si a bi lo na gigi? Tongana ye tongaso asi, kpengba songo so ayeke na popo ti azo ti sewa alingbi ti duti mbeni tara ndali ti zo so aye andia ti Jéhovah. A lingbi e sara ye tongana nyen na mbage ti fami ti e so a bi lo na gigi ti bungbi? Na yâ ti buku so, e lingbi pëpe ti fa aye kue so alingbi ti si, me zia e bâ gi ambeni use.

Ti ambeni sewa, fami ni so a bi lo na gigi so angbâ ti lango da oko na ala. Bingo lo na gigi ti bungbi afâ yâ ti songo ti fami ni pëpe; tongaso, ala yeke ngbâ ti sara akua ti da legeoko nga ti sara lisoro. Me, na lege ti ye so lo sara, lo fâ yâ ti songo so abungbi lo ândö na tanga ti sewa ni na yâ ti kua ti Nzapa. Tongaso, tanga ti amembre ti sewa ni so angbâ na bungbi alingbi mbeni pëpe ti sara beoko na lo na kua ti Nzapa. Na tapande, lo lingbi pëpe ti sara tënë na ngoi so sewa ni ayeke bungbi ti manda Bible, atâa so lo lingbi ti duti dä. Ye oko, tongana zo ni so a bi lo na gigi ti bungbi awe ade kete, a yeke ti babâ na mama ti lo ti ngbâ ti fa ye na lo nga ti se lo. Ni la, ababâ na amama so aye molenge ti ala alingbi ti leke kapa ti manda Bible na lo. *aProverbe 6:20-22; 29:17.

Ti ambeni sewa ni, lo so a bi lo na gigi so alango da oko na ala pëpe. Atâa so ngoi na ngoi a lingbi ti si so ala sara tënë na lo ndali ti ambeni kota ye so andu sewa ni, a lingbi a duti lakue lakue pëpe. Aita so ayeke be-ta-zo na Jéhovah ayeke gi pëpe araison ti ngbâ ti sara songo na fami ti ala so a bi lo na gigi awe na so ala na lo alango da oko pëpe. Ahon ti gi araison, dutingo ti ala be-ta-zo na Jéhovah  nga na bungbi ti lo ayeke pusu ala ti yeda na ye so Bible ahunda ti sara na mbage ti zo so a bi lo na gigi ti bungbi awe. Dutingo ti ala be-ta-zo afa so ala ye nzoni ti lo so a bi lo na gigi so, na peut-être a lingbi ti mû maboko na lo ti bâ nzoni na lege ti sengo so a se na lo so. *aHébreu 12:11.

^ par. 1 Akpengba-ndia ti Bible na ndo ti tënë ti azo so a bi ala na gigi ti bungbi andu nga azo so ala wani si azia bungbi ti Jéhovah.

^ par. 2 Ti hinga ambeni tënë na ndo ti molenge so a bi lo na gigi ti bungbi me so lo ngbâ na da ti babâ na mama ti lo, bâ Tour ti Ba Ndo ti 1 octobre 2001, lembeti 16 na 17, nga ti 15 novembre 1988, lembeti 20 na Français.

^ par. 3 Ti hinga ambeni tënë na ndo ti sarango ye na mbage ti fami so a bi lo na gigi, bâ Tour ti Ba Ndo ti 15 avril 1988, lembeti 26-31, nga na ti 15 décembre 1981, lembeti 25-30, na Français.