Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Aye so mo lingbi ti manda na lege ti Bible

 YE TI MANDA 52

Aturugu ti Jéhovah so wâ ayeke za na terê ti apuse ti mbarata ti ala

Aturugu ti Jéhovah so wâ ayeke za na terê ti apuse ti mbarata ti ala

Ben-Hadad, so ayeke gbia ti Syrie, azia lege ti sarango bira na azo ti Israël ape. Me prophète Élisée atene fani mingi na gbia ti Israël ti sara hange, tongaso si ye ti sioni awara lo ape. Tongaso Ben-Hadad aleke fadeso ti gbu Élisée. Lo gi ngbii lo hinga so Élisée ayeke lango na gbata ti Dothan, na lo tokua aturugu ti Syrie kâ ti tene ala gue agbu lo.

Azo ti Syrie asi na gbata ti Dothan na bï. Na ndade ni, zo ti kua ti Élisée asigi na lo bâ so gbâ ti aturugu angoro gbata ni. Mbeto agbu lo sioni na lo dekongo, lo tene: ‘Élisée, nyen la e yeke sara?’ Élisée atene na lo: ‘Ala so ayeke na e ayeke mingi ahon ala so ayeke na ala.’ Mo ye ti bâ, Jéhovah asara si zo ti kua ti Élisée abâ na li ti ahoto kue so angoro gbata ni gbâ ti ambarata nga na apuse ti mbarata so wâ ayeke za na terê ni.

Na ngoi so aturugu ti Syrie aye ti gbu Élisée, Élisée asambela, lo tene: ‘Jéhovah, pardon, sara si lê ti ala avuko.’ Mo ye ti bâ, atâa so ala yeke bâ ndo, aturugu ni ahinga encore ndo so ala yeke dä ape. Élisée  atene na aturugu ni, atene: ‘Gbata ni la ape. Ala ga, mbi yeke gue ti fa na ala koli so ala yeke gi lo so.’ Ala mû peko ti Élisée juska na Samarie, na ndo so gbia ti Israël ayeke dä.

Na ngoi so azo ti Syrie aga ti hinga ndo so ala yeke dä, mbeni ye ti sarango ni ayeke dä encore ape. Gbia ti Israël ahunda Élisée, atene: ‘A yeke nzoni mbi fâ ala?’ Eskê Élisée ayeke bâ ni tongana mbeni lege la azi na lo ti hunzi na azo so ayeke gi ti sara sioni na lo so? Ên-ën. Élisée atene: ‘Fâ ala ape. Mû na ala kobe, na tene na ala ti kiri.’ Tongaso, gbia ni asara mbeni kota matanga ndali ti ala na lo tene na ala ti kiri na ndo ti ala.

“Confiance so e yeke na ni na lo ayeke so: Atâa ye wa la e hunda, tongana a gue oko na ye so bê ti lo aye, lo yeke mä e.”​—1 Jean 5:14