Na peko ti so Salomon aga gbia ti Israël, Jéhovah ahunda lo, atene: ‘Nyen la mo ye mbi mû na mo?’ Salomon atene: ‘Mbi yeke molenge, nga mbi hinga pëpe ye so mbi yeke sara. Pardon, mû na mbi ndara ti bata na azo ti mo.’ Jéhovah atene: ‘Teti so mo hunda ti wara ndara, mbi yeke sara si mo ga zo so ayeke na ndara mingi ahon azo ti sese kue. Mbi yeke sara nga si mo ga zo ti mosoro. Nga tongana mo mä yanga ti mbi, mo yeke ngbâ na fini aninga.’

Salomon akomanse ti leke temple ni. Lo sara kua na pendere lor, argent, akeke nga na atênë. Gbâ ti akoli nga na awali so ahinga kua nzoni ayeke sara kua ti temple ni. Na peko ti ngu mbasambala, temple ni ahunzi, na a lingbi fadeso ti mû ni na Jéhovah. A sara gbalaka dä na a yeke zö sandaga na ndö ni. Salomon asara agenou na devant ti gbalaka ni lo sambela, lo tene: ‘Jéhovah, temple ni so akono nga ayeke pendere alingbi na mo ape, me pardon, yeda na vorongo ti e nga mä asambela ti e.’ Jéhovah apensé nyen na ndö ti temple ni nga na sambela ti Salomon so? Na ngoi so Salomon ahunzi sambela ti lo awe, wâ alondo na nduzu na agbï sandaga so ayeke na ndö ti gbalaka ni. Jéhovah ayeda na temple ni. Tongana azo ti Israël abâ ye so, terê ti ala anzere.

Iri ti Gbia Salomon awu na yâ ti kodro ti Israël kue nga même na ândö so ayo mingi. Azo ayeke ga ti fa na Salomon akpale ti ala tongaso si lo lingbi ti aidé ala. Même gbia-wali ti kodro ti Shéba kue aga ti tara lo na angangu hundango tënë. Na ngoi so lo mä akiringo tënë ti Salomon, lo tene: ‘Mbi mä na bê pëpe na ye so azo atene na mbi na ndö ti mo, me ti fadeso mbi bâ so mo yeke na ndara mingi ahon même tënë ti ala so. Jéhovah, Nzapa ti mo, asara tufa na ndö ti mo.’ Mara ti Israël aduti nzoni nga azo ni kue ayeke na ngia. Me aye ague ti changé.

“Bâ, mbeni zo ayeke ge so ayeke kota ahon Salomon.”​—Matthieu 12:42