Gue na tënë ti yâ ni

Gue na li ti atënë ni

 YE TI MANDA 42

Jonathan asara ye na mbeto ape nga lo yeke be-ta-zo

Jonathan asara ye na mbeto ape nga lo yeke be-ta-zo

Kozo molenge ti Saül, so iri ti lo ayeke Jonathan, ayeke mbeni ngangu turugu. David atene so Jonathan asara ye hio tongana aigle nga lo yeke ngangu tongana bamara. Mbeni lâ, Jonathan abâ aturugu ti aPhilistin 20 na ndö ti mbeni hoto. Lo tene na zo ti yongo aye ti bira ti lo: ‘E yeke tiri na ala gï tongana Jéhovah afa na e mbeni fä si. Tongana aPhilistin ni atene na e ti monté, tongaso e yeke gue ti tiri na ala.’ A-Philistin ni angbâ adekongo atene: ‘Ala ga e tiri!’ Tongaso, akoli use so amonté na ndö ti hoto ni na ala fâ aturugu ni.

Ndali ti so Jonathan ayeke kozo molenge ti Saül, lo la lo doit ti ga gbia na place ti Saül. Me Jonathan ahinga so Jéhovah asoro David ti ga ande gbia na ndö ti azo ti Israël awe, me lo sara kota bê ape. Jonathan na David aga akota kamarade. Ala mû yanga ti bata mba nga ti gbu koko ti  mba. Jonathan amû na David kota bongo, épée, kokora nga na ceinture ti lo ti fa na David so ala yeke biani avrai kamarade.

Na ngoi so David ayeke kpe Saül, Jonathan ague na peko ti lo na lo tene: ‘Gbu ngangu nga sara mbeto ape. Jéhovah asoro mo ti ga gbia. Même babâ ti mbi kue ahinga ni.’ Mo kue mo ye ti wara mbeni nzoni kamarade tongana Jonathan?

Lege mingi, Jonathan azia fini ti lo na lê ti kuâ ti aidé kamarade ti lo. Lo hinga so Saül ayeke gi ti fâ David, ni la lo tene na babâ ti lo, lo tene: ‘So mo ye ti fâ David a yeke siokpari la. Lo sara sioni oko na mo ape.’ Saül asara ngonzo sioni na terê ti Jonathan. Ambeni ngu na pekoni, Saül na Jonathan akui legeoko na yâ ti bira.

Na peko ti so Jonathan akui, David agi peko ti molenge ti Jonathan so iri ti lo ayeke Méphibosheth. Tongana lo wara Méphibosheth, lo tene na lo, lo tene: ‘Teti so babâ ti mo ayeke mbeni nzoni kamarade ti mbi, mbi yeke bâ lege ti mo na yâ ti tanga ti fini ti mo kue. Mo yeke duti na yâ ti da ti gbia nga mo yeke te kobe na table ti mbi.’ David agirisa lâ oko pëpe kamarade ti lo Jonathan.

“Ala ndoye terê na popo ti ala gï tongana ti so mbi ndoye ala. Tongana mbeni zo akä fini ti lo na kuâ ndali ti akamarade ti lo, mbeni ndoye ti hon so ayeke dä pëpe.”​—Jean 15:12, 13