Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Aye so mo lingbi ti manda na lege ti Bible

 YE TI MANDA 33

Ruth na Naomi

Ruth na Naomi

Na ngoi so mbeni kota nzara atï na kodro ti Israël, mbeni wali ti mara ti Israël so iri ti lo ayeke Naomi aquitté ague na kodro ti Moab, lo na koli ti lo nga na amolenge ti lo ti koli use. Na pekoni koli ti Naomi akui. Amolenge ti lo ti koli asara mariage na Ruth nga na Orpah, so ayeke awali ti kodro ti Moab. Mawa ni ayeke so na pekoni, amolenge ti Naomi use kue akui.

Na ngoi so Naomi amä so kota nzara ayeke na kodro ti Israël encore ape, lo mû desizion ti kiri kâ. Ruth na Orpah ague nga legeoko na lo, me na ngoi so ala yeke na lege, Naomi atene na ala: ‘Ala yeke lani anzoni wali ndali ti amolenge ti mbi nga ala yeke anzoni kogara. Mbi ye si ala kiri ala mû koli. Ala kiri na Moab.’ Awali ni angbâ atene: ‘E ye mo mingi! E ye ti zia mo ape.’ So kue Naomi angbâ ti tene na ala ti kiri. Na nda ni, Orpah la akiri, me Ruth angbâ. Naomi angbâ atene na lo: ‘Bâ Orpah la ayeke kiri na ndo ti azo ti lo nga na terê ti anzapa ti lo so. Gue legeoko na lo ma!’ Me Ruth atene: ‘Mbi yeke zia mo ape. Azo ti mo ayeke ga azo ti mbi, nga Nzapa ti mo ayeke ga Nzapa ti mbi.’ Mo pensé a sara Naomi tongana nyen tongana lo mä Ruth na tenengo mara ti tënë tongaso?

Ruth na Naomi asi na kodro ti Israël na tongo nda ti ngoi ti kongo lê ti orge. Mbeni lâ, Ruth ague ti ro atanga ti alê ti kobe so angbâ na yâ ti yaka ti mbeni koli so iri ti lo ayeke Boaz, so ayeke molenge ti Rahab. Boaz amä so Ruth, so ayeke mbeni wali ti kodro ti Moab, angbâ lakue na terê ti Naomi. Boaz atene na azo ti kua ti lo ti zia kamême alê ti kobe angbâ na yâ ti yaka ni ndali ti Ruth tongaso si lo ro ni.

 Na bï ni, Naomi ahunda Ruth, atene: ‘Mo sara kua fade na ndo wa?’ Ruth atene: ‘Na yâ ti yaka ti mbeni koli so iri ti lo ayeke Boaz.’ Naomi angbâ atene: ‘Boaz ayeke fami ti koli ti mbi. Ngbâ ti sara kua na terê ti amaseka-wali so ayeke sara kua na yâ ti yaka ti lo so. Ye ti sioni ayeke si na mo kâ ape.’

Ruth angbâ ti sara kua na yâ ti yaka ti Boaz juska ngoi ti kongo lê ti kobe ni ahunzi. Boaz abâ so Ruth asara kua ngangu mingi na lo yeke mbeni nzoni wali mingi. Na ngoi ni lani, tongana mbeni koli akui si lo yeke na molenge-koli ape, mbeni fami ti lo ayeke mû wali ti lo na peko ti lo. Tongaso Boaz asara mariage na Ruth. Ala dü mbeni molenge-koli so iri ti lo ayeke Obed, so na pekoni lo ga kotara ti Gbia David. Terê ti akamarade ti Naomi anzere mingi. Ala tene: ‘Kozoni, Jéhovah amû na mo Ruth, so asara nzoni na mo, na fadeso mo wara âta. Zia a sepela Jéhovah.’

“Mbeni kamarade ayeke dä so aye zo ahon ita ti zo ni.”​—aProverbe 18:24