Gue na tënë ti yâ ni

Gue na li ti atënë ni

 YE TI MANDA 30

Rahab ahonde azo ti bembengo ndo

Rahab ahonde azo ti bembengo ndo

Na ngoi so azo ti bembengo ndo so alï na yâ ti gbata ti Jéricho, ala gue na da ti mbeni wali so iri ti lo ayeke Rahab na ala ngbâ kâ. Gbia ti Jéricho amä tënë ni na lo tokua aturugu na da ti Rahab. Rahab ahonde azo ti bembengo ndo use so na li ti da ti lo na lo fa mbeni lege nde na aturugu ni. Lo tene na azo ti bembengo ndo ni, lo tene: ‘Mbi yeke mû maboko na ala ndali ti so mbi hinga so Jéhovah ayeke na mbage ti ala na so ala yeke mû ande kodro ni. Pardon, ala tene na mbi so ala yeke sö ande afami ti mbi.’

Azo ti bembengo ndo ni atene na Rahab: ‘E tene na mo, zo kue so ayeke duti ande na yâ ti da ti mo ayeke kui ape.’ Ala tene: ‘Kanga bengba kamba na terê ti fenêtre ti mo, na mo na afami ti mo ayeke sö ande kuâ.’

Rahab azia azo ti bembengo ndo ni adescend na kamba na lê ti fenêtre ti lo. Ala gue na yâ ti ahoto na ala honde terê ti ala kâ teti lango ota na pekoni ala kiri na Josué. Na pekoni, azo ti Israël afâ Ngu ti Jourdain na ala leke terê ti ala ti mû kodro ni. Jéricho ayeke  kozo gbata so ala mû ni. Jéhovah atene na ala ti tambela ti ngoro terê ti gbata ni fani oko lango oko oko, na ala sara tongaso teti lango omene. Na lango mbasambala ni, ala tambela ala ngoro gbata ni fani mbasambala. Na pekoni, aprêtre ahuru didi, na aturugu ni adekongo na ngangu ti ala kue. Na gbagba ti gbata ni atuku na sese! Me da ti Rahab, so ayeke na ndö ti mur ti gbata ni, angbâ na nduzu. Rahab na afami ti lo asö kua ndali ti so lo yeke na confiance na Jéhovah.

“Legeoko nga, a diko lani Rahab . . . zo ti mbilimbili ndali ti akusala na peko ti so lo yamba nzoni mingi awatokua so asi na ndo ti lo na lo zia ala si ala gue na mbeni lege nde; a yeke tongaso ape?”​—Jacques 2:25