Gue na tënë ti yâ ni

Gue na li ti atënë ni

 YE TI MANDA 31

Josué na azo ti Gabaon

Josué na azo ti Gabaon

Sango na ndö ti gbata ti Jéricho amû ndo na popo ti ambeni mara na kodro ti Canaan. Agbia ti amara ni so amû desizion ti bungbi ti sara bira na azo ti Israël. Me azo ti Gabaon aga ti ala na mbeni plan nde. Ala yü agbagbarango bongo, ala gue atene na Josué: ‘E londo na mbeni yongoro kodro la e ga so. E mä tënë ti Jéhovah nga na aye kue so lo sara lani ndali ti ala na kodro ti Égypte nga na Moab. Ala tene na e so ala yeke tiri na e ape, nga e yeke ga azo ti kua ti ala.’

Josué ayeda na tënë ti ala ni nga lo yeda ti sara bira na ala ape. Lango ota na pekoni, lo mä so ala londo na mbeni ndo so ayo ape. Ala londo na kodro ti Canaan. Tongaso, Josué ahunda azo ti Gabaon ni, lo tene: ‘Ngbanga ti nyen la ala handa e?’ Ala tene: ‘Mbeto asara e. E hinga so Jéhovah, Nzapa ti mo ayeke tiri ndali ti mo. Pardon, mo fâ e ape.’ Josué angbâ ti bata zendo so lo mû lani na ala so na lo zia ala ala ngbâ na fini.

A sara angu mingi awe la agbia ti azo ti Canaan oku nga na aturugu ti ala ayeke sara aye ti ngangu na azo ti Gabaon. Josué na aturugu ti  lo atambela na mbeni bï kue ti gue ti sö ala. Bira ni akomanse na ndade ni na kota ndapre. Azo ti Canaan akomanse ti kpe kirikiri. Na ando kue so ala yeke kpe dä, Jéhovah asara si akota glason alondo na yayu atï na ndö ti ala. Na pekoni, Josué ahunda na Jéhovah ti sara si lâ aluti. Ngbanga ti nyen la lo hunda na Jéhovah ti sara ye ni so, so lâ oko lâ ade aluti ape so? Ngbanga ti so Josué ayeke na confiance na Jéhovah. Lâ alinda ape juska azo ti Israël asö benda na ndö ti agbia ti azo ti Canaan nga na aturugu ti ala.

“Zia ‘en’ ti ala angbâ gï ‘en,’ wala ‘ên-ën’ ti ala angbâ gï ‘ên-ën,’ ndali ti so tënë kue so a zia na ndö ni alondo na Zo ti sioni.”​—Matthieu 5:37