Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Aye so mo lingbi ti manda na lege ti Bible

 YE TI MANDA 34

Gédéon asö benda na ndö ti azo ti Madian

Gédéon asö benda na ndö ti azo ti Madian

Tongana angu ayeke hon, azo ti Israël akiri ake yanga ti Jéhovah na ala komanse ti voro anzapa ti wataka. Teti ngu mbasambala, azo ti Madian anzi anyama ti azo ti Israël nga ala buba ayaka ti ala. Ti kpe azo ti Madian, azo ti Israël ayeke honde terê ti ala na yâ ti adû ti tênë nga na yâ ti ahoto. Azo ti Israël atoto na Jéhovah ti tene lo sö ala. Tongaso, Jéhovah atokua ange na mbeni maseka-koli so iri ti lo ayeke Gédéon. Ange ni atene: ‘Jéhovah asoro mo ti ga mbeni ngangu zo ti bira.’ Gédéon atene: ‘Mbi yeke sö azo ti Israël ni tongana nyen, so mbi yeke nga ye oko ape so.’

Tongana nyen la Gédéon ayeke hinga so Jéhovah asoro lo? Gédéon azia poro ti terê ti taba na sese na lo tene na Jéhovah: ‘Tongana kekereke, ngu ti pere atï gï na ndö ti poro ti taba ni me tanga ti sese ni angbâ na hulengo ni, andâ mbi yeke hinga so mo ye ti sö azo ti Israël.’ Na ndade ni, poro ti terê ti taba ni amouillé me tanga ti sese ni angbâ na hulengo ni! Me na pekoni, Gédéon akiri ahunda ti tene na ndade ni poro ti terê ti taba ni la angbâ na hulengo ni me sese ni amouillé. Na ngoi so ye ni asi tongana ti so lo hunda, Gédéon ahinga biani so Jéhovah asoro lo. Tongaso, lo bungbi aturugu ti gue ti tiri na azo ti Madian.

 Jéhovah atene na Gédéon: ‘Mbi yeke sara si azo ti Israël asö benda. Me teti so mo yeke na aturugu mingi, mo peut ti pensé ande so a yeke na ngangu ti mo wani la mo sö benda so. Tene na azo so mbeto asara ala ti kiri na yanga-da.’ Tongaso, aturugu 22 000 akiri na yanga-da, gï azo 10 000 la angbâ. Na pekoni Jéhovah atene: ‘Aturugu ni angbâ mingi. Gue na ala na terê ti mbeni ngu, na tene na ala ti nyon ngu ni. Mû na terê ti mo gï ala so, na ngoi so ala yeke nyon ngu ni, ala yeke sara hange ti bâ wala awato ayeke ga.’ Gï akoli 300 la asara hange na ngoi so ala yeke nyon ngu ni. Jéhovah atene so gï kete wungo ti akoli so la ayeke sö ande benda na ndö ti aturugu ti Madian 135 000.

Na bï ni, Jéhovah atene na Gédéon: ‘Ngoi alingbi awe ti tene ala gue asara bira na azo ti Madian!’ Gédéon amû na azo ti lo adidi nga na ata ti sese so yâ ni ayeke senge senge, so a zia mbeni ye so wâ ayeke za na yanga ni na yâ ni. Lo tene na ala, lo tene: ‘Ala bâ mbi, na ala sara gï ye so mbi yeke sara.’ Gédéon ahuru didi, lo fâ yâ ti ta so ayeke na maboko ti lo, lo yengere ye so a zia wâ na yanga ni so na lo dekongo, lo tene: “Épée ti Jéhovah na ti Gédéon!” Akoli 300 ni kue asara nga gï oko ye ni so. Mbeto ahon ndö ti azo ti Madian, ala kpe kirikiri. Na yâ ti wusuwusu so, ala komanse ti tiri na popo ti ala. Ge encore, Jéhovah amû maboko na azo ti Israël ti sö benda na ndö ti awato ti ala.

“Si ngangu so ahon ti so zo ayeke na ni aduti ti so alondo na Nzapa, me na e wani pëpe.”—2 aCorinthien 4:7