Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Aye so mo lingbi ti manda na lege ti Bible

 YE TI MANDA 24

Ala sara ye alingbi na zendo ti ala ni ape

Ala sara ye alingbi na zendo ti ala ni ape

Jéhovah atene na Moïse: ‘Mo monté na li ti hoto na mbage ti mbi. Mbi yeke sû andia ti mbi na ndö ti akete tableau ti tênë na mbi yeke mû ni na mo.’ Moïse amonté na ndö ti hoto ni na lo ngbâ kâ lâ 40 na bï 40. Na ngoi so Moïse angbâ kâ, Jéhovah asû aCommandement Bale-oko na ndö ti atableau ti tênë use na lo mû ni na Moïse.

Angoi kete na pekoni, azo ti Israël apensé so Moïse adö ala azia awe. Ala tene na Aaron, ala tene: ‘E ye mbeni zo ti fa lege na e. Sara na e mbeni nzapa.’ Aaron atene: ‘Ala mû na mbi aye ti mê ti ala ti lor.’ Lo sara si lor ni aga ngu na lo leke ni na mbeni statue ti kete bagara. Azo ni atene: ‘Kete bagara so, Nzapa ti e so asigi na e na kodro ti Égypte la.’ Ala komanse ti voro kete bagara ti lor so, na ala sara mbeni matanga. Ye ni so ayeke sioni? En, a yeke sioni ndali ti so azo ni amû zendo lani ti voro gï Jéhovah oko awe. Me ti fadeso ala fâ yâ ti zendo ni so awe.

 Jéhovah abâ ye so asi so, na lo tene na Moïse: ‘Mo descend na terê ti azo so. Ala ke yanga ti mbi awe nga ala yeke voro mbeni nzapa ti wataka.’ Moïse adescend na ndö ti hoto ni, na lo gbu atableau ti tênë use na maboko ti lo.

Tongana Moïse ayeke ga nduru na camp ni, lo mä bia so azo ni ayeke he. Na pekoni, lo bâ ala na dongo dodo nga na kukungo na gbe ti kete bagara ni. Ngonzo asara Moïse ngangu. Lo bi atableau ti tênë ni na sese, na yâ ni afâ kete kete. Hio, lo futi statue ni. Na pekoni, lo hunda Aaron: ‘Nyen la azo so asara na mo si ala gue na mo ngbii ti yeda ti sara mara ti sioni ye tongaso?’ Aaron atene: ‘Mo sara ngonzo pëpe. Mo hinga azo so nzoni. Ala ye mbeni nzapa, tongaso mbi bi lor ti ala na wâ na kete bagara so asigi na yâ ni.’ Aaron adoit ti sara ye tongaso ape. Moïse akiri amonté hoto ni na lo voro yanga na Jéhovah ti pardonné azo ni.

Jéhovah apardonné azo so aye ti mä yanga ti lo. Eskê mo kue mo bâ ngbanga ti nyen la a yeke kota ye ti tene azo ti Israël amû gï peko ti Moïse so ayeke mû li ni na ndö ti ala?

“Lakue tongana mo mû zendo na Nzapa, sara ye hio alingbi na ni, ndali ti so lo ye azo ti buba pëpe. Ye so mo mû zendo ti sara, sara ni.”​—Zo-ti-fa-tene 5:4