Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Aye so mo lingbi ti manda na lege ti Bible

 YE TI MANDA 17

Moïse asoro lani ti voro Jéhovah

Moïse asoro lani ti voro Jéhovah

Na Égypte, a hinga sewa ti Jacob na iri ti azo ti Israël. Na peko ti so Jacob na Joseph akui awe, mbeni fini Pharaon akomanse ti komande. Mbeto asara lo ndali ti so azo ti Israël aga ngangu mingi ahon azo ti Égypte. Tongaso, Pharaon ni so asara si azo ti Israël aga angbâa. Lo gbu ala na ngangu ti gboto brique nga ti sara angangu kua na yâ ti ayaka. Azo ti Égypte ayeke forcé azo ti Israël ti sara angangu kua. Me tongana ngoi ayeke hon, azo ti Israël akiri aga mingi. Ndali ti so Pharaon aye ti tene ala ga mingi ape, lo mû yanga si a fâ amolenge-koli kue ti azo ti Israël so ayeke dû ala. Tara ti bâ tongana nyen la mbeto ahon ndö ti azo ti Israël lani!

Mbeni wali ti Israël so iri ti lo ayeke Jokébèd ayeke na mbeni pendere bébé ti koli. Ti bata molenge ti lo ni, lo zia lo na yâ ti mbeni sakpa na lo honde sakpa ni na yâ ti asosongo so ayeke na terê ti Ngu ti Nil. Ita ti molenge ni ti wali, so iri ti lo ayeke Miriam, aluti nduru na ndo ni so ti bâ ye so ayeke passé.

Molenge ti Pharaon ti wali aga ti sukula ngu na lo bâ sakpa ni. Na yâ ti sakpa ni, lo bâ bébé so angbâ  ti toto na mawa ti bébé ni asara lo. Miriam ahunda lo: ‘Mo ye mbi gue mbi gi mbeni wali so alingbi ti bata bébé ni na mo?’ Tongana molenge ti Pharaon ni ayeda, Miriam ague airi mama ti lo Jokébèd aga na ni. Molenge ti Pharaon ni atene na lo: ‘Mo mû bébé so, mo bata lo na mbi, na mbi yeke payé mo.’

Na ngoi so molenge ni akono awe, Jokébèd aga na lo na molenge ti Pharaon ti wali, na lo zia iri ti lo Moïse nga lo bata lo tongana molenge ti lo wani. Moïse akono tongana molenge ti gbia nga ye kue so lo ye, lo yeke wara ni. Me, Moïse agirisa Jéhovah lâ oko ape. Lo hinga biani so lo yeke zo ti Israël me pëpe zo ti Égypte. Ni la, lo soro ti voro Jéhovah.

Tongana Moïse awara ngu 40, lo mû desizion ti mû maboko na azo ti lo. Na ngoi so lo bâ mbeni zo ti Égypte so angbâ ti pika mbeni zo ti Israël so ayeke ngbâa, Moïse apika zo ti Égypte ni ngangu, zo ni akui. Moïse amû kuâ ti zo ni, lo honde ni na yâ ti mbutu. Tongana Pharaon amä tënë ni, lo gi lege ti fâ Moïse. Me, Moïse akpe lo gue na kodro ti Madian. Kâ, Jéhovah abata lo.

“Na lege ti mabe . . . Moïse [ake] ti tene a iri lo molenge ti molenge ti Pharaon ti wali, lo soro ti tene a sara pasi na lo legeoko na azo ti Nzapa.”​—aHébreu 11:24, 25