Gue na tënë ti yâ ni

Gue na li ti atënë ni

 YE TI MANDA 6

Azo miombe asö kuâ ti lï na yâ ti mbeni fini dunia

Azo miombe asö kuâ ti lï na yâ ti mbeni fini dunia

Noé na sewa ti lo nga na anyama la alï na yâ ti arche ni. Jéhovah akanga yanga ni, na ngu akomanse ti pika. Ngu ni apika ngangu asara si arche ni akomanse ti hon na ndö ni. Na nda ni, ngu amû ndö ti sese kue. Na gigi ti arche ni, azo ti sioni kue akui. Me Noé na sewa ti lo aduti nzoni na yâ ti arche ni. Tara ti bâ na yâ ti li ti mo tongana nyen la terê ti ala anzere so ala mä yanga ti Jéhovah so.

Ngu apika lâ 40 na bï 40, na pekoni a kaï. Ngu ni ahule yeke yeke. Na nda ni, arche ni aduti na ndö ti ambeni hoto. Me ngu angbâ mingi na ndö ti sese ni kue, tongaso a lingbi Noé na sewa ti lo aku kete si ala sigi na yâ ti arche ni.

Ngu ni ague ngbii ahule kue. Noé na sewa ti lo kue ayeke na yâ ti arche ni, ala ngbâ na yâ ni ahon ngu oko. Na pekoni, Jéhovah atene na ala so ala lingbi ti sigi na yâ ti arche ni na ndo so akpa mbeni fini dunia. Ala kiri singila mingi so Jéhovah asö fini ti ala so, nga ala fa ni na lege so ala mû mbeni sandaga na Jéhovah.

Sandaga ti ala ni so anzere na Jéhovah. Lo mû zendo so lo yeke kiri ti futi aye kue na ndö ti sese pëpe na lege ti kota ngu. Lo sara si kozo arc-en-ciel asigi na lê ti nduzu, na a ga tongana mbeni signe ti zendo ni. Mo bâ arc-en-ciel awe?

Na pekoni, Jéhovah atene na Noé nga na sewa ti lo ti dü amolenge na ti ga gbani na ndö ti sese.

“Noé alï na yâ ti arche. [Azo agbu] li lani na ndö ti ye so ayeke si so pëpe juska kota ngu apika na ahon na ala kue.”​—Matthieu 24:38, 39