Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Aye so mo lingbi ti manda na lege ti Bible

 YE TI MANDA 99

Mbeni zo ti batango da ti kanga ahinga tâ tënë

Mbeni zo ti batango da ti kanga ahinga tâ tënë

Na kodro ti Philippes, mbeni zo ti kua ti wali ayeke dä so ayeke na mbeni sioni yingo na yâ ti lo. Sioni yingo ni asara si wali ni aga mbeni zo so ayeke fa na azo gigi ti ala ti kekereke, nga lo yeke ga na nginza mingi na awa ti lo na sarango kua ni so. Na ngoi so Paul na Silas asi na kodro ti Philippes, wali ni amû peko ti ala teti alango mingi. Sioni yingo ni asara si wali ni ayeke dekongo: “Akoli so ayeke angbâa ti Nzapa so ayeke na nduzu na ndö ti aye kue.” Na nda ni, Paul atene na sioni yingo ni, atene: ‘Na iri ti Jésus, sigi na yâ ti wali so!’ Sioni yingo ni angbâ asigi na yâ ti wali ni.

Tongana awa ti wali ni abâ so lo lingbi ti ga na ala nginza encore ape, ngonzo asara ala mingi. Ala gboto Paul na Silas ague na ala na devant ti azo ti komande ti gbata ni, ala tene: ‘Akoli so adoro ndia na ala bi wusuwusu na yâ ti gbata ni kue!’ Azo ti komande ti gbata ni amû yanga ti tene a pika Paul na Silas nga a bi ala na da ti kanga. Zo ti batango da ti kanga ni abi ala na da ti kanga ti yâ ni kâ, na yâ ti mbage ti da ti kanga ni so avuko mingi nga lo zia ala na yâ ti olombo.

Paul na Silas ahe bia ti sepela Jéhovah, na tanga ti azo ti da ti kanga ni amä go ti ala. Mo ye ti bâ, na bê ti bï, sese ayengi ngangu ayengi da ti kanga ni kue. Ayanga ti da ti kanga ni azi, nga achaîne so akanga na azo ti kanga ni azi, olombo ni kue. Zo ti batango da ti kanga ni ague na yâ ti da ti kanga ni na lo bâ so ayanga-da ni azi. Lo pensé ti lo so azo ti kanga ni kue akpe awe, lo mû mbeni épée ti fâ terê ti lo.

Mo ye ti bâ, Paul adekongo na lo, atene: ‘Sara sioni na terê ti mo ape! E kue la ge so!’ Zo ti batango da ti kanga ni alï na lo kuku na devant ti Paul na Silas. Lo hunda ala, lo tene: “A lingbi mbi sara nyen si a sö mbi?” Ala tene na lo, atene: ‘A lingbi mo na azo ti da ti mo amä na bê na Jésus.’ Na pekoni Paul na Silas afa na ala tënë ti Jéhovah, na zo ti batango da ti kanga ni nga na azo ti da ti lo kue awara batême.

“Azo ayeke gbu ala, ayeke sara ye ti ngangu na ala, na guengo na ala na yâ ti asynagogue nga na ada ti kanga. A yeke gue na ala ande na gbele agbia nga na agouverneur ndali ti iri ti mbi. Ye so ayeke mû lege na ala ti fa tënë.”—Luc 21:12, 13