Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Aye so mo lingbi ti manda na lege ti Bible

 YE TI MANDA 95

Ye oko alingbi ti kanga lege na ala ape

Ye oko alingbi ti kanga lege na ala ape

Mbeni koli so ayeke tambela ape aduti ti iri ye lakue na yanga ti temple. Mbeni lâ na peko ti midi, lo bâ Pierre nga na Jean so ayeke gue ti lï na yâ ti temple. Lo tene na ala: ‘Pardon, ala mû na mbi mbeni ye ma!’ Pierre atene: ‘Mbi yeke na mbeni ye so ayeke kota mingi ahon nginza ti mû na mo. Na iri ti Jésus, londo mo tambela!’ Pierre angbâ ayô lo na nduzu, na koli ni akomanse ti tambela! Terê ti azo anzere mingi ti bâ miracle so, a sara si gbâ ti azo aga azo so amä na bê.

Me ngonzo asara aprêtre nga na aSadducéen ngangu. Ala gbu abazengele ni, ala gue na ala na devant ti ngbanga, na ala hunda ala, atene: ‘Zo wa la amû na ala ngangu ti sava koli so?’ Pierre atene: ‘Jésus Christ so ala fâ lo so la amû na e ngangu ni so.’ Akota zo ti nzapa ni adekongo, atene: ‘Ala zia lege ti sarango tënë na ndö ti Jésus so!’ Me abazengele ni atene: ‘A lingbi e sara tënë na ndö ti lo. E yeke zia lege ni ape.’

Gï so a zi Pierre na Jean, ala gue ala wara tanga ti adisciple ni na ala fa na ala peko ti ye so apassé so. Ala sambela legeoko, ala hunda Jéhovah, atene: ‘Pardon, aidé e ti duti na mbeto ape tongaso si e ngbâ ti sara kua ti mo.’ Jéhovah amû na ala yingo vulu ti lo, na ala ngbâ ti fa tënë nga ti sava azo. Yeke yeke wungo ti azo so amä na bê ague na li ni. Kota bê asara aSadducéen mingi, a sara si ala gbu abazengele ni na ala bi ala na da ti kanga. Me na bï ni, Jéhovah atokua mbeni ange, lo ga lo zi ayanga ti da ti kanga ni na lo tene na abazengele ni: ‘Ala kiri ague na temple, ala fa tënë kâ.’

Tâ gï na ndade ni, a tene na azo ti Sanhédrin, so ayeke da-ngbanga ti akota zo ti nzapa, a tene: ‘Yanga-da ti kanga ni angbâ na kangango ni, me akoli so ala gbu ala so ayeke dä ape! Ala yeke na yâ ti temple, ala ngbâ ti fa tënë na azo!’ A kiri a gbu abazengele na a gue na ala na devant ti azo ti Sanhédrin.  Kota prêtre atene na ala, atene: ‘E tene na ala ti sara tënë na ndö ti Jésus ape?’ Me Pierre akiri tënë, atene: “A lingbi e mä yanga ti Nzapa, lo so lo yeke mokonzi, ahon ti mä azo.”

Ngonzo agbu akota zo ti nzapa ni sioni, a sara si ala ye ti fâ abazengele ni. Me mbeni Farizien so iri ti lo ayeke Gamaliel alondo na lo tene: ‘Ala sara hange! Nzapa adoit ti duti na akoli so. Ala ye biani ti tiri na Nzapa?’ Azo ni amä tënë ti lo ni. Na peko ti so ala pika abazengele ni na keke, ala mû yanga na ala encore ti zia ti fa tënë, na ala zia ala ala gue. Me ye ni so akanga lege na abazengele ape. Na mbeto pëpe, ala ngbâ ti fa nzoni tënë, atâa a yeke na temple wala da na da.

“A lingbi e mä yanga ti Nzapa, lo so lo yeke mokonzi, ahon ti mä azo.”—Kusala 5:29