Na ngoi so bazengele Jean ayeke na da ti kanga na yâ ti zoa ti Patmos, Jésus afa na lo na peko ti terê ambeni vision 16, wala ambeni ye so akpa limon, na ndö ti aye so ayeke si kekereke. Avision ni so afa tongana nyen la a yeke sara ande si iri ti Jéhovah aga nzoni-kue, tongana nyen la Royaume ti lo ayeke ga, nga tongana nyen la a yeke sara ye so bê ti Nzapa aye na ndö ti sese tongana ti so a sara na yayu.

Na yâ ti mbeni vision ni, Jean abâ Jéhovah so ayeke na ndö ti trône ti gloire ti lo na yayu, na a-ancien 24 ayeke na terê ti lo, ala yü vuru bongo na couronne ti lor ayeke na li ti ala. Awâ so aza ngangu nga na toto ti bekpa alondo na trône ni aga. A-ancien 24 ni akuku na gbe ti Jéhovah na ala voro lo. Na yâ ti mbeni vision ni nde, Jean abâ azo mingi mingi, so ayeke ti amara kue, nga na ti ayanga ti kodro kue so ayeke voro Jéhovah. Jésus, so ayeke Kete taba ni, ayeke fa lege na ala na lo gue na ala na ngu so amû fini. Na pekoni, na yâ ti mbeni vision ni, Jésus akomanse ti komande tongana Gbia na yayu, lo na a-ancien 24 ni. Na yâ ti vision so Jean abâ na pekoni, lo bâ mbeni kota sioni nyama so akpa ngbo, so ayeke Satan, lo na asioni yingo ti lo. Jésus amû ala na yayu kâ lo bi ala na sese ge.

 Na pekoni Jean abâ Kete taba ni, lo na azo 144 000 ayeke duti na ndö ti Hoto ti Sion. Lo bâ nga mbeni ange so ayeke huru na terê ti sese, lo yeke tene na azo ti sara mbeto ti Nzapa nga ti mû gloire na Nzapa.

Na yâ ti vision so aga na pekoni, a fa na lo bira ti Harmaguédon. Na ngoi ti bira ni so, Jésus na aturugu ti lo asö benda na ndö ti sioni dunia ti Satan. Na yâ ti ndangba vision ni, Jean abâ tongana nyen la beoko ayeke na yayu nga na sese. A futi Satan nga na azo so amû peko ti lo kue. Zo kue so ayeke na yayu nga na ndö ti sese a bâ iri ti Jéhovah tongana mbeni ye so ayeke nzoni-kue na avoro gï lo oko awe.

“Mbi yeke zia kengo terê na popo ti mo na wali ni, nga na popo ti hale ti mo na hale ti lo. Lo yeke neka ande li ti mo, na mo yeke dë ande peko ti gere ti lo.”—Genèse 3:15