Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Aye so mo lingbi ti manda na lege ti Bible

 YE TI MANDA 97

Corneille awara yingo vulu

Corneille awara yingo vulu

Na gbata ti Césarée, a yeke wara mbeni turugu ti kota kamba ti Rome so iri ti lo ayeke Corneille. Atâa so lo yeke Juif ape, aJuif ane lo mingi. Na nzoni bê lo yeke aidé azo ti mawa nga na azo so abezoin mungo maboko. Corneille amä na bê na Jéhovah na lo yeke sambela lo lakue. Mbeni lâ, mbeni ange asi na Corneille na lo tene na lo: ‘Nzapa amä asambela ti mo. Tokua fadeso ambeni koli na gbata ti Joppé, ndo so Pierre ayeke dä, na hunda na lo ti ga na mo ge.’ Hio, Corneille atokua akoli ota na Joppé, so ayo kilomètre 50 tongaso na mbage ti sud.

Na oko ngoi ni, na Joppé, Pierre abâ mbeni vision. Lo bâ anyama so a hunda na aJuif ti te ni ape, na lo mä mbeni go so ahunda na lo ti te ni. Pierre ake, lo tene: ‘Me ade mbi te mbeni nyama so a bâ ni tongana saleté ye lâ oko ape.’ Go ni atene na lo, atene: ‘Zia ti bâ anyama ni so tongana mbeni saleté ye. Nzapa asara si a ga nzoni awe.’ Yingo atene na Pierre, atene: ‘Akoli ota ayeke na yanga-da ti mo. Londo mo na ala ague.’ Pierre asigi na yanga-da ni na lo hunda na akoli ni raison so ala ga ngbanga ni. Ala tene: ‘Corneille, so ayeke mbeni turugu ti kota kamba ti Rome, la atokua e. A lingbi mo ga e  gue na da ti lo na gbata ti Césarée.’ Pierre atene na akoli ni ti lango na ndo ti lo na bï ni, ala ga agene ti lo. Na ndade ni, lo na ala ague na Césarée, ambeni ita ti Joppé ague nga legeoko na ala.

Tongana Corneille abâ Pierre, lo sara agenou. Me Pierre atene: ‘Londo! Mbi yeke zo tongana mo. Nzapa atene na mbi ti ga na da ti mo, atâa so aJuif ayeke gue ka na da ti mbeni zo ti mara nde ape. Pardon, fa na mbi raison so mo tokua ti tene a iri mbi.’

Corneille atene na Pierre, atene: ‘A sara lango osio awe, mbi sambela Nzapa, na mbeni ange atene na mbi ti tokua ti tene a iri mo mo ga. Pardon, fa na e tënë ti Jéhovah.’ Pierre atene: ‘Mbi manda so Nzapa ayeke sara kangbi na popo ti azo ape. Lo yeda na zo kue so aye ti voro lo.’ Pierre afa na ala aye mingi na ndö ti Jésus. Yingo vulu angbâ aga na ndö ti Corneille nga na ndö ti azo kue so ayeke na yâ ti da ti lo na ngoi ni so, na ala wara batême.

“Na yâ ti amara kue, zo so akpe mbeto ti lo na asara ye so ayeke mbilimbili, lo yeke nzere na lê ti Nzapa.”—Kusala 10:35