Gue na tënë ti yâ ni

Gue na li ti atënë ni

 YE TI MANDA 101

A tokua Paul na Rome

A tokua Paul na Rome

Paul ahunzi ota tambela ti lo ti fango tënë na Jérusalem. Kâ, a gbu lo na a bi lo na da ti kanga. Na mbeni bï, na yâ ti mbeni vision, Jésus atene na lo, atene: ‘Mo yeke gue ande na Rome na mo yeke fa tënë kâ.’ A mû Paul na Jérusalem a gue na lo na Césarée, na lo sara ngu use na da ti kanga kâ. Na ngoi so a yeke fâ ngbanga ti lo na devant ti Gouverneur Festus, Paul atene: ‘Zia a fâ ngbanga ti mbi na devant ti César na Rome.’ Festus atene: “Mo hunda ti gue na tënë ni na gbele César, mo yeke gue na gbele César.” A zia Paul na yâ ti mbeni bateau so ague na Rome, Luc nga na Aristarque, so ayeke aita ti lo aChrétien, ague nga legeoko na lo.

Na lê ti kota ngu-ingo ni, mbeni sioni pupu asara teti alango mingi. Azo kue abâ ti ala atene ala yeke kui. Me Paul atene na ala: ‘Akoli, mbeni ange atene na mbi na yâ ti bango li, atene: “Paul, sara mbeto ape. Mo yeke si ande na Rome, na azo kue so ayeke na terê ti mo na yâ ti bateau ni ayeke sö kuâ.” Ala sara mbeto ape! E yeke kui ape.’

Kota pupu ni asara teti lango 14. Na nda ni, ala ga nduru na mbeni kodro. A yeke zoa ti Malte. Bateau ni atuku na yâ ni afâ kete kete, me azo 276 kue so ayeke na yâ ni awara lege ti si na ndö ti zoa ni sân ti tene sioni asi na ala. Ambeni anagé nga ambeni aduti na ndö ti ambage ti bateau ni so si afâ kete kete so, ala gue na ndö ni juska na yanga ti ngu ni. Azo ti Malte abâ lege ti ala nzoni na ala tingo wâ ti tene ala duti na terê ni.

Nze ota na pekoni, aturugu amû Paul ague na lo na Rome na yâ ti mbeni bateau ni nde. Tongana ala si kâ, aita aga ti yamba Paul. Na bango ala, Paul akiri merci na Jéhovah na lo wara ngangu. Atâa so Paul ayeke lani mbeni zo ti kanga, a mû lege na lo ti loué mbeni da na a zia mbeni turugu ti bata yanga-da ni. Lo sara ngu use na da ni so. Azo ayeke ga ti bâ lo, na lo yeke fa tënë ti Royaume na ala nga lo yeke fa ye na ala na ndö ti Jésus. Paul asû nga alettre na acongrégation ti Asie Mineure nga na ti Judée. Biani, Jéhovah asara kua na Paul ti fa nzoni tënë na amara.

“Na yâ ti aye kue, e wani e sara nzoni tënë ti e tongana awakua ti Nzapa na lege so e gbu ngangu na yâ ti aye mingi, so ti tene, na yâ ti apasi, angoi so ye amanke e, akpale.”—2 aCorinthien 6:4