Gue na tënë ti yâ ni

Gue na li ti atënë ni

 YE TI MANDA 94

Adisciple awara yingo vulu

Adisciple awara yingo vulu

Lango bale-oko na peko ti so Jésus akiri na yayu, adisciple ti lo awara yingo vulu. A yeke na ngoi ti Pentecôte ti ngu 33, na azo alondo na ando nde nde ala ga na Jérusalem ti sara matanga. Adisciple 120 tongaso la abungbi lani na yâ ti mbeni da so ayeke na nduzu. Mo ye ti bâ, mbeni ye so ahon gbungo li ti zo apassé. Mbeni ye tongana wâ aza na li ti adisciple oko oko, na ala kue akomanse ti sara tënë na ayanga ti kodro nde nde. A mä toto ti mbeni ye tongana ti pupu so aya ngangu amû yâ ti da ni kue.

Ambeni zo so alondo na ambeni kodro nde si aga na Jérusalem amä toto ti ye ni so na ala ga na yâ ti da ni ti bâ ye so ayeke passé so. Li ti ala akpe tongana ala mä adisciple so ayeke tene ayanga ti kodro ni so. Ala tene: ‘Me azo so ayeke azo ti Galilée. A sara tongana nyen la si ala yeke tene ayanga ti kodro ti e so?’

Na pekoni, Pierre nga na ambeni bazengele aluti na devant ti gbâ ti azo. Pierre afa na azo tongana nyen la a fâ lani Jésus nga tongana nyen la Jéhovah azingo Jésus na kuâ. Pierre atene: ‘Fadeso  Jésus ayeke na yayu na mbage ti maboko ti Nzapa ti koli, na lo tokua yingo vulu so a mû zendo ni. A yeke ndali ni la ala bâ nga ala mä tënë ti amiracle so.’

Tënë ti Pierre so andu bê ti azo ni mingi, na ala ngbâ ahunda ndo, atene: “A lingbi e sara nyen?” Lo tene na ala: ‘Ala changé bê ti ala na zia a batize ala na iri ti Jésus. Ala nga kue ayeke wara ande yingo vulu so a mû tongana matabisi.’ Na lango ni so, azo 3 000 awara batême. Ti londo na lango ni so ti gue na ni, wungo ti adisciple akomanse ti gue na li ni na loro. Na lege ti mungo maboko ti yingo vulu, abazengele azia gere ti gbâ ti acongrégation na sese, tongaso si ala lingbi ti fa na adisciple ni aye kue so Jésus ahunda na ala ti sara.

“Tongana mo tene na yanga ti mo dandara so Jésus ayeke Seigneur, nga na yâ ti bê ti mo, mo mä na bê so Nzapa azingo lo na kuâ, a yeke sö mo ande.”—aRomain 10:9