Gue na tënë ti yâ ni

Gue na li ti atënë ni

 YE TI MANDA 79

Jésus asara gbâ ti amiracle

Jésus asara gbâ ti amiracle

Jésus aga lani na sese ti fa nzoni tënë ti Royaume ti Nzapa. Ti fa ye so Jésus ayeke sara ande tongana lo ga Gbia, Jéhovah amû na lo yingo vulu ti tene lo sara na amiracle. Lo peut lani ti sava amara ti kobela kue. Na ndo kue so lo gue dä, azo so ayeke na kobela ayeke ga na terê ti lo ti tene lo aidé ala, lo yeke sava lani ala kue. Lo sara si lê ti azo so abuba azi, azo so mê ti ala akanga akiri amä ndo, azo so mbeni mbage ti terê ti ala akui ala kiri ala tambela, nga lo tomba asioni yingo na yâ ti azo. Même tongana azo ni andu gï yanga ti bongo ti lo, ala yeke wara sava. Azo amû peko ti Jésus na ndo kue. Même tongana Jésus ayeke na nzara ti duti gï lo oko, si azo aga, lâ oko lo tomba ala na terê ti lo ape.

Mbeni lâ, azo aga na mbeni koli so mbage ti terê ti lo akui na da so Jésus ayeke dä. Me teti so azo ayeke na yâ ti da ni mingi, ala wara lege ti linda ape. Tongaso, ala koro dû na li ti da ni na ala descend na koli ni na terê ti Jésus. Jésus angbâ atene na koli ni: ‘Londo mo tambela.’ Tongana koli ni alondo atambela, li ti azo akpe kue.

Na mbeni ngoi ni nde, tongana Jésus asi na yâ ti mbeni kete kodro, ambeni koli bale-oko so ayeke na kobela ti buruma angbâ ayo, na ala dekongo, atene: ‘Jésus, sara nzoni na e!’ Na ngoi ni lani, a gbanzi na azo ti buruma ti ga nduru na azo. Jésus atene na akoli ni ti gue na temple, tongana ti so Ndia ti Jéhovah ahunda na azo ti buruma ti sara tongana kobela ti ala ni ahunzi. Na lege ti guengo ni, kobela ti ala ni ahunzi. Tongana mbeni oko ti azo ti buruma ni abâ so kobela ti lo ni ahunzi awe, lo kiri lo ga lo mû merci  na Jésus nga lo gonda Nzapa. Na popo ti ala bale-oko so, gï zo oko la aga atene merci na Jésus.

Mbeni wali so mbeni kobela aninga na terê ti lo asara ngu 12 awe apensé ti lo so a lingbi ti sava lo encore ape. Lo ga na peko ti Jésus na milieu ti gbâ ti azo na lo ndu yanga ti bongo ti lo ti ndö ni. Droit, wali ni awara sava. Tongana ye ni so asi, Jésus ahunda ndo, atene: ‘Zo wa la andu mbi?’ Mbeto ahon ndö ti wali ni, me lo ga na mbage ti Jésus na lo tene na lo tâ tënë. Jésus adë bê ti lo, atene: ‘Molenge ti mbi ti wali, gue na siriri.’

Mbeni mokonzi so iri ti lo ayeke Jaïrus aga adema terê na Jésus, lo tene: ‘Pardon ga na da ti mbi! Terê ti kete molenge ti mbi ti wali ason ngangu mingi.’ Me kozo si Jésus asi na da ti Jaïrus, molenge ni akui. Tongana Jésus asi, lo bâ so gbâ ti azo aga ti toto legeoko na fami ni. Jésus atene na ala, atene: ‘Ala toto ape; gï lango la lo ngbâ ti lango so.’ Lo ngbâ lo gbu maboko ti molenge-wali ni na lo tene: “Molenge, londo!” Droit lo londo, na Jésus atene na babâ na mama ti molenge ni ti mû mbeni ye ti tengo na molenge ni. Tara ti bâ tongana nyen la terê ti babâ na mama ni anzere!

“Nzapa asoro lo na lege ti yingo vulu nga na ngangu, na lo tambela na yâ ti kodro ni, lo sara aye ti nzoni, lo sava azo kue so Zabolo asara pasi na ala. Lo wara lege ti sara aye so kue ngbanga ti so Nzapa ayeke lani na lo.”—Kusala 10:38