Gue na tënë ti yâ ni

Gue na li ti atënë ni

 YE TI MANDA 82

Jésus afa na adisciple ti lo tongana nyen ti sambela

Jésus afa na adisciple ti lo tongana nyen ti sambela

Aye kue so aFarizien ayeke sara lani ayeke gï ti tene azo agonda ala. Tongana ala sara mbeni nzoni ye, ala ye si azo kue ahinga. Ala yeke sambela na ando so azo ayeke dä gbani si azo abâ ala. Ala yeke bata ayongoro sambela na li na ala yeke tene ni na yâ ti asynagogue nga na ando so alege atingbi terê dä tongaso si azo amä ala. Ni la, li ti azo akpe lani tongana Jésus atene: ‘Ala sambela tongana aFarizien ape. Ala pensé atene gbâ ti atënë ti ala ni so ayeke nzere na Nzapa mingi, andâ ye oko ape. Sambela ayeke mbeni ye so apassé gï na popo ti mo na Jéhovah. Kiri gï na ndö ti atënë oko fani mingi ape. Jéhovah aye si mo tene na lo ye so ayeke tâ na yâ ti bê ti mo kâ.

‘A lingbi ala sambela tongaso: “Babâ ti e so mo yeke na yayu. Zia a sara si iri ti mo aga nzoni-kue. Zia Royaume ti mo aga. Zia a sara ye  so bê ti mo aye, na yayu legeoko nga na ndö ti sese.”’ Jésus atene nga na ala so a lingbi ala sambela nga ti wara kobe ti ala ti lango ni, ti tene a pardonné asiokpari ti ala nga ndali ti ambeni tënë ni nde so abâ zo oko oko.

Jésus atene: ‘Ala zia ti sambela ape. Ala ngbâ ti hunda anzoni ye na Babâ ti ala, Jéhovah. Ababâ wala amama kue aye ka ti mû anzoni ye na amolenge ti ala. Tongana molenge ti mo ahunda na mo mapa, eskê mo yeke mû ande na lo tênë? Tongana lo hunda na mo susu, eskê mo yeke mû ande na lo ngbo?’

Na pekoni Jésus afa ndani: ‘Asingana ala so ahinga ti mû anzoni ye na amolenge ti ala, si Babâ ti ala, Jéhovah, alingbi ande pëpe ti sara ye mingi ahon so na mungo na ala yingo vulu? Ye so ala bezoin ti sara ayeke gï ti hunda ni awe.’ Eskê mo yeke sara ka ye alingbi na wango ni so? Mo yeke sambela ka ngbanga ti aye wa?

“Ala ngbâ ti hunda ye, na a yeke mû ni na ala. Ala ngbâ ti gi ye, na ala yeke wara ni. Ala ngbâ ti pika yanga-da, na a yeke zi ni na ala.”—Matthieu 7:7