Gue na tënë ti yâ ni

Gue na li ti atënë ni

 YE TI MANDA 69

Gabriel aga ti bâ Marie

Gabriel aga ti bâ Marie

Mbeni fami ti Élisabeth ayeke dä so ade maseka, iri ti lo ayeke Marie. Lo lango na gbata ti Nazareth na Galilée. Marie na Joseph, so ayeke mbeni charpentier, aleke ti tene ala mû terê. Na ngoi so ngo ti Élisabeth asara nze omene awe, ange Gabriel asi na Marie. Lo tene: ‘Bara mo, Marie. Jéhovah abâ mo tâ na nzoni lê mingi.’ Marie ahinga li ti lo na tënë so Gabriel aye ti tene so ape. Gabriel angbâ atene: ‘Mo yeke mû ande ngo na mo yeke dü mbeni molenge-koli, na a lingbi mo zia iri ti lo Jésus. Lo yeke komande ande tongana Gbia. Royaume ti lo ayeke ngbâ ande lakue lakue.’

Marie atene na lo: ‘Me ade mbi hinga koli ape. Mbi peut ti dü molenge tongana nyen?’ Gabriel atene na lo: ‘Ye oko ti karango Jéhovah ayeke dä ape. Yingo vulu ayeke ga ande na ndö ti mo, na mo yeke dü ande mbeni molenge-koli. Fami ti mo Élisabeth kue ayeke na ngo.’ Marie angbâ atene: ‘Mbi yeke ngbâa ti Jéhovah. Zia ye ni asi na mbi gï tongana ti so mo tene.’

 Marie ague na mbeni gbata so ayeke na yâ ti ahoto, lo gue ti bâ Élisabeth. Na ngoi so Marie abara lo, Élisabeth asentir so bébé so ayeke na yâ ti lo ahuru. Élisabeth asi na yingo vulu, na lo tene: ‘Marie, Jéhovah asara tufa na ndö ti mo. Mbi yeke na kota pasa ti wara mama ti Seigneur ti mbi na da ti mbi.’ Marie atene: ‘Mbi sepela Jéhovah na bê ti mbi kue.’ Marie angbâ na terê ti Élisabeth nze ota, na pekoni lo kiri na ndo ti lo na Nazareth.

Na ngoi so Joseph ahinga so Marie ayeke na ngo, lo ye ti kangbi na lo. Me mbeni ange aga na lo na yâ ti bango li na atene na lo: ‘Sara mbeto ape ti sara mariage na lo. Lo sara mbeni ye ti sioni ape.’ Tongaso Joseph amû Marie ti ga wali ti lo na lo gue na lo na da ti lo.

“Jéhovah ayeke sara ye kue so lo ye ti sara na yayu, na ndö ti sese.”—Psaume 135:6