Gue na tënë ti yâ ni

Gue na li ti atënë ni

 YE TI MANDA 71

Jéhovah abata Jésus

Jéhovah abata Jésus

Na mbeni kodro so ayeke na mbage ti est ti Israël, a yeke wara lani ambeni zo so ayeke mä na bê so atongoro alingbi ti fa lege na ala. Na mbeni bï, ambeni koli so alondo na mbage ti est abâ mbeni ye so akpa mbeni tongoro so aza na lê ti nduzu na so ayeke bougé, na ala mû pekoni. “Tongoro” ni ague na ala na Jérusalem. Akoli ni akomanse ti hunda azo, ala tene: ‘Molenge so a tene lo yeke ga ande gbia ti aJuif so, lo yeke na ndo wa? E ga ti kuku na gbe ti lo.’

Na ngoi so Hérode, so ayeke gbia ti Jérusalem, amä tënë ti fini gbia ni so, bê ti lo agi lo ngangu. Lo hunda aprêtre-mokonzi, lo tene: ‘Na ndo wa la a tene a yeke dü gbia ni so dä?’ Ala tene na lo, atene: ‘Aprophète atene so a yeke dü lo na Bethléhem.’ Tongaso Hérode airi akoli so alondo na mbage ti est si aga so, na lo tene na ala, lo tene: ‘Ala gue na Bethléhem, ala gi molenge ni so. Na ala kiri ala fa na mbi place so lo yeke dä. Mbi kue mbi ye ti kuku na gbe ti lo.’ Andâ mvene la lo yeke tene so.

“Tongoro” ni akomanse ti bougé encore. Akoli ni amû peko ni juska na Bethléhem. “Tongoro” ni ague aluti na li ti mbeni da, na akoli ni alinda da ni. Ala wara Jésus na mama ti lo Marie. Ala kuku na gbe ti kete molenge ni na ala mû na lo acadeau ti lor, vuru dukane nga na myrrhe. Eskê a yeke Jéhovah la atokua biani akoli so ti wara Jésus? Ên-ën.

Na bï ni, Jéhovah atene na Joseph na yâ ti bango li, lo tene: ‘Hérode ayeke gi ti fâ Jésus. Mû wali ti mo na molenge ni mo kpe mo gue na ala na Égypte. Ngbâ kâ juska mbi tene na mo ti kiri si.’ Joseph na sewa ti lo alondo hio ague na Égypte.

Jéhovah atene na akoli so alondo na est si aga so ti kiri na mbage ti Hérode ape. Tongana Hérode aga ti hinga so ala kiri na mbage ti lo ape, ngonzo asara lo sioni. So lo gi Jésus gbä si lo wara lo ape so, lo mû yanga ti tene a fâ akete molenge-koli kue ti Bethléhem so ngu ti ala na ti Jésus ayeke oko. Me ye oko asi na Jésus ape, lo yeke ti lo kâ na Égypte awe.

 Ambeni ngoi na pekoni, Hérode akui. Jéhovah atene na Joseph, atene: ‘Fadeso mo lingbi ti kiri senge.’ Joseph, Marie nga na Jésus akiri na Israël, na ala sara kodro na gbata ti Nazareth.

“Tënë so asigi na yanga ti mbi ayeke duti nga tongaso . . . nyen na nyen tënë ti mbi ayeke sara ye so mbi tokua lo ti sara.”—Ésaïe 55:11