Ambeni ngoi na peko ti so Gbia Nébucadnezzar abâ li ti lo na ndö ti mbeni statue so, lo sara mbeni kota statue na lor. Lo zia ni na yâ ti kpangbala ndo ti Dura na lo iri akota zo ti kodro ni kue ti ga ti bungbi na devant ni. Shadrak, Méshak na Abednégo kue ayeke na popo ti azo ni. Gbia ni amû yanga, atene: ‘Tongana ala mä gï totongo ti didi, ti harpe nga na ti kota flûte, zo kue adoit ti kuku na gbe ti statue ni! Mo zo so mo kuku na gbe ni ape, a yeke bi mo na yâ ti mbeni four ti wâ so amû wâ ngangu.’ Eskê aHébreu ota so ayeke kuku ande na gbe ti statue ni, wala ala yeke voro ti ala gï Jéhovah awe?

Na pekoni gbia ni amû yanga ti tene a pika mozoko ni. Zo kue akuku na avoro statue ni, gï Shadrak, Méshak na Abednégo la asara ni ape. Ambeni koli abâ ala na ala sara tënë ni na gbia ni, ala tene: ‘Akoli ota so ake ti kuku na gbe ti statue ni.’ Nébucadnezzar atokua ndo na ala, lo tene: ‘Mbi yeke kiri ti mû na ala mbeni pasa ti voro statue ni. Tongana ala sara ni ape, mbi yeke bi ala na yâ ti four ti wâ. Mbeni nzapa ti sö ala na yâ ti maboko ti mbi ayeke dä ape.’ Ala kiri tënë, atene: ‘E bezoin ti tene a mû na e mbeni pasa ape. Nzapa ti e alingbi ti sö e. Me, même si lo sara ni ape, gbia, e yeke voro statue ni ape.’

Ngonzo asara Nébucadnezzar sioni. Lo tene na azo ti lo, lo tene: ‘Ala chauffé four ni fani mbasambala ahon ti so a yeke chauffé ka na ni!’ Na pekoni lo mû yanga na aturugu ti lo, lo tene: ‘Ala kanga akoli so, ala bi ala na yâ ni!’  Four ni achauffé tâ ngangu mingi a sara si na ngoi so aturugu ni aga nduru na ni, ala kui droit. AHébreu ota ni atï na yâ ti wâ ni. Me na ngoi so Nébucadnezzar abâ ndo na yâ ni, lo bâ akoli osio la ayeke tambela na yâ ti four ni, me akoli ota ape. Mbeto akomanse ti sara lo na lo hunda akota zo ti kodro ni, lo tene: ‘Eskê e bi fade akoli ota na yâ ti wâ ape? Mbi bâ azo osio, na mbeni oko akpa mbeni ange!’

Nébucadnezzar ague nduru na four ni na lo iri ndo, lo tene: ‘Ala sigi, ala awakua ti Nzapa so ayeke na nduzu na ndö ti aye kue!’ Li ti azo kue akpe tongana ala bâ Shadrak, Méshak na Abednégo asigi sân ti tene wâ agbi ala. Terê ti ala, kuä ti li ti ala nga na abongo ti ala agbi ape, guru ti wâ afun nga même na terê ti ala ape.

Nébucadnezzar atene: ‘Nzapa ti Shadrak, Méshak na Abednégo ayeke kota. Lo tokua mbeni ange ti ga ti sö ala. Mbeni nzapa ti lingbi na Nzapa ti ala ayeke dä ape.’

Legeoko tongana aHébreu ota so, eskê mo leke na bê ti mo ti ngbâ be-ta-zo na Jéhovah atâa nyen la asi?

“A yeke gï Jéhovah Nzapa ti mo si mo doit ti voro lo, nga gï lo oko si mo doit ti sara na lo kusala so ayeke nzoni-kue.”—Matthieu 4:10