Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Aye so mo lingbi ti manda na lege ti Bible

 YE TI MANDA 60

Mbeni Royaume so ayeke ngbâ lakue lakue

Mbeni Royaume so ayeke ngbâ lakue lakue

Na mbeni bï, Gbia Nébucadnezzar abâ li ti lo, na bango li ni so ayeke tâ nde mingi. A sara si lo gi bê ti lo mingi juska lo peut ti lango ape. Lo iri azo ti lo ti sarango magie ti ga, na lo tene na ala: ‘Ala fa na mbi nda ti bango li ti mbi so.’ Ala tene: ‘Gbia, fa na e bango li ti mo ni.’ Me Nébucadnezzar atene: ‘Ên-ën! Ala fa na mbi bango li wa la mbi bâ, tongana a yeke tongaso ape mbi yeke fâ ala.’ Ala kiri ala tene na lo: ‘Fa na e bango li ti mo ni, na pekoni e yeke fa ndani.’ Lo tene na ala: ‘Ala kue atara ti handa mbi la. Ala fa na mbi bango li ti mbi ni!’ Ala ngbâ atene na lo: ‘Mbeni zo ti sara ye so mo hunda so ayeke dä ape. Ye so mo hunda so zo apeut ti sara ni ape.’

Ngonzo asara Nébucadnezzar ngangu juska a sara si lo mû yanga ti tene a fâ akoli kue so ayeke na ndara mingi na yâ ti kodro ni. Tënë ni so abâ nga Daniel, Shadrak, Méshak na Abednégo. Daniel ahunda na gbia ni ti mû ngoi kete na lo. Na pekoni lo na akamarade ti lo asambela Jéhovah ti hunda na lo ti aidé ala. Nyen la Jéhovah asara?

Na yâ ti mbeni vision, Jéhovah afa na Daniel bango li ti Nébucadnezzar ni nga lo fa na lo ndani. Na ndade ni, Daniel ague abâ zo ti kua ti gbia ni na lo tene: ‘Fâ zo oko ape. Mbi peut ti fa bango li ti gbia ni.’ Zo ti kua ni ague na Daniel na Nébucadnezzar. Daniel atene na gbia ni: ‘Nzapa afa na mo ye so ayeke si ande kekereke. Bâ bango li ti mo ni la: Mo bâ mbeni kota statue so li ni ayeke na lor, kate ni na maboko ni ayeke na argent, yâ ni na cuisse ni ayeke na cuivre, agere ni ayeke na wen, nga ti alê ti gere ni, ambeni mbage ni ayeke na wen si ambeni mbage ni ayeke na popoto. Mbeni tênë so a zi na terê ti mbeni hoto aga apika statue ni na mbage ti gere ni; a fâ yâ ni fuku fuku, na pupu amû ni kue ahon na ni. Me tênë ni aga mbeni kota hoto na amû ndö ti sese kue.’

 Na pekoni Daniel atene: ‘Bâ nda ti bango li ti mo ni la: Royaume ti mo la ayeke li ni so ayeke na lor so. Mbage so ayeke na argent ayeke royaume so ayeke ga na peko ti mo. Na pekoni mbeni ayeke tongana cuivre, na lo yeke komande ande na ndö ti sese kue. Mbeni so ayeke ga ande na pekoni ayeke ngangu tongana wen. Na nda ni, a yeke wara ande mbeni royaume so yâ ni akangbi use, ambeni mbage ni ayeke ngangu tongana ti wen nga ambeni mbage ni awoko tongana popoto. Tênë so alondo na mbeni hoto si aga so ayeke Royaume ti Nzapa. Lo yeke neka aroyaume ni so kue na lo yeke ngbâ lakue lakue.’

Nébucadnezzar angbâ akuku na devant ti Daniel, lo kpo li ti lo na sese. Lo tene: ‘Nzapa ti mo la afa na mo bango li ni so. Mbeni Nzapa ti lingbi na lo ayeke dä ape.’ Ahon ti tene lo fâ Daniel, Nébucadnezzar azia lo na ndö ti azo kue so ahinga ndo mingi nga lo sara si lo komande na ndö ti kodro-komanda ti Babylone. Mo bâ tongana nyen la Jéhovah akiri tënë na sambela ti Daniel?

“A bungbi ala na ndo so a iri ni na yanga ti Hébreu, a tene: Harmaguédon.”​—Apocalypse 16:16