Gue na tënë ti yâ ni

Gue na li ti atënë ni

 YE TI MANDA 66

Esdras afa Ndia ti Nzapa

Esdras afa Ndia ti Nzapa

A sara ngu 70 awe la gbâ ti azo ti Israël akiri na Jérusalem, me mingi ti ambeni angbâ ti sara kodro na ando nde nde na yâ ti ambage ti kodro-togbia ti Perse. Mbeni oko ti ala ayeke mbeni prêtre so iri ti lo ayeke Esdras, so ayeke fa Ndia ti Jéhovah. Lo mä so azo na Jérusalem ayeke sara ye alingbi na Ndia ape, na lo ye ti gue kâ ti aidé ala. Artaxerxès, gbia ti Perse, atene na lo, atene: ‘Nzapa amû na mo ndara ti fa Ndia ti lo. Gue mo mû zo kue so mo ye ti tene lo gue na mo.’ Esdras awara terê na azo kue so aye ti kiri na Jérusalem. Ala sambela Jéhovah ti tene Lo bata ala na ngoi ti voyage ni, na pekoni ala londo ague.

Nze osio na pekoni, ala si na Jérusalem. Amokonzi ni kâ atene na Esdras, atene: ‘Azo ti Israël ake yanga ti Jéhovah na ala sara mariage na awali so ayeke voro anzapa ti wataka.’ Nyen la Esdras asara? Na lê ti azo kue, Esdras asara agenou na lo sambela, lo tene: ‘Jéhovah, mo sara ye mingi ndali ti e, me e sara siokpari na terê ti mo.’ Azo ni achangé sarango ye ti ala, me ala ngbâ lani ti sara ambeni ye so ayeke na lege ni ape. Esdras asoro a-ancien nga na ajuge ti bâ lege ti atënë ni so. Na yâ ti anze ota so aga na pekoni, a tomba azo kue so avoro Jéhovah ape.

Ngu bale-oko na use ahon fadeso awe. Na oko ngoi ni, a leke agbagba so angoro Jérusalem. Tongaso Esdras abungbi azo ni na mbeni ndo so azo ayeke gue ka dä mingi ti diko na ala Ndia ti Nzapa. Na ngoi so Esdras azi mbeti ni, azo ni alondo. Ala sepela Jéhovah, na ala pika maboko ti ala ti fa so ala yeda na ni. Na pekoni Esdras adiko nga lo fa nda ti Ndia ni, na azo ni adengi mê amä lo nzoni. Ala yeda so ala kiri ahon yongoro na Jéhovah encore, na ala toto. Na ndade ni, Esdras akiri adiko Ndia ni na ala. Ala hinga so lango ti tene ala sara Matanga ti Akpangba aga nduru awe. Hio, ala komanse ti leke matanga ni.

Na yâ ti lango mbasambala so ala sara na matanga ni, terê ti azo kue anzere na ala kiri merci na Jéhovah  ndali ti so lo sara si kobe asigi mingi na ngoi ni so. Ngbene ye na ngoi ti Josué, a sara mbeni Matanga ti Akpangba tongana ti so ape. Na peko ti matanga ni, azo ni abungbi na ala sambela, atene: ‘Jéhovah, mo zi e na gbe ti ngbâa, mo mû na e kobe na yâ ti benyama na mo mû na e pendere ndo so. Me fani mingi, e ke yanga ti mo. Mo tokua aprophète ti gboto mê ti e, me e mä ndo ape. Atâa so kue, mo kanga bê. Mo bata zendo so mo mû lani na Abraham. Fadeso e mû zendo na mo so e yeke mä yanga ti mo.’ Ala sara zendo ti ala ni na mbeti, na amokonzi, azo ti mara ti Lévi nga na aprêtre akpo nzoroko dä.

“Ngia ayeke na ala so amä tënë ti Nzapa na abata ni!”​—Luc 11:28