Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Kiri na Jéhovah

 MBAGE 4

Tongana bê ti mo afâ ngbanga na ndo ti mo: “Mo sukula mbi si siokpari ti mbi awe”

Tongana bê ti mo afâ ngbanga na ndo ti mo: “Mo sukula mbi si siokpari ti mbi awe”

“Fini kua so mbi wara asara si sewa ti mbi aduti nzoni, me a sara nga si mbi komanse ti sara mara ti asioni ye kue. Mbi komanse ti sara afête, mbi mû mbage na aye ti poroso, mbi gue même na eglize. A sara ngu 40 mbi gue na bungbi ape. Tongana angu mingi ayeke hon, mbi pensé mbi tene ti mbi awe, Jéhovah ayeke pardonné ti lo mbi encore ape. Lakue bê ti mbi ayeke fâ ngbanga na ndo ti mbi. Kozoni kue, kozo si mbi tï lani na yâ ti sarango asioni ye, mbi hinga lani tâ tënë bien.”—Martha.

TONGANA bê ti mo afâ ngbanga na ndo ti mo, a lingbi ti duti tongana mbeni nengo kungba na ndo ti mo. Gbia David atene: “Sioye ti mbi ahon ndo ti mbi awe; a ne tongana kungba so ahon ndo ti mbi.” (Psaume 38:5). Ambeni Chrétien ayeke dä so vundu ahon ndo ti ala ndali ti so ala pensé so Jéhovah alingbi ti pardonné ala encore ape (2 aCorinthien 2:7). Pensé ti ala ni ayeke na lege ni? Même tongana mo sara mbeni kota siokpari, mo yeke yongoro mingi na Jéhovah si lo lingbi ti pardonné mo lâ oko ape? Ên-ën, a yeke tongaso ape.

“Zia e bungbi [e] leke tënë”

Jéhovah ake pëpe azo so asara siokpari si ala changé bê ti ala. Lo yeke yamba ala. Na yâ ti parabole ti molenge so abuba aye ti lo kue, Jésus ahaka Jéhovah na mbeni babâ ti ndoye so molenge ti lo azia dä ti lo na lo gue lo sara aye ti kirikiri. A si na mbeni ngoi, molenge ni amû desizion ti kiri na yanga-da. “Tongana [molenge ni a]ngbâ ayo, lê ti babâ ti lo atï na ndo ti lo na mawa ti lo asara babâ ni. Babâ ni akpe loro atï na ndo ti go ti lo na lo su ngbangba ti lo a ninga.” (Luc 15:11-20). Mo ye ti ga nduru mingi na Jéhovah me mo bâ so mo “ngbâ ayo” na lo? Legeoko tongana ti babâ ti yâ ti toli ti Jésus so, Jéhovah ayeke sara ye na mo na nzoni bê. Lo yeke ku kungo ti yamba mo.

Ka tongana mo pensé so Jéhovah alingbi ti pardonné mo ape ndali ti so asiokpari so mo sara ayeke sioni mingi wala ayeke mingi? Bâ tënë so Jéhovah atene na Ésaïe 1:18, so atene: “L’Éternel atene, I ga fadeso, zia e bungbi ti leke tënë: kamême siokpari ti i ayeke tongana bengba ye, fade a vuru tongana neige.” Biani, même tongana asiokpari ti e abe tongana mbeni bengba ye so acallé na tere ti mbeni vuru bongo, Jéhovah ayeke pardonné ni.

Jéhovah aye pëpe ti tene mo ngbâ lakue ti bâ pasi ndali ti so bê ti mo afâ ngbanga na ndo ti mo. Tongaso, nyen la mo lingbi ti sara ti tene Nzapa apardonné mo nga ti tene bê ti mo afâ ngbanga na ndo ti mo ape tongaso si bê ti mo adë? Bâ aye use so David asara. Kozoni, lo tene: “Fade mbi fa tënë ti kengo-ndia ti mbi na [Jéhovah].” (Psaume 32:5). Girisa ape so, Jéhovah atisa mo awe ti ga nduru na lo na lege ti sambela nga ti tene ala “leke tënë” na popo ti ala. Yeda na tisango ndo ni. Fa asiokpari ti mo na Jéhovah nga fa atënë ti bê ti mo na lo. Ye so asi na David, a mû lege na lo ti sambela Jéhovah na bê ti lo kue, lo tene: “Mo sukula mbi si siokpari ti mbi awe . . O Nzapa, bê so afâ awe na ayeke na vundu, Mo ke pëpe.”—Ps. 51:4, 19.

Use ni, David awara mungo maboko na mbage ti prophète Nathan, so ayeke lani watokua ti Nzapa  (2 Samuel 12:13). Laso, Jéhovah azia a-ancien ti congrégation so a fa ye na ala nzoni ti mû maboko na aita so asara siokpari si achangé bê ti ala ti tene ala kiri aleke songo ti ala na Jéhovah. Tongana mo gue na mbage ti a-ancien, ala yeke diko aversê ti Bible na mo nga ala yeke sambela na mo ti dë bê ti mo, ti zi asioni bango ndo so mo yeke na ni nga ti mû maboko na mo ti wara sava na lege ti yingo.—Jacques 5:14-16.

Jéhovah aye ti tene mo wara dengo bê so zo ayeke wara tongana bê ti lo afâ ngbanga na ndo ti lo ape

‘Ngia ayeke na zo so a pardonné kengo-ndia ti lo awe’

Biani, a lingbi ti duti ngangu mingi na mo ti fa asiokpari ti mo na Jéhovah nga ti gue na mbage ti a-ancien. David kue apensé tongaso lani. Lo “sara tënë pëpe” na ndo ti asiokpari ti lo teti mbeni ngoi (Psaume 32:3). Ye oko, a si na mbeni ngoi, lo fa asiokpari ti lo nga lo changé bê ti lo na lo bâ so lo wara aye ti nzoni mingi ndali ni.

Mbeni nzoni ye so David awara ayeke so lo kiri lo wara ngia ti lo. Lo tene: “Ngia ayeke na zo so kengo-ndia ti lo a pardonné awe, na lo so siokpari ti lo a honde awe.” (Psaume 32:1). Lo sambela nga lo tene: “O [Jéhovah]! Mo lungula yanga ti mbi, na fade yanga ti mbi asepela Mo.” (Psaume 51:17). Bê ti David adë lani ndali ti so bê ti lo afâ ngbanga na ndo ti lo encore ape nga lo mû merci na Nzapa so apardonné lo. Ye so apusu lo ti sara tënë ti Jéhovah na azo.

Jéhovah aye ti tene mo wara dengo bê so zo ayeke wara tongana bê ti lo afâ ngbanga na ndo ti lo ape. Lo ye nga ti tene, mo sara tënë ti lo nga na aye so lo leke na bê ti lo ti sara na azo na bê ti mo kue nga na ngia. Me lo ye pëpe ti tene mo sara ni na vundu na bê (Psaume 65:2-5). Girisa ape so lo hunda na mo ti gue na mbage ti lo ti “mbô asiokpari ti [mo], ti tene angoi ti kiringo ti wara ngangu alingbi ti londo na gbele Jéhovah ti ga”.—Kusala 3:19.

A yeke ye so asi lani na Martha. Lo tene: “Molenge ti mbi ti koli angbâ lani ti tokua na mbi a-Tour ti Ba Ndo nga na a-Réveillez-vous ! Yeke yeke, mbi komanse ti kiri ti sara songo na Jéhovah. Ye so ayeke lani ngangu mingi na mbi ti sara ti kiri na bungbi ayeke ti hunda pardon ndali ti asiokpari kue so mbi sara. Me na nda ni, mbi sambela Jéhovah na mbi hunda lo ti pardonné mbi. A yeke ngangu ti yeda so mbi sara ngu 40 si mbi ga ti kiri na Jéhovah. Ye so asi na mbi afa polele so même na peko ti angu mingi, zo alingbi ti kiri ti sara na Nzapa na ti kiri na yâ ti ndoye ti lo.”