Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Kiri na Jéhovah

Lettre ti Bebungbi

Lettre ti Bebungbi

Na aita ti e so e ye ala mingi:

Tongana ti so ala hinga, Bible ayeke mbeni mbeti so asara tënë mingi na ndo ti azo. Mingi ti azo so Bible asara tënë ti ala ayeke akoli na awali so ayeke be-ta-zo so awara lani mara ti akpale so e yeke wara ni. Ala yeke lani na “abibe tongana ti e”. (Jacques 5:17). Akpale asara si vundu ahon ndo ti ambeni lani nga ala yeke dema. Ti ambeni, a yeke afami wala amba ti ala awakua ti Jéhovah la azia vundu na bê ti ala. Nga, ti ambeni mingi, ala sara vundu lakue ndali ti afaute so ala sara.

Akpale so asara si ambeni ague yongoro na Jéhovah. Me eskê ala zia lani Jéhovah biani biani? Oko ape. Mingi ti ala ayeke lani tongana zo ti sungo psaume so asambela, a tene: “Mbi gue kirikiri tongana ngasangbaga so agirisa; Mo gi boi ti Mo, teti mbi girisa commandement ti Mo pëpe.” (Psaume 119:176). Mo kue mo wara mara ti bango ndo so awe?

Jéhovah agirisa lâ oko pëpe awakua ti lo so ahon yongoro na kundu ti lo. Me, fani mingi lo yeke mû maboko na ala na lege ti amba ti ala aChrétien ti kiri na yâ ti kundu ni. Na tapande, bâ tongana nyen la Jéhovah amû maboko na wakua ti lo Job so awara lani akota kpale mingi: mosoro ti lo akiri na peko, azo so lo ye ala mingi akui nga lo wara ngangu kobela. Azo so adoit fade ti mû maboko na lo atene na lo atënë ti mbana. Me lâ oko lo tourné peko na Jéhovah ape atâa so na mbeni ngoi bango ndo ti lo ayeke na lege ni ape (Job 1:22; 2:10). Tongana nyen la Jéhovah amû maboko na Job ti kiri ti wara nzoni bango ndo?

Jéhovah amû maboko na Job na lege ti Elihu so ayeke nga wakua ti Jéhovah tongana lo. Na ngoi so Job afa akpale ti lo, Elihu amä lo na aye so Job atene na lo apusu lo ti sara tënë. Tënë ti nyen la lo yeke tene? Lo yeke kasa Job? Lo yeke tara ti pusu Job ti bâ so tënë ayeke na li ti lo? Wala lo yeke zia kamene na lê ti Job? Elihu abâ so lo la lo yeke nzoni ahon Job? Lo pensé tongaso kete ape. Yingo ti Nzapa apusu Elihu ti sara tënë so: “Bâ, na gbele Nzapa mbi yeke legeoko tongana mo, a sara mbi na ndô nga.” Na pekoni lo dë bê ti Job, lo tene: “Fade mbeto ti mbi amû mo pëpe, na ngangu ti mbi ane na ndo mo pëpe.” (Job 33:6, 7). Ahon ti tene Elihu azia vundu na ndo ti vundu ti Job, lo mû wango na Job na nzoni bê nga lo kpengba lo.

Zia ala hinga so a yeke na mara ti bibe ti Elihu so la e sigigi na brochure so. Kozoni kue, e dengi me e mä ambeni ita so ague yongoro na bungbi, e gbu li ti e na ndo ti aye so asi na ala nga na atënë so ala tene na e (aProverbe 18:13). Na pekoni, e bâ ye so Bible afa, e sambela nga e gbu li ti e na ndo ti ambaï ti Bible so afa tongana nyen la Jéhovah amû maboko lani na awakua ti lo na ngoi so ala wara mara ti akpale so. Na nda ni, e tingbi ambaï ni so na aye so asi na ngoi ti e ni la e sigigi na brochure so. E wa ala ti diko brochure so. Zia ala hinga so e ye ala mingi.

Bebungbi ti aTémoin ti Jéhovah