Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Kiri na Jéhovah

 MBAGE 2

Gingo bê: “A pete e mbage na mbage kue”

Gingo bê: “A pete e mbage na mbage kue”

“Mbi na koli ti mbi e sara divorce na peko ti so e sara mariage asara ngu 25. Amolenge ti mbi azia lani lege ti guengo na bungbi. Mbi wara angangu kobela mingi. Mbi tï na yâ ti kota vundu. Ngangu ti mbi ahunzi kue nga mbi lingbi ti sara ye oko ape. Mbi gue encore na abungbi ape, nga mbi fa tënë legeoko na aita ape.”—June.

GINGO BÊ ayeke ti azo kue, même awakua ti Nzapa kue. Mbeni zo ti sungo psaume atene: “Agingo bê ahon ndo ti mbi.” (Psaume 94:19, FD). Jésus nga atene so na angoi ti nda ni “gingo bê ngbanga ti aye ti gigi” alingbi ti sara si a yeke ngangu na e ti voro Jéhovah (Luc 21:34). Mo kue mo yeke gi bê ti mo? Kpale ti nginza, ti sewa wala ti seni asara si mo yeke gi bê ti mo mingi? Tongana nyen la Jéhovah alingbi ti mû maboko na mo ti hon ndo ni?

“Ngangu so ahon ti so zo ayeke na ni”

E wani e lingbi ti hon ndo ti gingo bê ti e ape. Bazengele Paul atene: “A pete e mbage na mbage kue, . . . e hinga mbeni ye ti sarango ni pëpe . . . a kinda e.” Ye oko, lo tene nga so “e lingbi lakue ti yengi tere ti e”, “lakue e wara mbeni lege ti sigigi dä” nga “a futi e pëpe.” Nyen la amû ngangu na e ti kanga bê? A yeke “ngangu so ahon ti so zo ayeke na ni”, ngangu so alondo na Jéhovah, Nzapa ti ngangu ahon kue.—2 aCorinthien 4:7-9.

Gbu li ti mo na ndo ti “ngangu so ahon ti so zo ayeke na ni” so mo wara lani. Mo dabe ti mo na mbeni pendere diskur so mo mä so asara si mo kiri merci mingi na Jéhovah ndali ti nzoni bê ti lo? Na ngoi so mo fa tënë ti beku ti Paradis na azo, mabe so mo yeke na ni na azendo ti Jéhovah akiri akpengba ape? Tongana e yeke gue na abungbi nga e yeke fa tënë ti mabe ti e na azo, e yeke wara ngangu ti hon ndo ti agingo bê ti e nga e yeke wara siriri ti bê tongaso si e voro Jéhovah na ngia.

“Tara L’Éternel, na fade mo bâ Lo yeke nzoni”

Ti tâ tënë ni, gbâ ti aye alingbi ti gboto mo mbage na mbage. Na tapande, Jéhovah ahunda na e ti gi Royaume kozoni nga ti duti na mbeni nzoni programme ti aye ti yingo (Matthieu 6:33; Luc 13:24). Me, ka tongana mo lingbi ti sara na Jéhovah mingi ape ndali ti kangango lege, kobela, wala kpale ti sewa? Ka tongana kua ti nginza ti mo amû ngoi ti mo nga na ngangu so mo yeke fade na bezoin ni ndali ti kua ti congrégation? Tongana mo yeke na gbâ ti aye ti sara, me mo yeke na ngoi nga na ngangu mingi ape ti sara ni, vundu alingbi ti hon ndo ti mo. Peut-être mo hunda même tere ti mo wala Jéhovah ahunda na mo ti sara ye so ahon ngangu ti mo.

Jéhovah ayeke comprendre zo. Lo yeke hunda na e lâ oko ape ti sara ye so ahon ngangu ti e. Lo hinga so a hunda ngoi ti tene e wara ngangu na peko ti mbeni kpale nga na aye so asara e vundu.—Psaume 103:13, 14.

Na tapande, bâ tongana nyen la Jéhovah abâ lani lege ti prophète Élie. Na ngoi so bê ti Élie anze nga mbeto asara lo si lo kpe lani lo gue na yando, eskê Jéhovah asuku na lo nga lo tene na lo ti kiri ti gue ti sara kua so a mû na lo? Ên-ën. Fani use, Jéhovah atokua mbeni ange lo zingo Élie yeke nga lo mû na lo kobe. Atâa so kue, lango 40 na pekoni, Élie angbâ ti gi bê ti lo nga ti sara mbeto. Nyen la Jéhovah akiri asara ti mû maboko na lo? Kozoni, Jéhovah afa so lo lingbi ti bata lo. Use ni,  Jéhovah “asara tënë [na lo] yeke” ti dë bê ti lo. Na nda ni, Jéhovah afa na lo so ambeni wakua ti lo saki na saki ayeke nga dä so ayeke be-ta-zo na lo. Kete na pekoni, Élie akiri akomanse kua ti lo ti prophète na yapungo tere (1 aGbia 19:1-19). Ye so afa na e nyen? Na ngoi so gingo bê ahon ndo ti Élie, Jéhovah asara ye na lo na kangango bê nga na nzoni bê. Jéhovah achangé ape. Lo yeke bâ lege ti e nga tongaso.

Tongana mo yeke gbu li ti mo na ndo ti mbeni ye so mo lingbi ti mû na Jéhovah, sara ye alingbi na ngangu ti mo.Haka pëpe aye so mo lingbi ti sara laso na aye so mo sara ândö. Zia e mû mbeni tapande: Mbeni zo ti kpengo loro so azia lege ti tarango tere ti lo teti anze wala angu mingi alingbi ti komanse ti tara tere ti lo pëpe tâ gi tongana ti so lo yeke sara kozo. Me, lo yeke komanse ti sara ambeni kete kete ye so ayeke mû lege na lo ti wara ngangu. A-Chrétien ayeke tongana azo ti kpengo loro. Ala yeke kpe loro ti wara futa ni (1 aCorinthien 9:24-27). Ngbanga ti nyen mo gi pëpe ti sara mbeni ye so mo pensé so mo lingbi ti sara ni fafadeso? Na tapande, mo lingbi ti leke na bê ti mo ti gue na bungbi. Hunda na Jéhovah ti mû maboko na mo ti sara ye so mo leke na bê ti mo ti sara. Na ngoi so mo kiri mo wara ngangu na lege ti yingo, mo yeke “tara [Jéhovah], na fade mo bâ Lo yeke nzoni.” (Psaume 34:9). Girisa ape so ye kue so mo yeke sara ti fa so mo ye Jéhovah, atâa a yeke kete tongana nyen, lo yeke bâ ni na nene ni.—Luc 21:1-4.

Jéhovah ayeke hunda na e lâ oko ape ti sara ye so ahon ngangu ti e

“Mungo maboko so mbi yeke na bezoin ni depuis”

Tongana nyen la Jéhovah amû ngangu na June ti kiri na lo? Lo tene: “Mbi ngbâ lakue ti sambela Jéhovah lani, mbi hunda lo ti mû maboko na mbi. Mo ye ti bâ, wali ti molenge ti mbi asara na mbi tënë ti mbeni kota bungbi so a yeke sara ni na gbata ti mbi. Mbi soro ti gue na mbeni lango oko ti bungbi ni. Tere ti mbi anzere lani mingi ti kiri na popo ti awakua ti Nzapa. Kota bungbi so ayeke lani mungo maboko so mbi yeke na bezoin ni depuis. Laso, mbi kiri mbi yeke voro Jéhovah na ngia. Mbi yeke na ngia mingi na yâ ti fini ti mbi. Mbi hinga so mbi yeke lakue na bezoin ti aita ti mbi nga mbi bezoin mungo maboko ti ala. Mbi kiri merci ndali ti so ngoi angbâ lani ti tene mbi kiri na Jéhovah.”

TI HINGA AMBENI TËNË

MBETI TI NZAPA TI FINI DUNIA

Mo lingbi ti gbu lê ni tongana nyen na agingo bê?

Tongana ambeni gingo bê akpa ambeni ye so ane na ndö ti e, Bible alingbi mû maboko.