Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 17

Lo fa tënë na Nicodème na bï

Lo fa tënë na Nicodème na bï

JEAN 2:23–3:21

  • JÉSUS ASARA TËNË NA NICODÈME

  • TËNË “A KIRI A DÜ” ZO MBENI AYE TI TENE NYEN?

Na ngoi so Jésus angbâ na Jérusalem ndali ti matanga ti Pâque ti ngu 30 ti ngoi ti e, lo sara amiracle mingi. Ye ti pekoni ayeke so, gbâ ti azo amä na bê na lo. Tënë ti Jésus apika nga bê ti Nicodème, so ayeke mbeni Farizien nga membre ti kota da-ngbanga ti aJuif, so a iri ni Sanhédrin. Ndali ti so lo ye ti hinga ye mingi na ndo ni, lo gue ti bâ Jésus na bï, peut-être ti kpe ti tene a bâ lo. Ngbanga ti so tongana a bâ lo, iri ti lo apeut ti buba na lê ti amba ti lo amokonzi ti aJuif ni.

Nicodème atene: “Rabbi, e hinga so mo yeke mbeni maître so mo londo na Nzapa si mo ga so. Ndali ti so mbeni zo alingbi ti sara aye ti kpene so mo yeke sara so ape, gi tongana Nzapa ayeke na lo si.” Na yâ ti kiringo tënë ti lo, Jésus afa na Nicodème so, tongana mbeni zo aye ti lï na yâ ti Royaume ti Nzapa, a lingbi “a kiri a dü lo si.”—Jean 3:2, 3.

Me, tongana nyen la a peut ti kiri ti dü mbeni zo so a dü lo awe? Nicodème ahunda ndo atene: “Lo lingbi pëpe ti lï na yâ ti mama ti lo ti fani use ni ti tene a kiri a dü lo, ni la ape?”—Jean 3:4.

Ên-ën, nda ti tënë ni ayeke tongaso ape. Jésus afa ndani, lo tene: “Tongana a dü zo na ngu nga na yingo ape, lo lingbi ti lï na yâ ti Royaume ti Nzapa ape.” (Jean 3:5). Na ngoi so Jésus awara lani batême nga yingo vulu aga na ndo ti lo, a yeke mo bâ mo tene a dü lo “na ngu nga na yingo”. Na ngoi ni so, mbeni go asara tënë na yayu atene: “So ayeke Molenge ti mbi so mbi ye lo mingi, bê ti mbi ayeda na lo.” (Matthieu 3:16, 17). Na sarango tënë tongaso, Nzapa afa so lo dü Jésus tongana molenge ti lo na lege ti yingo, so ayeke na beku ti lï ande na yâ ti Royaume ti lo so ayeke na yayu. Na pekoni, na Pentecôte ti ngu 33 ti ngoi ti e, yingo vulu aga na ndo ti ambeni zo so a batize ala awe, na ye so asara si a yeke kiri ti dü ande ala mbeni ti ga amolenge ti Nzapa so ayeke na yayu.—Kusala 2:1-4.

A yeke lani ngangu na Nicodème ti gbu nda ti afango ye ti Jésus so, so andu Royaume. Tongaso, Jésus afa na lo ambeni sango na ndo ti kua so lo yeke sara, tongana molenge ti Nzapa so aga na sese. Jésus atene: “Legeoko tongana ti so Moïse akanga lani ngbo na nduzu na yâ ti benyama, a lingbi nga a kanga Molenge ti zo na nduzu, si zo kue so amä na bê na lo alingbi ti wara fini ti lakue lakue.”—Jean 3:14, 15.

Ândö, azo ti Israël so asioni ngbo ate ala, tongana ala ye ti sö fini ti ala, a lingbi ala bâ ngbo ti cuivre (Nombre 21:9). Legeoko nga, tongana azo aye ti sigi na yâ ti sioni dutingo ti ala nga ti wara fini ti lakue lakue, a lingbi ala fa so ala yeke na mabe na Molenge ti Nzapa. Na gbotongo lê na ndo ti ndoye ti Nzapa na yâ ti aye ni so, Jésus atene na Nicodème na pekoni, lo tene: “Nzapa andoye tâ azo ti dunia so mingi si lo mû gi oko Molenge ti lo ndali ti ala, si zo kue so amä na bê na lo, a lingbi ti futi lo pëpe, me lo wara fini ti lakue lakue.” (Jean 3:16). Ni la, ge na Jérusalem, nze omene na peko ti so lo komanse kua ti fango tënë, Jésus afa polele so lo la lo yeke lege so ayeke gue na azo na salut.

Jésus atene na Nicodème atene: “Nzapa atokua Molenge ti lo na yâ ti dunia so ti tene lo fâ ngbanga ti dunia ni ape.” Ye so aye ti fa so, a tokua Jésus pëpe ti ga ti fâ ngbanga ti kuâ na ndo ti azo kue. Me, tongana ti so lo tene, a tokua lo “ti tene a sö dunia ni na lege ti lo.”—Jean 3:17.

Teti so mbeto la asara Nicodème si lo ga ti bâ Jésus na bï, Jésus ahunzi lisoro ti lo na lo na tënë so: “Ye so amû lege ti fâ ngbanga ni ayeke so: Lumière [so Jésus aza ni na lege ti sarango ye ti lo nga na afango ye ti lo] aga na yâ ti dunia so, me azo aye bingo ahon lumière, ndali ti so ala yeke sara aye ti sioni. Zo so angbâ ti sara aye ti sioni, lo ke tënë ti lumière na lo ye ti ga na mbage ti lumière ape si a fa aye so lo yeke sara so na gigi ape. Me zo so asara aye ti mbilimbili aga na mbage ti lumière, tongaso si a fa akusala ti lo na gigi tongana akusala so alingbi na ye so bê ti Nzapa aye.”—Jean 3:19-21.

A yeke fadeso na Nicodème, so ayeke mbeni Farizien nga wafango ye na Israël, ti gbu li na ndo ti ye so lo londo ti mä so, so andu kua so Jésus ayeke na ni na yâ ti ye so Nzapa aleke ti sara.