Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 86

Molenge so agirisa lani, akiri awe

Molenge so agirisa lani, akiri awe

LUC 15:11-32

  • TOLI NA NDO TI MOLENGE SO AGIRISA LANI

A yeke peut-être na ngoi so Jésus angbâ lani na Pérée la lo mû tapande na ndo ti mbeni taba so agirisa nga na alê ti nginza ti drachme so agirisa. Atapande use so aye ti fa na e so a lingbi e duti na ngia tongana mbeni wasiokpari achangé bê ti lo ti kiri na mbage ti Nzapa. Ascribe na aFarizien akasa Jésus ndali ti so lo yamba mara ti awasiokpari tongaso. Me, awato ti Jésus amanda lani ye na lege ti atapande use so lo mû? Eskê ala hinga fadeso awe tongana nyen la Babâ ti e ti yayu asara ye na mbage ti awasiokpari so achangé bê ti ala? Jésus angbâ fadeso amû mbeni pendere tapande ti fa na ala encore nda ti tënë ni so.

Na yâ ti tapande ni, Jésus asara tënë ti mbeni babâ so ayeke na amolenge-koli use, na tapande ni aluti mingi na ndo ti lo so ayeke ngambe ni. A-Farizien na ascribe, nga na ambeni zo so ayeke mä lani tapande ni so, apeut ti manda ye na ndo ti ye so Jésus atene na ndo ti ngambe ni so. Me, a yeke nzoni e bâ nga ye so Jésus atene na ndo ti babâ ni nga na yaya ni, ndali ti so e lingbi ti manda ye na lege ti sarango ye ti ala. Tongaso, zia e manda ye na ndo ti akoli ota so Jésus asara tënë ti ala na yâ ti toli ti lo so.

Jésus atene: “Mbeni koli ayeke na amolenge-koli use. Ngambe ni atene na babâ ti lo: ‘Babâ, mû na mbi aye so mbi doit ti wara na peko ti mo.’ Tongaso, babâ ni akangbi yâ ti aye ti lo na popo ti amolenge ni.” (Luc 15:11, 12). Bâ so ngambe ni so aye ti tene a mû na lo héritage ti lo, pëpe ngbanga ti so babâ ti lo akui. Ade babâ ni akui ape. Ye oko, molenge ni aye ti tene a mû na lo héritage ti lo fafadeso, tongaso si lo wara liberté nga lo sara ye ti bê ti lo na amosoro ti lo ni. Nyen la lo sara?

Jésus atene: “Alango kete na pekoni, ngambe ni abungbi aye ti lo kue, lo hon na mbeni yongoro kodro. Kâ, lo buba aye ti lo na sarango aye ti kirikiri.” (Luc 15:13). Ahon ti tene lo duti nzoni nga na yâ ti siriri na gbe ti mbeni babâ so ayeke bâ lege ti amolenge ti lo nga so ayeke mû na ala ye so ala yeke na bezoin ni, molenge ni so alondo ague na mbeni ndo nde. Kâ, lo buba héritage ti lo kue, ndali ti so lo ye ti kaï nzara ti tere ti lo. Na pekoni, ye akomanse ti ga ngangu na lo, tongana ti so Jésus afa ni.

Jésus atene: “Tongana lo buba aye ni kue awe, kota nzara atï na yâ ti kodro ni kue, na lo yeke na ye oko ape. Lo gue même lo hule na tere ti mbeni zo ti kodro ni, na zo ni atokua lo na yâ ti ayaka ti lo ti bata acochon. Lo ye ti te akobe ti acochon ni; nga zo ti mû ye na lo ayeke dä ape.”—Luc 15:14-16.

Atâa so Ndia ti Nzapa afa lani acochon tongana ye so ayeke sioni, molenge ni ague asara kua ti batango acochon. Nzara ague na lo juska ti pusu lo même ti sara nzara ti te kobe so a yeke mû ka gi ni na acochon so lo yeke bata ala. Tongana lo bâ aye ti vundu ni so asi na lo so, “li ti lo aga dä”. Nyen la lo sara? Lo oko lo tene: “Na ngoi so mbi yeke kui nzara ge, azo ti kua ti babâ ti mbi mingi ayeke na gbâ ti mapa ti te! Mbi yeke londo ti kiri na babâ ti mbi ti tene na lo: ‘Babâ, mbi sara siokpari na tere ti yayu nga na tere ti mo. Mbi kpa ti tene a iri mbi molenge ti mo mbeni pëpe. Mû mbi tongana mbeni zo ti kua ti mo.’” Na pekoni, lo londo na lo gue na babâ ti lo.—Luc 15:17-20.

Babâ ni ayeke sara ande ye tongana nyen? Eskê lo yeke sara ande ngonzo na tere ti molenge ni na lo yeke suku na lo ndali ti so a yeke ye ti buba la lo sara si lo hon lani so? Eskê babâ ni ayeke sara sanka ti molenge ni na yambango nga lo ape? Tongana a yeke mo fade, mo yeke sara tongana nyen? Tongana a yeke fade molenge ti mo ti koli wala ti wali la asara ye tongaso, mo yeke sara ye tongana nyen?

 A WARA MOLENGE SO AGIRISA

Jésus afa bibe ti babâ ni nga lo fa tongana nyen la babâ ni asara ye lani na mbage ti molenge ti lo ni. Jésus atene: “Tongana lo ngbâ a yo, lê ti babâ ti lo atï na ndo ti lo na mawa ti lo asara babâ ni. Babâ ni akpe loro agbu lo na lo su ngbangba ti lo.” (Luc 15:20). Babâ ni ayamba lani molenge ti lo so akiri, atâa so peut-être lo kue lo mä tënë ti vie ti kirikiri so molenge ti lo ni asara. Eskê amokonzi-nzapa ti aJuif, so atene ala hinga Jéhovah nga ala yeke voro lo, abâ na lege ti tapande so tongana nyen la Babâ ti e ti yayu ayeke sara ye na mbage ti awasiokpari so achangé bê ti ala? Eskê ala yeke ye ande dä nga so Jésus kue ayeke sara nga tongaso?

Gi na bango vundu so ayeke na lê ti molenge ni, babâ ni apeut ti bâ so molenge ti lo ni achangé awe. Na ndo ni, so babâ ni amû li ni ti yamba molenge ni, a peut ti pusu molenge ni ti fa asiokpari ti lo na gigi. Jésus atene: “Tongaso, molenge ni atene na babâ ti lo: ‘Babâ, mbi sara siokpari na tere ti yayu nga na tere ti mo. Mbi kpa ti tene a iri mbi molenge ti mo mbeni pëpe.’”—Luc 15:21.

Babâ ni atene na angbâa ti lo atene: “Ala kpe hio, ala ga na mbeni yongoro bongo so ayeke pendere ahon atanga ni kue, ala yü na lo, ala zia bague na maboko ti lo nga ala yü poro na lo. Ala ga na kete bagara ti mafuta, ala fâ ni e te na e sara matanga, ngbanga ti so molenge ti mbi so akui lani, me lo kiri na fini awe. Lo girisa lani, me mbi kiri mbi wara lo awe.” Na pekoni, “ala to nda ti sara ngia.”—Luc 15:22-24.

Andâ na oko ngoi ni, molenge so ayeke yaya ni angbâ ti lo na yaka. Na ndo ti lo, Jésus atene: “Tongana lo kiri, na lo si nduru na da ni, lo mä mozoko nga na azo so ayeke dodo. Tongaso lo iri mbeni zo ti kua ni na lo hunda ti hinga nda ti aye so. Zo ti kua ni atene na lo: ‘Ita ti mo ti koli akiri, na babâ ti mo afâ kete bagara ti mafuta, ndali ti so lo kiri lo wara ita ti mo na nzoni tere.’ Me ngonzo asara lo, na lo ye pëpe ti lï na da. Babâ ti lo asigi na avoro yanga na lo. Lo tene na babâ ti lo, lo tene: ‘A sara ngu mingi awe la mbi yeke sara kua na mo tongana  ngbâa, mbi mä yanga ti mo lakue. Me lâ oko mo mû na mbi mbeni kete ngasa ape ti tene mbi na akamarade ti mbi e te e sara ngia. Me gi so molenge ti mo so aga, lo so abuba aye ti mo na tere ti awali-ndumba, mo fâ kete bagara ti mafuta na lo.’”—Luc 15:25-30.

Legeoko tongana molenge so ayeke yaya ni so, azo wa la ayeke kasa lani Jésus ndali ti so lo yeke sara nzoni bê nga lo yeke pensé na awasiokpari nga azo so ambeni zo abâ ala tongana ambumbuse zo? A yeke ascribe na aFarizien. Jésus amû toli so ndali ti so ala yeke kasa lo ngbanga ti so lo sara nzoni bê na awasiokpari. Azo kue so ayeke kasa ndo ngbanga ti so Nzapa asara nzoni bê na ambeni zo adoit ti manda ye na lege ti toli so.

Jésus ahunzi toli ni na fango tënë so babâ ni atene na molenge ti lo so ayeke yaya ni. Lo tene: “Molenge ti mbi, mo yeke lakue na tere ti mbi, na aye ti mbi kue ayeke ti mo. Me a yeke ndali ti e ti sara matanga nga ti sara ngia ngbanga ti so ita ti mo so akui lani, me lo kiri na fini awe. Lo girisa lani, me e kiri e wara lo awe.”—Luc 15:31, 32.

Jésus afa pëpe ye so yaya ni asara na pekoni. Me, na peko ti so a zingo ande Jésus na kuâ, “gbâ ti aprêtre ayeke yeda na tënë ti mabe so.” (Kusala 6:7). A doit ti wara na milieu ti azo ni so ambeni so amä Jésus na mungo pendere toli ti molenge so agirisa so. Peut-être a si so ala kue li ti ala akiri dä, ala changé bê ti ala na ala kiri na mbage ti Nzapa.

Ti londo na lango ni so ti ga na ni, adisciple ti Jésus adoit ti girisa lâ oko ape apendere wango so asigi na yâ ti toli ti Jésus so. Kozo ye so e manda na yâ ni ayeke so, a yeke duti ande lege ti ndara tongana e ngbâ na popo ti awakua ti Nzapa, na gbe ti Babâ ti e so aye e na so ayeke mû na e aye so e yeke na bezoin ni, ahon ti tene e gue e tomba peko ti anzerengo ye ti gigi, na “mbeni yongoro kodro.”

Mbeni ye ti manda ni ayeke so, tongana a si so e gue nde na lege so Nzapa afa, a lingbi e sara tere ti e kete, e kiri na mbage ti Babâ ti e, tongaso si songo ti e na lo alingbi ti kiri ti ga nzoni.

E peut encore ti manda mbeni ye tongana e tara ti bâ kangbi wa la ayeke na popo ti Babâ ni, so ayeke nduru ti yamba zo na so ayeke nduru ti pardonné zo, nga na yaya ni, so angbâ ti bata zo na bê na so ayeke na bibe ti yambango zo ape. A yeke polele so, a lingbi awakua ti Nzapa aduti azo so ayeke nduru ti pardonné na ti yamba mbeni zo so afa biani so lo changé asarango ye ti lo ti kiri na ‘da ti Babâ’. Zia e duti na ngia ndali ti so ita ti e ‘so akui lani, a kiri na fini awe’ nga lo so ‘agirisa lani, a kiri a wara lo awe.’