Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 84

Kungba so mbeni zo ayeke na ni tongana lo ga disciple ti Christ

Kungba so mbeni zo ayeke na ni tongana lo ga disciple ti Christ

LUC 14:25-35

  • AKPALE SO MBENI DISCIPLE AYEKE TINGBI NA NI

Jésus amû lani apendere wango mingi na ngoi so lo yeke te lani kobe na da ti mbeni mokonzi ti aFarizien. Tongana Jésus ayeke na lege ti guengo na Jérusalem, gbâ ti azo nga asara tambela ni legeoko na lo. Ngbanga ti nyen? Ala ye biani ti duti adisciple ti lo, atâa akpale wa la ala lingbi ti tingbi na ni?

Tongana ala tambela na lege, Jésus atene mbeni tënë so apeut ti son bê ti ambeni zo na milieu ti ala. Lo tene: “Tongana mbeni zo aga na peko ti mbi, me lo ke pëpe babâ ti lo, mama ti lo, wali ti lo, amolenge ti lo, aita ti lo ti koli na ti wali, na tongana lo ke même fini ti lo ape, lo lingbi ti ga disciple ti mbi ape.” (Luc 14:26). Jésus aye ti tene nyen la?

Jésus aye pëpe ti tene so, zo kue so aye ti ga adisciple ti lo adoit ti ke afami ti lo vrai tongaso. Me lo ye ti tene so, ala doit ti ke afami ti ala ni na lege so ala doit ti ye ni ahon afami ti ala ni, pëpe tongana ti koli ti yâ ti mbeni toli so lo mû lani, so a tisa lani lo ti ga ti te kobe na lakui me lo ke ti ga ngbanga ti so lo londo gi ti sara mariage (Luc 14:20). So a tene so Jacob, so ayeke kotara ti aJuif, ake Léa na lo ye Rachel, aye gi ti tene so lo ye Rachel mingi ahon yaya ti lo Léa.—Genèse 29:31.

Bâ so Jésus atene so a lingbi mbeni disciple ake “même fini ti lo” wala âme ti lo. Ye so aye ti tene so, tâ disciple ti Jésus ayeke zo so andoye Jésus mingi ahon même ti so lo ndoye na fini ti lo, na lo yeke ye même ti kui ndali ni. Biani, ti ga disciple ti Christ ayeke kota kungba. A yeke pëpe mbeni desizion so zo adoit ti mû gi ni tongaso, sân ti tene lo gbu li na ndo ni.

Ti duti disciple ti Jésus a hunda ti sara ngangu nga e yeke wara atara ndali ni, na a yeke ndali ni la Jésus atene: “Zo so ayô keke ti pasi ti lo pëpe nga lo ga na peko ti mbi pëpe, lo lingbi ti ga disciple ti mbi ape.” (Luc 14:27). Biani, tâ disciple ti Jésus adoit ti leke tere ti lo ti tingbi na amara ti atara nde nde so Jésus atingbi lani na ni. Jésus atene même lani so awato ti ni ayeke fâ ande ni.

Tongaso, azo so lani ayeke tambela legeoko na Jésus, na yâ ti voyage ni so, adoit ti gi ti hinga nyen la mbilimbili a ye ti tene ti duti disciple ti Jésus. Ti sigi na tënë ni polele, Jésus amû mbeni tapande. Lo tene: “Na tapande, tongana mbeni zo na popo ti ala aye ti sara mbeni tour, lo yeke duti kozoni ape ti bâ wala nginza ti lo alingbi ti tene lo hunzi na tour ni? Tongaso ape, peut-être lo yeke zia gere ti tour ni me lo lingbi ti hunzi ni ape.” (Luc 14:28, 29). Ni la, kozoni ti tene ala ga adisciple ti Jésus, azo so ayeke tambela na tere ti lo ti gue na Jérusalem adoit fade awe ti mû desizion ti ngbâ ti sara ye kue so a hunda na mbeni disciple ti sara. Jésus afa nda ti tënë ni so na mungo mbeni tapande encore.

Lo tene: “Tongana mbeni gbia aye ti gue ti sara bira na mbeni gbia nde, lo na azo ti lo ayeke duti kozoni ape ti bâ wala, na aturugu 10 000, lo lingbi ti gbu lê ni na lo so ayeke ga na aturugu 20 000 ti tiri na lo? Biani, tongana lo lingbi pëpe ti gbu lê ni, lo yeke tokua alembe ti lo ti hunda siriri na ngoi so mba ti lo gbia ni angbâ yongoro.” Ti fa nene ti tënë ni, Jésus akiri atene: “Legeoko nga, zia ala hinga so, na popo ti ala so, zo so adö aye ti lo kue azia pëpe, lo lingbi ti ga disciple ti mbi ape.”—Luc 14:31-33.

A yeke tâ tënë so, Jésus angbâ ti tene gi tënë ni so na azo so lo na ala ayeke tambela so ape. Azo kue so amanda ye na ndo ti Christ adoit ti duti nduru ti sara ye so lo londo ti tene ge so. Ye so aye ti tene so, a lingbi ala duti nduru ti dö aye kue ti zia, so ti tene amosoro ti ala wala même ti mû fini ti ala, tongana ala ye ti ga adisciple ti Jésus. A yeke mbeni ye so ala doit ti gbu li na ndo ni nga ti sambela Nzapa ndali ni.

Na pekoni, Jésus akiri na ndo ti mbeni tënë so lo tene lani na yâ ti fango ye ti lo na ndo ti Hoto, na ngoi so lo tene na adisciple ti lo so “ala yeke ingo ti sese so.” (Matthieu 5:13). Lo ye lani ti tene so, legeoko tongana ti so ingo ayeke bata ye, a lingbi atënë ti adisciple ti lo asara ngangu na ndo ti azo tongana mbeni ye so ayeke bata azo ni, na sarango si ala gue nde na afango ye ti Nzapa ape. Teti so kua ti lo ti fango tënë aga nduru ti hunzi awe, Jésus atene: “Ti tâ tënë ni, ingo ayeke nzoni. Me tongana songo ti ingo asigi dä awe, a peut ti zia mbeni ye dä ti kiri na songo ni?” (Luc 14:34). Azo so ayeke mä lani lo ahinga so ambeni ingo ayeke dä so ayeke nzoni ape na so abungbi na ambeni ye so ayeke na yâ ti sese, na ayeke sara si na pekoni a peut ti sara kua na ingo ni so ape.

Tongaso, na lege ti tënë so, Jésus afa so même ala so aga adisciple ti lo aninga adoit ti ngbâ lakue ti yapu na yâ ti kua ti ala, ala kiri na peko ape. Tongana ala kiri na peko, a yeke sara kua na ala encore ape, legeoko tongana ti ingo so songo ni asigi dä awe so. Ala yeke ga ye ti he na lê ti azo ti dunia. Na ndo ni, ala yeke nzere encore na lê ti Nzapa ape, na même ala yeke bi zonga na ndo ti iri ti lo. Jésus afa so ayeke kota ye ti kpe ti tene mara ti ye tongaso asi na ala, ni la lo tene na ala lo tene: “Zia zo so ayeke na mê ti mä amä.”—Luc 14:35.

TI HINGA AMBENI TËNË

Mo lingbi ti hinga tâ bungbi ti vorongo Nzapa tongana nyen?

Tâ bungbi ti vorongo Nzapa ayeke gi oko? Ti hinga ni, bâ aye oku so afa tënë na ndo ni.