Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 96

Jésus akiri tënë na mbeni mokonzi so ayeke na mosoro mingi

Jésus akiri tënë na mbeni mokonzi so ayeke na mosoro mingi

MATTHIEU 19:16-30 MARC 10:17-31 LUC 18:18-30

  • MBENI ZO TI MOSORO AHUNDA TËNË NA NDO TI FINI TI LAKUE LAKUE

Jésus angbâ na lege ti guengo na Jérusalem na hongo na yâ ti kodro ti Pérée. Mbeni maseka-koli so ayeke na mosoro mingi amû loro aga, na lo sara agenou na gbe ti Jésus. Koli ni so ayeke “mbeni mokonzi”, peut-être lo yeke mokonzi ti mbeni synagogue wala lo yeke mbeni membre ti Sanhédrin. Lo hunda na Jésus atene: “Nzoni Maître, nyen la mbi doit ti sara ti wara ande fini ti lakue lakue?”—Luc 8:41; 18:18; 24:20.

Jésus akiri tënë atene: “Mo iri mbi nzoni zo ngbanga ti nyen? Nzoni zo oko ayeke dä ape, gi Nzapa awe.” Peut-être koli ni asara kua na tënë “nzoni” tongana mbeni titre, tongana ti so aRabbi ayeke iri ka na ni na ambeni zo. Atâa so Jésus ayeke mbeni nzoni wafango ye, lo ye ti tene koli ni ahinga so, tongana a sara kua na tënë “Nzoni” tongana mbeni titre, a yeke gi na Nzapa oko la adoit ti tene ni.

Jésus atene na koli ni atene: “Tongana mo ye ti wara fini, ngbâ ti bata acommandement lakue.” Me, maseka-koli ni ahunda atene: “Acommandement wa?” Jésus angbâ afa na lo commandement oku na yâ ti acommandement bale-oko so Nzapa amû na Moïse. Acommandement oku so Jésus asara tënë ni ayeke: Mo fâ zo pëpe, mo gi wali wala koli nde pëpe, mo nzi ye pëpe, mo tene mvene na li ti mbeni zo na gbele ngbanga pëpe nga mo ne babâ na mama ti mo. Me na pekoni, Jésus afa na lo mbeni kota commandement, lo tene: “Mo ye mba ti mo tongana ti so mo ye tere ti mo wani.”—Matthieu 19:17-19.

Koli ni akiri tënë atene: “Mbi bata aye so kue awe. Nyen la amanke mbi encore nyen?” (Matthieu 19:20). Koli ni apensé ti lo atene âmanke ade lo sara pëpe mbeni nzoni ye na mbage ti azo wala ndali ti azo, na a yeke ni la alingbi ti sara si lo wara ande fini ti lakue lakue. Na bango so koli ni ayeke gi tâ ti hinga ye, Jésus ‘aye lo na bê ti lo’. (Marc 10:21). Me, mbeni kpale ayeke ku koli ni.

Koli ni azia bê ti lo kue na ndo ti mosoro ti lo, tongaso Jésus atene na lo atene: “A ngbâ na mo ye oko ti sara: Gue, mo kä aye ti mo, mo mû nginza ni na azo ti mawa, na mo yeke wara ande mosoro na yayu; na mo ga mo mû peko ti mbi.” Koli ni apeut ti kangbi mosoro ti lo ni senge senge na awayere na ti ga mbeni disciple ti Jésus. Peut-être na mawa na bê, Jésus abâ koli ni so ayeke londo ti tourné ti kiri na mawa. Ndoye so koli ni ayeke na ni na mbage ti mosoro ti lo, nga na aye so lo yeke na ni mingi, akanga lê ti lo na ndo ti ye so ayeke tâ mosoro (Marc 10:21, 22). Jésus angbâ atene: “A yeke duti ande ngangu mingi na azo so ayeke na nginza ti lï na yâ ti Royaume ti Nzapa!”—Luc 18:24.

Bê ti adisciple ti Jésus adö tongana ala mä atënë so, na li ti ala akiri akpe tongana Jésus atene na ala atene: “Ti tâ tënë ni, lingo ti zo ti mosoro na yâ ti Royaume ti Nzapa ayeke ngangu ahon lingo ti chameau na yâ ti dû ti suä.” Tënë so apusu adisciple ti lo ti hunda ndo atene: “Tâ zo wa la alingbi ti wara fini zo wa?” Ti wara salut ayeke ngangu mingi si zo alingbi ti wara ni ape? Jésus abâ ndo droit na mbage ti ala na lo tene: “Aye so azo alingbi ti sara ni ape, Nzapa alingbi ti sara ni.”—Luc 18:25-27.

Pierre afa so lo na amba ti lo adisciple asara ti ala ye tongana ti zo ti mosoro so ape, lo tene: “Bâ, e dö aye ti e kue e zia, na e mû peko ti mo. E yeke wara ande nyen?” Jésus afa na ala ye so ala yeke wara ande ndali ti so ala soro nzoni lege, lo tene: “Na ngoi so a yeke kiri ti leke aye kue ti ga fini ni, nga Molenge ti zo aduti na ndo ti trône ti lo ti gloire, ala so amû peko ti mbi ayeke duti na ndo ti atrône 12, na ala yeke fâ ngbanga ti amara 12 ti Israël.”—Matthieu 19:27, 28.

A yeke polele so Jésus ayeke sara lani na ala tënë ti ye so ayeke si ande na ndo ti dunia na ngoi so a yeke kiri ti leke dunia ni tongana ti so a yeke lani na yâ ti yaka ti Éden. A yeke futa ande Pierre nga na ambeni adisciple ni na lege so ala na Jésus ayeke komande ande sese so aga Paradis. Atâa asacrifice wa la ala sara, futa so ayeke kota ahon ni!

Adisciple ni akomanse même ti wara mbage ti futa ni so awe. Jésus atene: “Zo kue so azia da ti lo, wala wali ti lo, wala aita ti lo ti koli, wala babâ na mama ti lo, wala amolenge ti lo ndali ti Royaume ti Nzapa, lo yeke wara aye so fani mingi na yâ ti ngoi so, nga na yâ ti dunia so ayeke ga, lo yeke wara fini ti lakue lakue.”—Luc 18:29, 30.

Biani, atâa ndo wa la adisciple ni ague dä, ala yeke na ngia ti duti na popo ti amba ti ala so ala na ala ayeke voro Nzapa oko, na ngia ni so ayeke kota mingi ahon même ti so ala yeke wara ni na ngoi so ala yeke na popo ti atâ fami ti ala. A yeke ye ti mawa ti bâ so, zo ti mosoro so ayeke wara mara ti pasa ni so ape, na même lo yeke wara pëpe futa ti duti na yâ ti Royaume ti Nzapa na yayu.

Jésus akiri atene: “Me azo mingi so ayeke na li ni ayeke ga azo ti nda ni, na azo so ayeke na nda ni ayeke ga azo ti li ni.” (Matthieu 19:30). Lo ye ti tene nyen la?

Zo ti mosoro so ayeke na popo ti azo so “ayeke na li ni”, ndali ti so lo yeke lani mbeni mokonzi ti aJuif. Ndali ti so lo yeke bata lani acommandement ti Nzapa, lo peut fade ti ga mbeni disciple ti Jésus na ti sara gbâ ti apendere ye fade. Ye oko, lo zia amosoro ti lo nga na aye so lo yeke na ni na kozo ndo na yâ ti gigi ti lo. Nde na lo, mingi ti ala so ayeke na ye mingi ape abâ afango ye ti Jésus tongana tâ tënë nga tongana lege so ague na zo na fini. Na lege ti fä, ala yeke lani “na nda ni” na fadeso ala ga “na li ni”. Ala yeke ku ti duti na ndo ti trône na tere ti Jésus na ti komande sese so ayeke ga ande Paradis.