Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 82

Jésus afa tënë na Pérée

Jésus afa tënë na Pérée

LUC 13:22–14:6

  • A LINGBI ZO ASARA NGANGU TI LÏ NA KETE YANGA-DA NI

  • A LINGBI JÉSUS AKUI NA JÉRUSALEM

Jésus ayeke fa lani tënë na lo yeke sava azo na Judée nga na Jérusalem. Na pekoni, lo fâ Ngu ti Jourdain ti gue ti fa tënë na yâ ti agbata oko oko ti sese ti Pérée. Kete na pekoni, lo yeke kiri na Jérusalem.

Na ngoi so lo yeke na Pérée, mbeni koli ahunda lo atene: “Seigneur, azo so a yeke sö ala ande ayeke mingi ape?” Âmanke koli ni kue ahinga so mango tere ayeke pëpe na popo ti amokonzi-nzapa ndali ti so ambeni atene so a yeke sö ande azo mingi, nga ambeni atene ti ala so a yeke sö ande gi kete wungo ti azo. Jésus akiri tënë droit na hunda ti lo ni ape me lo fa ye so azo adoit ti sara ti tene a sö ala. Lo tene: “Ala sara ngangu ti lï na kete yanga-da ni.” Biani, a hunda ti sara kota effort. Ngbanga ti nyen? Jésus afa ni, lo tene: “Teti so mbi tene na ala: Azo mingi ayeke gi lege ti lï dä, me gbä.”—Luc 13:23, 24.

Ti fa so a hunda ti sara effort mingi, Jésus amû mbeni tapande, lo tene: “Tongana wa ti da ni alondo si lo kanga yanga-da ni awe, ala yeke luti na gigi, ala pika yanga-da ni, ala tene: ‘Seigneur, zi yanga-da na e.’ Me lo yeke tene na ala: ‘Mbi hinga ndo so ala londo dä si aga so ape . . . Ala hon na tere ti mbi kâ, ala kue so ayeke sara ye ti kirikiri!’”—Luc 13:25-27.

Tapande so aye mbilimbili ti sara tënë ti mbeni zo so aga na retard, âmanke na l’heure ti bê ti lo, me so awara yanga-da na kangango ni. Lo doit fade ti ga hio, même si a yeke ye so lo ye fade la ape. Ye ni asi tongaso na azo so alingbi fade ti wara nzoni na lege ti afango ye ti Jésus. Ala zia pëpe si tâ vorongo amû kozo place na yâ ti gigi ti ala. Gbâ ti azo na popo ti azo, so a tokua Jésus na mbage ti ala, ake ti yeda na ye so Nzapa aleke ti tene ala wara salut. Jésus atene so ande “ala yeke toto na ala yeke te pembe ti ala” tongana a bi ala na gigi. Me ambeni zo so alondo “na mbage ti est na ouest, nord na sud,” so ti tene ti amara kue, ayeke ga ande ti “duti na table ti te kobe na yâ ti Royaume ti Nzapa.”—Luc 13:28, 29.

Jésus afa nda ni, lo tene: “Ambeni zo so ayeke na nda ni [na tapande ala so ayeke aJuif ape nga na aJuif so a sara pasi na ala] ayeke ga azo ti li ni. Nga ambeni so ayeke na li ni [wala amokonzi-nzapa so apika kate ngbanga ti so ala yeke ahale ti Abraham] ayeke ga azo ti nda ni.” (Luc 13:30). So a tene ala yeke “ga azo ti nda ni” aye ti tene so ala yeke duti ande na yâ ti Royaume ti Nzapa ape.

Ambeni Farizien aga fadeso na mbage ti Jésus na ala tene na lo atene: “Londo na ndo so, mo hon ndali ti so Hérode [Antipas] aye ti fâ mo.” Peut-être a yeke Gbia Hérode ni lo wani la asara si tënë ni so amû ndo tongaso ti pusu Jésus ti tene lo kpe ndo ni lo hon. Âmanke Hérode akpe ti tene lo duti na popo ti azo so afâ mbeni prophète encore, tongana ti so a si lani na ndo ti tënë ti kuâ ti Jean Baptiste. Me, Jésus atene na aFarizien ni atene: “Ala gue ala tene na mbo ti ngonda so: ‘Mbi yeke tomba asioni yingo na mbi yeke sava azo laso nga kekereke; me mbeni kekereke, mbi yeke hunzi kusala ti mbi.’” (Luc 13:31, 32). Na iringo Hérode “mbo ti ngonda”, peut-être Jésus aye ti sara tënë ti sarango ye na handa so ambo ti ngonda ayeke sara ka. Me, Jésus ayeke ye ande dä ape si Hérode wala mbeni zo nde ahanda lo. Lo yeke sara kua so Babâ ti lo amû na lo ti sara, na lo yeke sara ni alingbi na ngoi so Nzapa afa ni na lo, me azo la adoit ti fa ni na lo ape.

Jésus ague fadeso na Jérusalem ngbanga ti so, tongana ti so lo tene, “a peut pëpe ti si so a fâ mbeni prophète na gigi ti Jérusalem.” (Luc 13:33). Me, so mbeni prophétie ti Bible atene nga ape so a lingbi a fâ Messie ni na yâ ti gbata ni so, ka ngbanga ti nyen la Jésus atene so a lingbi a fâ lo na ndo ni so? Ngbanga ti so Jérusalem la ayeke kota gbata ti Israël, ndo so a lingbi ti wara bungbi ti Sanhédrin dä. Sanhédrin ayeke kota da-ngbanga so amembre ni kue ayeke 71, na a yeke na ndo so la si a yeke fâ ngbanga na ndo ti azo so a bâ ala tongana aprophète ti wataka. Na ndo ni, a yeke na Jérusalem la a yeke mû asacrifice ti nyama. Tongaso, Jésus abâ so a yeke duti ande na lege ni ape tongana a fâ lo na mbeni ndo nde na Jérusalem.

Jésus adema lo tene: “Jérusalem, Jérusalem, mo so mo fâ aprophète nga mo bo na tênë ala so a tokua ala na mo. Fani mingi mbi ye ti bungbi amolenge ti mo ndo oko tongana ti so mama ti kondo ayeke bungbi amolenge ti lo na gbe ti maboko ti lo. Me ala yeda ape! Bon, a zia da ti ala na ala awe.” (Luc 13:34, 35). Mara ni ake Molenge ti Nzapa na lo yeke wara aye ti pekoni.

Kozoni si Jésus ague na Jérusalem, mbeni mokonzi ti aFarizien atisa lo ti gue ti te ye na yanga-da ti lo, na lâ ti Sabbat. Agene so kue aga ayeke ku lani kungo ti bâ ye so Jésus ayeke sara na mbage ti mbeni koli so ayeke na kobela ti sukungo tere (so ayeke mbeni kobela so ayeke sara si ngu aga gbani na yâ ti tere ti zo, na mingi ni na yâ ti gere ti lo). Jésus ahunda aFarizien nga na ala so ahinga ndia mingi, lo tene: “Ndia amû lege na zo ti kaï kobela na lâ ti Sabbat, wala a mû lege na lo ape?”—Luc 14:3.

Zo oko azi yanga ape. Jésus asava koli ni, na pekoni lo hunda ala, lo tene: “Na popo ti ala so, zo wa la, tongana molenge ti lo ti koli wala bagara ti lo atï na yâ ti dû ti ngu, lo yeke gue hio ti sigi na lo na lâ ti Sabbat ape?” (Luc 14:5). Ge encore, zo oko azi nga yanga na ndo ti tënë ni so ape.

TI HINGA AMBENI TËNË

Royaume ti Nzapa ayeke nyen?

Lani so Jésus ayeke na ndo ti sese, lo fa kete yanga ti ye so Royaume ni ayeke sara ande.