Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 95

Lo sara tënë na ndo ti divorce nga lo fa ndoye na mbage ti amolenge

Lo sara tënë na ndo ti divorce nga lo fa ndoye na mbage ti amolenge

MATTHIEU 19:1-15 MARC 10:1-16 LUC 18:15-17

  • JÉSUS AFA BANGO NDO TI NZAPA NA NDO TI DIVORCE

  • PASA SO AKUMBAMBA AYEKE NA NI

  • A LINGBI E SARA TERE TI E KETE TONGANA AKETE MOLENGE

Na Galilée, Jésus na adisciple ti lo afâ Ngu ti Jourdain na ala hon na yâ ti Pérée ti gue na mbage ti sud. Na ngoi so Jésus asi lani ti tanga ni na Pérée, lo fa na aFarizien bango ndo ti Nzapa na ndo ti tënë ti divorce (Luc 16:18). Fadeso, aFarizien akiri aga na tënë ni so ti tara lo.

Ndia ti Moïse afa so koli apeut ti sara divorce na wali ti lo tongana “lo bâ mbeni sioni ye na mbage ti wali ni”. (Deutéronome 24:1). Azo ayeke lani na abango ndo nde nde na ndo ti araison so amû lege na mbeni zo ti sara divorce. Ambeni apensé même so, ndali ti akete kete tënë kue, zo apeut ti sara divorce. Ni la, aFarizien ahunda ndo atene: “Ndia amû lege na koli ti sara divorce na wali ti lo ndali ti mara ti atënë nde nde kue?”—Matthieu 19:3.

Ahon ti gboto lê na ndo ti bango ndo ti azo, Jésus agboto lê ti azo pendere mingi na ndo ti bango ndo ti Nzapa na ndo ti mariage. Lo tene: “Ala diko ye so Mbeti ti Nzapa atene so ape? Na tongo nda ni, lo so asara ala, lo sara ala koli na wali, na lo tene: ‘Ndani la, koli ayeke zia ande babâ na mama ti lo, lo yeke ngbâ ande na wali ti lo na ala use kue ayeke ga tere oko.’ Tongaso ala yeke use mbeni pëpe, me tere oko. Ni la, ye so Nzapa abungbi na gbe ti joug oko, zia zo akangbi yâ ni ape.” (Matthieu 19:4-6). Na ngoi so Nzapa abungbi Adam na Ève na lege ti mariage, lo leke lani lâ oko ape ti tene yâ ti ala akangbi mbeni lâ.

A-Farizien ake na Jésus, ala tene: “Ka ngbanga ti nyen si Moïse amû yanga lani ti mû mbeti ti divorce na wali ni na ti tomba lo?” (Matthieu 19:7). Jésus atene na ala atene: “A yeke ndali ti kpengbango bê ti ala si Moïse abâ gbä lo mû lege na ala ti sara divorce na awali ti ala. Me, na tongo nda ni, a yeke tongaso ape.” (Matthieu 19:8). “Tongo nda ni” so ayeke pëpe na ngoi ti Moïse; a yeke na ngoi so Nzapa azia gere ti mariage na sese na yaka ti Éden.

Na pekoni, Jésus afa mbeni tâ tënë, lo tene: “Mbi tene na ala: Tongana mbeni zo asara divorce na wali ti lo, atâa so wali ni asara lango-sioni pëpe [wala por·neiʹa na yanga ti Grec], si lo sara mariage na mbeni wali nde, andâ lo gi mbeni wali nde la.” (Matthieu 19:9). Bible amû lege na mbeni zo ti sara divorce gi tongana koli wala wali ti zo ni ague agi mbeni koli wala mbeni wali nde.

Na mango tënë ni so, adisciple atene: “Tongana tënë ti mungo tere ti koli na wali ayeke tongaso, a yeke nzoni zo asara mariage ape.” (Matthieu 19:10). Tongaso, a yeke nzoni mbeni zo so aye ti sara mariage ahinga so mariage ayeke mbeni ye so ayeke ngbâ biani biani!

Na ndo ti tënë ti dutingo kumbamba, Jésus afa so a dü ambeni zo mbaïwa, so ti tene ala lingbi pëpe ti bungbi koli na wali na mbeni zo. Ti ambeni, a yeke azo la asara si ala ga ambaïwa. Me ti ambeni, ala kanga nzara ti ala ti bungbi koli na wali. Ala sara tongaso, ndali ti so ala ye ti mû ngoi ti ala kue ti sara na akua so andu ye ti Royaume. Jésus atene na azo so ayeke mä lo, lo tene: “Zia zo so alingbi ti sara ni [wala ti ngbâ kumbamba] asara ni.”—Matthieu 19:12.

Na peko ti tënë so, azo akomanse ti ga na amolenge na Jésus. Me, adisciple asuku na azo ni, peut-être ti kpe ti tene amolenge ni ason yâ ti li ti Jésus. Tongana Jésus abâ ye ni so, bê ti lo ason, na lo tene na adisciple ni, lo tene: “Ala zia akete molenge ni aga na mbi. Ala gi ti kanga lege na ala pëpe, teti Royaume ti Nzapa ayeke ti azo so ayeke tongana akete molenge so. Ti tâ tënë ni, mbi tene na ala: Zo so ayeda na Royaume ti Nzapa pëpe tongana ti so mbeni kete molenge ayeke yeda na aye, fade lo yeke lï na yâ ni oko pëpe.”—Marc 10:14, 15; Luc 18:15.

So pendere fango ye! Ti lï na yâ ti Royaume ti Nzapa, a lingbi e duti azo so ayeke sara ye na ngangu ape nga so ayeda hio na ye so a fa na ala, tongana akete molenge. Na pekoni, Jésus afa ndoye so lo yeke na ni na mbage ti akete molenge, na lege so lo yô ala na maboko ti lo na lo iri tufa na ndo ti ala. Lo yeke nga na mara ti ndoye ni so na mbage ti azo kue so ‘ayeda na Royaume ti Nzapa tongana ti so mbeni kete molenge ayeke yeda na aye’.—Luc 18:17.