Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 78

Leke tere ti mo, zo ti batango ye so ayeke be-ta-zo!

Leke tere ti mo, zo ti batango ye so ayeke be-ta-zo!

LUC 12:35-59

  • A LINGBI ZO TI BATANGO YE SO AYEKE BE-TA-ZO ALEKE TERE TI LO

  • JÉSUS AGA TI ZIA KANGBI NA POPO TI AZO

Jésus afa lani so a yeke gi na mbeni “kete kundu” la a yeke mû ande na ala mbeni place na yâ ti Royaume ti yayu (Luc 12:32). Me, a lingbi ala bâ mara ti futa tongaso tongana mbeni senge ye ape. Ni la Jésus afa so, a yeke kota ye mingi ndali ti mbeni zo so a soro lo ti duti na yâ ti Royaume ni so ti duti na nzoni sarango ye.

A yeke ndali ni la Jésus atene na adisciple ti lo ti leke tere ti ala ti ngbâ ti ku gango ti lo. Lo tene: “Ala yü bongo nga ala leke tere ti ala, nga zia alampe ti ala angbâ na zango ni. A yeke nzoni ala sara ye tongana azo so ayeke ku wa ti ala na ngoi so lo londo na mariage ti kiri, si tongana lo si na lo pika yanga-da, ala zi ni hio na lo. Ngia ayeke na angbâa so tongana wa ti ala asi na lo wara ala na lango pëpe!”—Luc 12:35-37.

Adisciple ni alingbi ti hinga mara ti sarango ye so Jésus ayeke sara tënë ni na yâ ti toli ni so. Angbâa ni so lo sara tënë ti ala so aleke tere ti ala, na ala yeke ku kiringo ti wa ti ala. Jésus afa raison so a lingbi ala sara tongaso, lo tene: “Tongana wa ti ala ni asi kozo na bê ti bï [so ti tene ti londo na 21 h 00 ti si na bê ti bï], wala même na peko ti bê ti bï [so ti tene ti londo na bê ti bï ti si na 3 h 00], na lo wara ala na lango pëpe, ala yeke duti na ngia!”—Luc 12:38.

A hunda lani na ala pëpe gi ti duti angbâa wala awakua so ahinga ti sara kua ngangu. Tënë ni asigi polele na yâ ti fason so Jésus, so ayeke Molenge ti zo, asara tënë ti lo na yâ ti tapande ni so. Lo tene na adisciple ti lo, lo tene: “Ala nga, ala leke tere ti ala, ndali ti so Molenge ti zo ayeke ga na mbeni l’heure so ala ku lo na ni pëpe.” (Luc 12:40). Ye so aye ti fa so, mbeni lâ, Jésus ayeke kiri ande, na lo ye si adisciple ti lo, mbilimbili azo so ayeke na yâ ti “kete kundu” ni, aleke tere ti ala, ala ku lo.

Pierre aye ti mä yâ ti tënë ti Jésus so nzoni, tongaso lo hunda Jésus, lo tene: “Seigneur, mo yeke tene toli so gi na e wala na tanga ti azo ni nga kue?” A hon ti kiri tënë na Pierre gi droit awe, Jésus asara kua na mbeni toli so ague oko na ti kozo ni so, lo tene: “Zo wa la ayeke biani zo ti batango ye so ayeke be-ta-zo na ayeke sara ye na ndara? Lo so wa ti lo ayeke zia lo na ndo ti awakua ti lo kue ti mû na ala kobe so alingbi na ala na mbilimbili ngoi ni? Ngia ayeke na ngbâa so tongana wa ti lo aga awara lo na tere ti kua ni! Ti tâ tënë ni, mbi tene na ala: Wa ti lo ni ayeke zia lo na ndo ti aye ti lo kue.”—Luc 12:41-44.

Na yâ ti tapande so lo mû ni fade, “wa” ti angbâa ni aye ti sara tënë ti Jésus, Molenge ti zo. A yeke nga na lege ni ti tene so, “zo ti batango ye so ayeke be-ta-zo” ni so ayeke mbeni groupe ti akoli so ayeke na yâ ti “kete kundu” so a yeke mû ande na ala Royaume (Luc 12:32). Jésus aye ti fa so ambeni membre ti yâ ti kete kundu ni so la ayeke mû ande na “awakua ti lo kue” akobe “so alingbi na ala na mbilimbili ngoi ni.” Tongaso, Pierre nga na ambeni zo, so Jésus afa ye na ala nga lo mû kobe ti yingo na ala, alingbi ti hinga so mbeni ngoi ayeke duti ande dä so Molenge ti zo ayeke si ande na yâ ni. Na yâ ti ngoi ni so, a yeke leke ande mbeni ye ti mû kobe ti yingo na adisciple ti Jésus so ayeke “awakua ti lo”.

Jésus akiri afa na mbeni lege nde ngbanga ti nyen la a lingbi lê ti adisciple ti lo angbâ na zingo ni na ala sara hange na asarango ye ti ala. Lo sara tongaso, ngbanga ti so a peut ti si so mbeni na popo ti ala asara encore hange na asarango ye ti lo ape, na ye so apeut même ti gue na lo ti sara ye na lege ni ape na tere ti amba ti lo. “Me tongana a si so ngbâa so atene na bê ti lo: ‘Wa ti mbi ayeke si fafadeso ape,’ na lo to nda ti pika awakua ni ti koli na ti wali na ti te ye nga ti nyon ye ngbii lo soulé, wa ti ngbâa so ayeke ga ande na mbeni lango so lo ku ni pëpe nga na mbeni l’heure so lo hinga ni ape, na wa ti lo ni ayeke punir lo ngangu, nga lo yeke zia lo na popo ti azo so ayeke be-ta-zo pëpe.”—Luc 12:45, 46.

Jésus atene so ni ga “ti tingo wâ na ndo ti sese”. Na a yeke ye so lo sara la, na lege so lo tene ambeni tënë so aga na tumba na milieu ti azo, na ye so amû lege na azo ti hinga afango ye nga na angobo so ayeke na lege ni ape. Ye so asara nga si ambeni zo so yâ ti ala adoit fade ti kangbi ape, a kangbi, na tapande “babâ ayeke ke molenge-koli, na molenge-koli ayeke ke babâ, mama ayeke ke molenge-wali na molenge-wali ayeke ke mama ti lo. Mama ti koli ayeke ke wali ti molenge ti lo, na wali ayeke ke mama ti koli ti lo.”—Luc 12:49, 53.

Atënë so e londo ti bâ ge so, Jésus atene ni mbilimbili na adisciple ti lo. Na pekoni, lo tourné fadeso na mbage ti tanga ti azo ni. Gbâ ti ala angbâ ti ke aye so afa so lo la lo yeke Messie ni. Tongaso, Jésus atene na ala, lo tene: “Tongana ala bâ mbinda ayeke bungbi na mbage ti ouest, hio ala tene: ‘Kota pupu ti ngu ayeke ga,’ na a si tongaso. Nga, tongana ala bâ so pupu ti sud ayeke ya, ala tene: ‘Ndo ayeke chauffé ande mingi,’ na a yeke ye so asi. Ala, azo ti handango lê ti zo, tongana gi na bango sese nga na lê ti nduzu, ala hinga aye so ayeke si ande, a sara tongana nyen si ala hinga ape aye so ayeke si na ngoi so e yeke dä so?” (Luc 12:54-56). A yeke polele so ade ala leke tere ti ala ape.