Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 77

Jésus amû wango na ndo ti tënë ti mosoro

Jésus amû wango na ndo ti tënë ti mosoro

LUC 12:1-34

  • TAPANDE TI ZO TI MOSORO

  • JÉSUS ASARA TËNË TI ACORBEAU NGA NA AFLEUR

  • MBENI “KETE KUNDU” AYEKE DUTI ANDE NA YÂ TI ROYAUME NI

Na ngoi so Jésus angbâ ti te ye na ndo ti mbeni Farizien, gbâ ti azo abungbi na tere ti da ni, na ala yeke ku lo. Mara ti ye ni so asi na lo lani tongana lo yeke na Galilée (Marc 1:33; 2:2; 3:9). Gbâ ti azo ge na Judée aye ti bâ lo nga aye ti mä atënë ti lo. Sarango ye ti azo ni so ayeke nde na ti aFarizien so ayeke na ngoi ti tengo kobe ni.

Tënë so Jésus ague ti tene, a tene ye mingi na adisciple ti lo. Lo tene: “Ala sara hange na levure ti aFarizien, so ti tene sarango ye ti ala ti handango lê ti zo.” Kozo ti tene Jésus atene tënë so la ape. Me ye so lo bâ, na ngoi ti tisango ndo so, asara

si a yeke kota ye ti tene lo kiri lo mû wango ni so (Luc 12:1; Marc 8:15). A-Farizien apeut ti tara ti kanga ndo ti asioni sarango ye ti ala na fango so ala yeke voro Nzapa ngangu, me a lingbi a fa asioni ti ala ni na gigi. Jésus atene: “Ye kue so a honde ndo ni ngangu ayeke sigi ande. Nga tënë ti secret kue ayeke sigi ande.”—Luc 12:2.

Peut-être gbâ ti azo so abungbi lani na tere ti Jésus na ngoi ni so ayeke azo ti Judée so ade amä afango ye so lo fa na Galilée ape. Tongaso, lo kiri na ndo ti akota tënë so lo tene lani kozo. Lo tene na azo kue so ayeke mä lani lo, lo tene: “Ala sara pëpe mbeto ti azo so ayeke fâ zo, me, na pekoni, ala lingbi ti sara mbeni ye nde ape.” (Luc 12:4). Tongana ti so lo tene lani kozo awe, Jésus afa na adisciple ti lo so, a lingbi ala duti na confiance so, fade Nzapa ayeke mû na ala ye so ala yeke na bezoin ni. Na ndo ni, a lingbi ala yeda na Molenge ti zo nga ala hinga so Nzapa apeut ti aidé ala.—Matthieu 10:19, 20, 26-33; 12:31, 32.

Na pekoni, mbeni koli, so ayeke na milieu ti gbâ ti azo ni, afa na Jésus mbeni kpale ti lo so angbâ ti gbu bê ti lo, lo tene: “Maître, tene na ita ti mbi ti mû na mbi ti mbi ye so e wara na peko ti babâ ti e.” (Luc 12:13). Kpale adoit nga fade ti duti dä ape ndali ti so Ndia atene so, a lingbi a mû na kozo molenge double ti aye ti héritier (Deutéronome 21:17). Me, peut-être koli ni so aye ti wara ye mingi ahon ti so lo doit fade ti wara. Na ndara, Jésus agbu nga part ti lo ape. Jésus ahunda lo atene: “Koli, zo wa la azia mbi juge wala zo ti kangbingo yâ ti ye na popo ti ala?”—Luc 12:14.

Na pekoni, Jésus angbâ amû wango so na azo kue, lo tene: “Zia lê ti ala akpengba, na ala sara hange na alege nde nde kue ti sarango bê ti ye, ndali ti so, atâa tongana mbeni zo ayeke na aye mingi, aye ni so la ayeke mû na lo fini ape.” (Luc 12:15). Atâa mosoro ti mbeni zo apeut ti duti mingi tongana nyen, a peut ti si so mbeni lâ lo kui na lo dö aye so kue lo zia ni ape? Jésus aluti na ndo ti tënë ni so na mungo mbeni pendere tapande so afa nga nene ti warango nzoni iri na lê ti Nzapa.

Lo tene: “Yaka ti mbeni zo ti mosoro alë mingi. Tongaso, lo tene na yâ ti bê ti lo: ‘So mbi yeke na mbeni ndo encore ape ti zia akobe ti mbi ni dä so, mbi yeke sara tongana nyen?’ Lo tene: ‘Mbi yeke sara ande ye so: Mbi yeke kungbi agogoro ti mbi ti leke ambeni kota ni, na mbi yeke bungbi alê ti kobe ti mbi kue nga na akungba ti mbi kue dä.’ Na pekoni, lo tene: ‘Mbi wara gbâ ti anzoni ye so alingbi na ngu mingi. Tongaso mbi yeke wu tere ti mbi, mbi yeke te, mbi yeke nyon nga mbi yeke sara ngia.’ Me Nzapa atene na lo: ‘Mo so li ti mo ayeke dä ape so, a yeke mû fini ti mo na bï so. Tongaso zo wa la ayeke wara aye so mo bata na yâ ti agogoro so?’A yeke ye so ayeke si na zo so abungbi mosoro ndali ti lo wani, me lo yeke na mosoro na mbage ti Nzapa pëpe.”—Luc 12:16-21.

A lingbi adisciple ti Jésus, nga na ambeni zo so ayeke mä lani lo, asara hange ti tï na yâ ti gbanda ti gingo mosoro wala ti warango gbâ ti mosoro. Agingo bê ti lâ oko oko apeut ti sara si ala zia lege ti sarango na Jéhovah. A yeke ndali ni la si Jésus akiri na ndo ti pendere tapande so lo mû lani, a sara ngu oko na ndambo tongaso awe, na yâ ti fango ye ti lo na ndo ti Hoto.

Lo tene: “Ala zia ti gi bê ti ala ndali ti fini ti ala. Ala tene pëpe: ‘Nyen la e yeke te? Nyen la e yeke nyon? E yeke wara bongo na ndo wa ti yü? . . . Ala bâ acorbeau nzoni: Ala yeke lu lê ti kobe ape, ala yeke ko lê ti kobe ape nga ala yeke na gogoro wala da ti batango kobe dä ape, me Nzapa ayeke mû kobe na ala. Ngere ti ala azo ahon ngere ti andeke ape? . . . Ala bâ tongana nyen la afleur ayeke kono. Ala yeke sara kua ape nga ala yeke pe kamba ti sara na bongo pëpe. . . . Ala zia ti gi bê ti ala na ndo ti ye so ala yeke te nga ala yeke nyon ande. Ala zia ti duti na bê so ayeke gi na nduzu. . . . Babâ ti ala so ayeke na yayu ahinga so ala yeke na bezoin ti aye ni so. . . . Ala ngbâ ti gi Royaume ti lo, na lo yeke mû na ala aye so.”—Luc 12:22-31; Matthieu 6:25-33.

Azo wa la ayeke gi ande ti wara Royaume ni? Jésus atene so azo so ayeke gi ande ti wara ni a yeke mbeni kete wungo ti azo, so a iri ala “kete kundu”, na so ayeke azo so ayeke be-ta-zo na Nzapa. Na pekoni, a fa lani so wungo ti ala ayeke gi 144 000. Nyen la ayeke bata ni na ala nyen? Jésus atene so “Babâ ti ala amû desizion ti mû Royaume ni na ala.” Ni la, a lingbi ala gi ti bungbi amosoro na sese ge ape, ngbanga ti azo ti nzi apeut ti nzi ni. Me, a lingbi ala “bungbi na yayu mosoro so ayeke hunzi lâ oko ape,” na ndo so ala yeke gue ande dä ti komande legeoko na Christ.—Luc 12:32-34.