Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 80

Nzoni berger nga na agbagba so ayeke bata ataba dä

Nzoni berger nga na agbagba so ayeke bata ataba dä

JEAN 10:1-21

  • JÉSUS ASARA TËNË NA NDO TI NZONI BERGER NGA NA AGBAGBA SO A YEKE BATA ATABA DÄ

Na yâ ti fango ye ti lo na Judée, Jésus asara kua na mbeni ye so azo so ayeke mä lani lo ahinga ni nzoni. Lo sara tënë ti ataba nga na agbagba so a yeke bata ataba dä. Me, lo sara tënë ni so ti fa nda ti mbeni ye. A-Juif ahinga tënë ti David so atene: ‘Jéhovah ayeke Berger ti mbi. Ye oko ayeke manke mbi ape. Lo sara si mbi lango na ando so pere ayeke dä mingi.’ (Psaume 23:1, 2). Na yâ ti mbeni versê ni nde, David atene na mara ni atene: ‘Zia e sara agenou na devant ti Jéhovah so asara e, ndali ti so lo yeke Nzapa ti e, na e yeke azo ti ndo ti tengo pere ti lo.’ (Psaume 95:6, 7). Teti angu mingi, a haka lani azo ti Israël so ayeke na gbe ti Ndia na mbeni kundu ti ataba.

“Ataba” ni so ayeke na yâ ti mbeni “gbagba ti ataba” na lege so a dü lani ala na gbe ti mbele ti Ndia ti Moïse. Ndia ni ayeke tongana mbeni gbagba so akangbi mara ni na asioni sarango ye ti ambeni mara so ayeke na gbe ti mbele ni ape. Me, ambeni zo ti Israël asara ye na lege ni ape na tere ti kundu ti Nzapa ni. Jésus afa ni atene: “Ti tâ tënë ni, mbi tene na ala: Zo so alï na yâ ti gbagba ti ataba na yanga ni ape, me lo monté na mbeni ndo nde si lo lï dä, ayeke zo ti nzi nga zo ti gbungo aye ti zo na ngangu. Me zo so alï na yanga ti gbagba ni ayeke berger ti ataba ni.”—Jean 10:1, 2.

Na mango tënë ni so, peut-être azo ni apensé na ndo ti ambeni zo so aga lani na atene so ala la ayeke Messie ni wala Christ ni. Azo ni so aga so ayeke tongana azo ti nzi. A lingbi mara ni amû peko ti mara ti azo ti mvene tongaso ape. Me, a lingbi ala mû peko ti “berger ti ataba ni,” so Jésus atene na ndo ti lo atene:

“Zo ti batango yanga ti gbagba ni azi ni na lo, na ataba ni amä go ti lo. Lo iri ataba ti lo oko oko na iri ti ala, na lo sigi na ala. Tongana lo sigi na ataba ti lo kue awe, lo hon kozo na ala, na ala mû peko ti lo ngbanga ti so ala hinga go ti lo. Ala yeke mû peko ti mbeni zo nde lâ oko ape, me ala yeke kpe lo, ndali ti so ala hinga go ti ambeni zo nde pëpe.”—Jean 10:3-5.

Jean Baptiste, so asara kua lani tongana mbeni zo ti batango yanga ti gbagba, afa Jésus tongana zo so mara ni, so a haka ala tongana ataba na gbe ti Ndia, adoit ti mû peko ti lo. Ambeni taba ni, so ayeke na Galilée nga même ge na Judée, ahinga go ti Jésus. Me, Jésus ayeke “sigi na ala” ti gue na ala na ndo wa? Nyen la ayeke si tongana ala mû peko ti lo? Azo so amä lani tapande ti Jésus so adoit ti hunda tere ti ala na ndo ti atënë ni so, ngbanga ti so “ala mä yâ ti atënë so lo yeke tene na ala so ape.”—Jean 10:6.

Jésus afa nda ni lo tene: “Ti tâ tënë ni, mbi tene na ala: Mbi yeke yanga ti gbagba so ataba ayeke hon dä. Azo kue so aga atene ala yeke mbi ayeke azo ti nzi nga azo ti gbungo aye ti azo na ngangu. Me ataba ni amä ala ape. Mbi la mbi yeke yanga ti gbagba ni. Zo so ahon na lege ti mbi ti lï na yâ ni, lo la a yeke sö lo ande. Lo yeke lï na lo yeke sigi, nga lo yeke wara ndo ti tengo pere.”—Jean 10:7-9.

A yeke polele so, Jésus aye ti fa mbeni fini ye na ala la. Azo so ayeke mä lani lo ahinga so lo la lo yeke pëpe yanga ti gbagba ti mbele ti Ndia ni, ndali ti so mbele ti Ndia ni ayeke ti lo dä asara angu mingi awe. Tongaso, Jésus aye ti fa na ala so ataba so lo “sigi na ala,” lo yeke gue ti lï na ala na yâ ti mbeni gbagba ti batango ataba nde. Nyen la ayeke si ande?

Ti fa nda ti tënë ti lo ni nzoni encore, Jésus atene: “Mbi ga si ala duti na fini nga ala ngbâ lakue na fini. Mbi yeke nzoni berger so mara ni ayeke dä ape. Berger ni so ayeke kä fini ti lo na kuâ ndali ti ataba ni.” (Jean 10:10, 11). Lani, Jésus adë bê ti adisciple ti lo kozoni awe na tenengo na ala, lo tene: “Ala so ayeke tongana kete kundu ti ataba so, ala sara mbeto ape, ndali ti so Babâ ti ala amû desizion ti mû Royaume ni na ala.” (Luc 12:32). Ye oko, azo so abungbi si aga “kete kundu” ayeke azo so Jésus ayeke gue na ala ti lï na ala na yâ ti mbeni fini gbagba ti ataba, tongaso si ala “duti na fini nga ala ngbâ lakue na fini.” Ti duti mbeni oko ti kundu ni so ayeke mbeni kota pasa!

Me, Jésus ahunzi tënë ti lo ge ape. Lo tene: “Mbi yeke na ambeni taba so ayeke na yâ ti gbagba so ape. Ala nga kue, a lingbi mbi ga na ala na yâ ni; ala yeke mä go ti mbi, na ala kue ayeke ga kundu oko na gbe ti berger oko.” (Jean 10:16). “Ambeni taba” ni so “ayeke na yâ ti gbagba so ape.” Me, ala yeke na yâ ti mbeni gbagba so ayeke nde na ti “kete kundu” so ayeke wara ande Royaume ni. Akundu use ti ataba so ayeke na abeku nde nde. Me, akundu ti ataba use so kue ayeke bâ ande nzoni na lege ti kua so Jésus ayeke sara. Jésus atene: “Babâ aye mbi, ndali ti so mbi kä fini ti mbi na kuâ”.—Jean 10:17.

Gbâ ti ambeni zo angbâ atene: “Mbeni sioni yingo ayeke na yâ ti lo nga ye asara li ti lo.” Ye oko, ambeni afa so ala mä lo nzoni na ala ye ti mû peko ti Nzoni Berger ni. Ala tene: “Zo so sioni yingo ayeke na yâ ti lo alingbi ti tene atënë so ape. Sioni yingo alingbi ti zi lê ti awaziba tongana nyen?” (Jean 10:20, 21). Ala yeke sara tënë ti koli so a dü lo lani waziba si Jésus asava lo so.