Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 79

Ngbanga ti nyen futingo ayeke ku lani aJuif so amä na bê ape?

Ngbanga ti nyen futingo ayeke ku lani aJuif so amä na bê ape?

LUC 13:1-21

  • JÉSUS ASIGI NA MBENI YE TI MANDA NA YÂ TI AMBENI YE TI VUNDU USE SO ASI LANI

  • NA LÂ TI SABBAT, A SAVA MBENI WALI SO AYEKE NA MBENI NGANGU KOBELA

Jésus atara ti sara tënë na ndo ti aye nde nde ti mû lege na azo ti gbu li ti ala na ndo ti songo so ala yeke na ni na Nzapa. Lo kiri lo wara lege ti sara ni, na peko ti lisoro so lo sara na azo na gigi ti da ti mbeni Farizien.

Ambeni zo aga asara tënë ti mbeni ye ti vundu so apassé. Ala sara tënë ti “ambeni zo ti Galilée so [Gouverneur ti Rome Ponce] Pilate afâ ala na ngoi so ala yeke mû asandaga.” (Luc 13:1). Nyen la ayeke na gbe ti tënë ti azo ni so?

Peut-être a fâ azo ti Galilée so na ngoi so gbâ ti aJuif alondo ti dö sese lani na Pilate ndali ti so lo mû nginza ti temple ti leke na mbeni lege so apeut ti ga na ngu na Jérusalem. Peut-être a yeke amokonzi so ayeke na temple la ayeda si Pilate amû nginza ni so. Azo so afa peko ti ye ti vundu ni so na Jésus adoit ti pensé so azo ti Galilée ni so akui ngbanga ti so ala sara ambeni siokpari. Me, Jésus ake mara ti bango ndo ni so.

Lo hunda ala, lo tene: “Ala pensé so ye ti sioni so asi na azo ti Galilée so ndali ti so siokpari ti ala ahon ti tanga ti azo ti Galilée kue?” Kiringo tënë ni ayeke Ên-ën. Jésus angbâ asara kua na ye ti vundu so asi so ti gboto mê ti aJuif ni, lo tene: “Me tongana ala changé bê ti ala ape, a yeke futi ala kue tongaso nga.” (Luc 13:2, 3). Na pekoni, Jésus asara tënë ti mbeni ye so âmanke asi lani ade ti ninga ape, na so peut-être asi na ngoi so a ngbâ lani ti leke lege ti gango na ngu ni so. Lo hunda ala, lo tene:

“Azo 18 so tour ti Siloam atuku na ndo ti ala si a fâ ala, ala pensé so siokpari ti ala ahon ti azo kue so ayeke na Jérusalem?” (Luc 13:4). Azo ni adoit ti pensé so azo ni so akui ndali ti so ala kue asara ambeni siokpari. Ge encore, Jésus ake tënë ni so. Jésus ahinga so “lâ na pasa” la asi na azo ni so, na ni la asara si ye ti vundu so asi na ala so (Zo-ti-fa-tene 9:11). Me, azo so ayeke mä lani Jésus apeut ti manda mbeni ye na lege ti ye ti vundu so asi so. Jésus atene: “Tongana ala changé bê ti ala ape, a yeke futi ala kue tongaso nga.” (Luc 13:5). Me, ngbanga ti nyen la Jésus aluti na ndo ti tënë ni so fadeso?

A ngbâ na lo ngoi mingi ape ti tene kua ti lo ti fango tënë ahunzi. Ti sara si tënë ni asigi polele, lo mû tapande, lo tene: “Mbeni koli ayeke na mbeni keke ti figue so a lu ni na yâ ti yaka ti vigne ti lo. Lo gue ti bâ wala a lë, me lo wara lengo ni oko dä ape. Tongaso lo tene na zo ti sarango kua ti vigne ni: ‘A sara ngu ota awe la mbi yeke ga ti gi lengo ni, me mbi wara mbeni ape. Mo dë ni na sese! A yeke kanga sese ni senge senge ngbanga ti nyen?’ Lo tene na wa ti yaka ni: ‘Kota zo, zia ni a ngbâ kamême ngu oko; mbi yeke zi dû na gere ni ti tuku puru ti nyama dä. Tongana a lë na yâ ti angoi so ayeke ga, so nzoni. Me tongana a lë ape, mo dë ni na sese.’”—Luc 13:6-9.

A hon même ngu ota tongaso awe la Jésus atara ti lu lengo ti mabe na bê ti aJuif so. Ye oko, a yeke gi kete wungo ti azo la aga adisciple ti lo na a yeke gi ala la apeut ti bâ ala tongana alengo ti peko ti ngangu kua so lo sara. Fadeso, na yâ ti osio ngu ti kusala ti lo, Jésus akiri asara kua ahon ti kozo. So lo yeke fa tënë na Judée nga na Pérée ayeke mo bâ mo tene lo yeke zi dû na lo yeke tuku puru ti nyama na tere ti keke ti figue so aduti fä ti aJuif. Ye ti pekoni ayeke so wa? Gi kete wungo ti aJuif la ayeda ti mä lo. Na ndo ni, mara ni ake ti changé bê ti ala na fadeso ala yeke gue na futingo.

Kete na pekoni, na ngoi ti lâ ti Sabbat, ambeni azo ni akiri afa sioni bê ti ala na gigi. A yeke na ngoi so Jésus angbâ ti fa tënë na yâ ti mbeni synagogue. Lo bâ mbeni wali so peko ti lo aba mingi teti ngu 18, ndali ti so mbeni sioni yingo ayeke sara lo pasi. Na nzoni bê Jésus atene na lo atene: “Wali, a zi mo awe na yâ ti ye so ayeke woko mo so.” (Luc 13:12). Jésus azia maboko na ndo ti wali ni, na gi na lê ni lê ni, wali ni agboto yâ ti tere ti lo na lo komanse ti mû gonda na Nzapa.

Ye so ason tâ yâ ti bê ti mokonzi ti synagogue ni, na lo tene: “Alango ayeke omene so zo alingbi ti sara kua dä. Ala ga na alango ni so si a sava ala, me na lâ ti Sabbat pëpe.” (Luc 13:14). Mokonzi ni so ake ape so Jésus ayeke na ngangu ti sava azo. Me, lo yeke suku na azo ni so, ndali ti so ala ga na lâ ti Sabbat ti tene a sava ala. Jésus akiri tënë na lo na fango na lo mbeni tâ tënë, lo tene: “Ala azo ti handango lê ti zo, na lâ ti Sabbat, ala oko oko kue ayeke zi bagara ti ala wala kororo ti ala na yâ ti da ti lo ti gue na lo ti nyon ngu ape? Wali so ayeke molenge ti Abraham, nga Satan akanga lo ngu 18! A yeke na lege ni ape ti zi lo na yâ ti kanga so na lâ ti Sabbat?”—Luc 13:15, 16.

Kamene agbu awato ti Jésus, me ti mingi ti azo, a nzere na ala ti bâ Jésus na sarango aye ti kpene tongaso. Na pekoni, ge na Judée, Jésus atene ambeni toli use na ndo ti Royaume, atoli so lo sara tënë ni lani awe na ngoi so lo yeke na yâ ti mbeni ngö na lê ti Kota ngu ti Galilée.—Matthieu 13:31-33; Luc 13:18-21.