Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 68

Molenge ti Nzapa ayeke “lumière ti dunia so”

Molenge ti Nzapa ayeke “lumière ti dunia so”

JEAN 8:12-36

  • JÉSUS AFA ZO WA LA AYEKE MOLENGE NI

  • AJUIF AYEKE LANI ANGBÂA TONGANA NYEN?

Na ndangba lango ti Matanga ti aTabernacle, so ti tene na lango mbasambala ni, Jésus ayeke fa tënë na yâ ti mbeni mbage ti temple so a yeke zia ka “asanduku ti nginza” dä (Jean 8:20; Luc 21:1). Peut-être, place ni so ayeke na yâ ti mbage ti temple ni so a iri ni Sedu ti aWali, na a yeke na ndo ni so la azo ayeke ga abi lani offrande dä.

Tongana a si na bï na ngoi ti matanga ni, a yeke za wâ na yâ ti mbage ti temple ni so. Ambeni kota ye ti yongo na lampe ayeke osio na place ni so, na a zia na ndo ni oko na oko ambeni kota dû ti sembe osio, so a tuku mafuta asi yâ ni. Awâ ti lampe ni so ayeke za ka ngangu mingi, a peut ti za juska na ando so ayo mingi. Ye so Jésus ague ti fa apeut ti dabe ti azo so ayeke mä lani lo na ndo ti ye ni so. Lo tene: “Mbi yeke lumière ti dunia so. Zo so amû peko ti mbi, lo yeke tambela na yâ ti bingo lâ oko ape, me lo yeke wara ande lumière so amû fini na zo.”—Jean 8:12.

A-Farizien ake tënë ti Jésus ni so, ala tene: “Mo yeke sara tënë ti témoin ti mo wani. Tënë ti témoin ti mo ni so ayeke tâ tënë ape.” Jésus akiri tënë na ala, lo tene: “Même tongana mbi sara tënë ti témoin ti mbi wani, tënë ti mbi ayeke tâ tënë ngbanga ti so mbi hinga ndo so mbi londo dä si mbi ga so, mbi hinga nga ndo so mbi yeke gue dä. Me ala, ala hinga ndo so mbi londo dä si mbi ga so ape, ala hinga nga ndo so mbi yeke gue dä ape.” Nga, lo kiri lo tene: “Ndia ti ala wani atene: ‘Tënë ti témoin ti azo use ayeke tâ tënë.’ Mbi sara tënë ti témoin ti mbi wani, na Babâ so atokua mbi asara tënë ti témoin ti mbi nga.”—Jean 8:13-18.

Teti so ala ke tënë ti lo ni, aFarizien ni ahunda lo atene: “Babâ ti mo ni ayeke na ndo wa?” Jésus angbâ atene na ala tâ tënë, lo tene: “Ala hinga mbi ape, ala hinga nga Babâ ti mbi ape. Tongana ala hinga mbi, ala yeke hinga nga Babâ ti mbi.” (Jean 8:19). Me, atâa so même aFarizien ni angbâ lani na nzara ti gbungo Jésus, zo oko andu lo ape.

Jésus akiri atene mbeni tënë so lo tene ni lani awe, lo tene: “Mbi yeke hon, ala yeke gi mbi ande, me ala yeke kui ande na yâ ti siokpari ti ala. Ndo so mbi yeke gue dä, ala lingbi ti si dä ape.” Me, aJuif ni amä nga yâ ti tënë ti Jésus ni so kete ape, na ala komanse ti hunda atene: “Lo yeke fâ tere ti lo ande la ape? Ngbanga ti so lo tene: ‘Ndo so mbi yeke gue dä so, ala lingbi ti si dä ape.’” Ala mä yâ ti tënë ti Jésus ni so ape ngbanga ti so ala hinga pëpe ndo so lo londo dä. Me, lo fa ni na ala, lo tene: “Ala yeke ti ala ti gbe ni, me mbi yeke ti mbi ti nduzu. Ala yeke ti dunia so, mbi yeke ti dunia so ape.”—Jean 8:21-23.

Jésus ayeke sara lani tënë ti ngoi so lo yeke lani na yayu nga na ti so lo la lo yeke Messie so a mû zendo ni wala Christ ni, so ala amokonzi-nzapa ni so ayeke ku lo lani so. Me, même so kue ala ngbâ ti hunda lo, ala tene: “Mo yeke zo wa?”—Jean 8:25.

Na bango so ala ye gi ti ke atënë ti lo, Jésus akiri tënë atene: “Ka mbi yeke sara tënë na ala ngbanga ti nyen?” Me, lo kiri lo gboto lê ti ala na ndo ti Babâ ti lo nga lo fa ngbanga ti nyen la aJuif adoit fade ti mä Molenge ni, lo tene: “Lo so atokua mbi ayeke tene gï tâ tënë, na aye so mbi mä na yanga ti lo, mbi yeke sara tënë ni na yâ ti dunia so.”—Jean 8:25, 26.

Na pekoni, Jésus afa confiance so lo yeke na ni na mbage ti Babâ ti lo, confiance so aJuif ni so ayeke na ni ape, lo tene: “Na peko ti so ala yâa Molenge ti zo na nduzu awe, la ala yeke hinga ande atene so mbi yeke lo nga so mbi yeke sara ye oko na bê ti mbi wani ape. Me mbi yeke tene gï aye so Babâ afa na mbi. Lo so atokua mbi ayeke na mbi. Lo zia mbi gi mbi oko ape, ngbanga ti so mbi yeke sara lakue aye so anzere na bê ti lo.”—Jean 8:28, 29.

Me ti ambeni aJuif ni so amä na bê na lo, lo tene na ala, lo tene: “Tongana ala ngbâ na yâ ti tënë ti mbi, ala yeke biani adisciple ti mbi, na ala yeke hinga ande tâ tënë, na tâ tënë ayeke zi ala.”—Jean 8:31, 32.

Na ambeni, tënë ti zingo ala ni so ayeke mbeni ye so ahon gbungo li ti ala. Ala ke tënë ti Jésus ni, ala tene: “E yeke ahale ti Abraham, mbeni zo agbu e na ngbâa lâ oko ape. A sara tongana nyen si mo tene: ‘A yeke zi ala ande’?” A-Juif ni ahinga so, ngoi na ngoi, ala yeke lani na gbe ti komandema ti awande, ye oko, ala ye ti tene a iri ala angbâa ape. Me, Jésus afa na ala so ala ngbâ na gbe ti ngbâa. Lo tene: “Ti tâ tënë ni, mbi tene na ala: Zo kue so angbâ ti sara siokpari ayeke ngbâa ti siokpari.”—Jean 8:33, 34.

So aJuif ake ti yeda so ala yeke na gbe ti ngbâa ti siokpari, a sara si ala yeke na yâ ti kpale. Jésus afa ndani, lo tene: “Ngbâa ayeke ngbâ na popo ti azo ti da ni lakue lakue ape, me molenge ti da ni ayeke ngbâ ti lo lakue lakue.” (Jean 8:35). Mbeni ngbâa ayeke pëpe na droit ti wara héritage nga a peut ti tomba lo na ngoi kue. Gi molenge so a dü lo wala a bata lo la ayeke ngbâ “lakue lakue” na popo ti azo ti da ni, so ti tene lo yeke ngbâ juska na kuâ ti lo.

Tâ tënë na ndo ti Molenge ni la ayeke tâ tënë so ayeke zi azo na gbe ti ngbâa ti siokpari na kuâ, teti lakue lakue. Jésus atene: “Tongana Molenge ni la si azi ala, andâ ala yeke azo so a zi ala biani awe.”—Jean 8:36.