Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Jésus: Lege ni, tâ tënë na fini

 CHAPITRE 81

Lo na Babâ ti lo ayeke oko, me lo yeke Nzapa ape

Lo na Babâ ti lo ayeke oko, me lo yeke Nzapa ape

JEAN 10:22-42

  • “MBI NA BABÂ E YEKE OKO”

  • JÉSUS AKE TI TENE A BÂ LO TONGANA NZAPA

Jésus aga na Jérusalem ti sara Matanga ti mungo temple na Nzapa (wala Hanoukka). A sara matanga ni so ti kiri ti mû temple ni na Nzapa. Ândö, Gbia ti Syrie, Antiochus IV Épiphane asara mbeni gbalaka na ndo ti kota gbalaka so ayeke na yâ ti temple ti Nzapa. Na ambeni ngoi na pekoni, amolenge ti mbeni prêtre so ayeke Juif akiri amû Jérusalem na ala kiri asara mbeni matanga ti mungo temple ni na Jéhovah. Ti londo fadeso na ngoi ni so ti ga na ni, ngu oko oko, a yeke sara matanga ni na lango 25 ti Kislev, so ayeke mbeni nze so ayeke na popo ti nze ti novembre na nze ti décembre.

A yeke na ngoi so dê asara mingi. Jésus ayeke tambela na yâ ti temple, na ndo so a iri ni Véranda-ti-Salomon. Ge, aJuif angoro lo, na ala hunda lo atene: “Mo yeke sara si bê ti e angbâ gi na nduzu juska lawa? Tongana mo yeke Christ, tene na e polele.” (Jean 10:22-24). Tënë ti nyen la Jésus ayeke tene ande na ala? Lo tene: “Mbi tene ni na ala awe, me ala yeda na ni ape.” Jésus atene na ala droit tongaso ape so lo la lo yeke Messie, tongana ti so lo tene lani na wali ti Samarie na tere ti mbeni dû ti ngu so (Jean 4:25, 26). Me, lo fa na ala zo wa la lo yeke, na ngoi so lo tene lani na ala, lo tene: “Kozo si Abraham abâ gigi, mbi yeke lani dä.”—Jean 8:58.

Jésus aye si azo wani la ahinga so lo la lo yeke Christ ni, na hakango aye so lo sara na atënë ti aprophétie so a tene lani kozo awe na ndo ti aye so Christ ni ayeke sara ande. A yeke ndali ni la, na ambeni ngoi, lo tene na adisciple ti lo ti tene ala tene na azo ape so lo la lo yeke Messie ni. Me ge fadeso, lo tene dandara na aJuif ni so aye ti kanga lege na lo so, lo tene: “Akusala so mbi yeke sara na iri ti Babâ ti mbi, ni la ayeke sara tënë na ndo ti mbi. Me ala yeda na ni ape ngbanga ti so ala yeke ataba ti mbi ape.”—Jean 10:25, 26.

Ngbanga ti nyen la ala ke ti yeda so Jésus la ayeke Christ ni? Jésus atene: “Ala yeda na ni ape ngbanga ti so ala yeke ataba ti mbi ape. Ataba ti mbi amä go ti mbi, mbi hinga ala, na ala mû peko ti mbi. Mbi mû na ala fini ti lakue lakue, na a yeke futi ala lâ oko ape, nga mbeni zo ayeke gboto ala na tïtî mbi ape. Ye so Babâ ti mbi amû na mbi ayeke kota ahon tanga ti aye kue”. Na pekoni, Jésus afa na ala tongana nyen la songo ti lo na Babâ ti lo ayeke nde mingi, lo tene: “Mbi na Babâ e yeke oko.” (Jean 10:26-30). Jésus ayeke ge na sese, na Babâ ti lo ayeke kâ na yayu, tongaso lo ye pëpe ti tene so lo na Babâ ti lo ayeke na yâ ti tere oko. Me, lo ye ti tene so ala yeke beoko.

Tënë ti Jésus so ason bê ti aJuif juska ala ro atênë ti bo na lo si lo kui. Aye ni so asara nga mbeto na Jésus ape. Lo tene na ala, lo tene: “Mbi fa na ala anzoni kusala mingi so alondo na Babâ. Kusala ti so wa la ala ye ti bo mbi na tênë ndali ni?” Ala tene na lo atene: “E yeke bo mo na tênë ndali ti mbeni nzoni kusala pëpe, me ndali ti so mo zonga Nzapa. . . . Mo ye ti fa so mo yeke mbeni nzapa.” (Jean 10:31-33). Me so Jésus atene lâ oko ape so lo yeke mbeni nzapa, ka ngbanga ti nyen la ala bi tënë ni so na li ti lo?

Jésus ayeke fa na ala so lo yeke na ngangu ti sara ambeni ye so aJuif apensé atene gi Nzapa oko la ayeke sara ka ni. Na tapande, na ndo ti tënë ti “ataba”, lo tene: “Mbi mû na ala fini ti lakue lakue,” so ayeke mbeni ye so zo la apeut ti mû ni na mba ti lo ape (Jean 10:28). A-Juif ni asara sanka ti tënë so Jésus atene polele atene Babâ ti ni amû na ni commandement so.

Ti fa nga so tënë ni ayeke mvene, Jésus ahunda ala, lo tene: “Na yâ ti Ndia ti ala [na Psaume 82:6], Nzapa atene: ‘Ala yeke anzapa,’ . . . Tongana Nzapa airi ala so tënë ti lo afâ ngbanga na li ti ala ‘anzapa, a yeke na lege ni si ala tene na mbi, atene: ‘Mo zonga Nzapa’, tongana mbi tene mbi yeke Molenge ti Nzapa? Atâa so Babâ azia mbi nde ndali ti lo na lo tokua mbi na yâ ti dunia so.”—Jean 10:34-36.

Bible airi même awafango ngbanga so ayeke na siokpari na tere ti ala atene ala yeke “anzapa”. Ka ngbanga ti nyen la aJuif atene so Jésus azonga Nzapa ndali ti so lo tene ni “yeke Molenge ti Nzapa?” Lo sara tënë ti mbeni ye so ala doit ti yeda na ni. Lo tene: “Tongana mbi yeke sara akusala ti Babâ ti mbi ape, ala yeda pëpe na ye so mbi tene. Me tongana mbi yeke sara ni, ala yeda na akusala ni, atâa ala yeda pëpe na ye so mbi tene, si ala hinga na ala girisa lâ oko ape so Babâ ayeke beoko na mbi, na mbi yeke beoko na Babâ.”—Jean 10:37, 38.

A-Juif atara ti gbu lo, me lo kpe na maboko ti ala encore. Lo zia Jérusalem na lo fâ Ngu ti Jourdain, lo gue na place so Jean akomanse lani ti batize azo dä, a sara angu osio tongaso awe. Âmanke ndo ni so ayo mingi ape na mbage ti sud ti yanga ti Kota ngu ti Galilée.

Na ndo ni so, azo aga na tere ti Jésus na ala tene: “Jean asara lani mbeni fä oko ape, me atënë kue so Jean atene lani na ndo ti koli so ayeke tâ tënë.” (Jean 10:41). A yeke ndali ni la, gbâ ti aJuif amä na bê na Jésus.

TI HINGA AMBENI TËNË